InfoHub Logo

كەلەر جىلى ۇبت تاپسىرۋدا اعىلشىن ءتىلىن تەرەڭ مەڭگەرگەن وقۋشىلار ءۇشىن ارنايى مۇمكىندىك قاراستىرىلعان.

«ەگەر تالاپكەردىڭ تۇسكەلى جاتقان ماماندىعى نەمەسە تاڭداۋ ءپانى اعىلشىن ءتىلى بولىپ، ول ءتىلدى جەتىك مەڭگەرگەن جاعدايدا ۇبت-داعى اعىلشىن تىلىنەن تاپسىرۋدان بوساتىلادى. ءبىراق، ونىڭ سول ءتىلدى تەرەڭ مەڭگەرگەندىگىن دالەلدەيتىن IELTS، TOEFL سەكىلدى حالىقارالىق سەرتيفيكاتى بولۋى قاجەت. جانە سەرتيفيكاتتىڭ مەرزىمى جارامدى بولۋى ءتيىس»، - دەدى ق ر ءبىلىم جانە عىلىم ۆيسە-مينيسترى اسحات ايماعامبەتوۆ وكق-دە وتكەن باسپا ءسوز ءماسليحاتىندا.

ۆيسە-مينيستر اتالعان جاڭاشىلدىق جوو-داعى ماگيستراتۋراعا ءتۇسۋ تاجىريبەسىندە ءبىراز جىلدان بەرى قولدانىلىپ كەلە جاتقانىن دا ايتىپ ءوتتى.

سونىمەن قاتار، ءبىلىم ءمينيسترىنىڭ ورىنباسارى جۋرناليستەردىڭ «اعىلشىن ءتىلىن جەتىك مەڭگەرگەندىگىن دالەلدەيتىن IELTS، TOEFL سەرتيفيكاتتارىن جاساتىپ الماسىنا كىم كەپىل، ول جاعى قالاي شەشىلەدى» دەگەن سۇراقتارىنا جاۋاپ بەردى.

«ءيا، شىنىندا دا ويلانتارلىق ماسەلە. دەگەنمەن ءبىزدىڭ ميينسترلىك اتالعان پروبلەمانىڭ الدىن الىپ، ءتيىستى شارالاردى قابىلداۋدامىز. ياعني ەمتيحان قۇجاتتارىن قابىلدايتىن كوميسسيا شەتەل ءتىلىن مەڭگەرگەندىگى تۋرالى سەرتيفيكاتتارىن قابىلداۋ كەزىندە تەكسەرىپ الۋى قاجەت. ول ءۇشىن بىزدە ارنايى بازا بار، ول بازاعا تالاپكەردىڭ ءاتى-جونى مەن سەرتيفيكاتىنىڭ ءنومىرىن ەنگىزسە ونىڭ قانشالىقتى راستىعى تۋرالى بارلىق دەرەكتەر شىعادى. سوندىقتان بۇل جەردە پروبلەما جوق»، - دەدى ول.

ەسكە سالساق، ۇستىمىزدەگى جىلدىڭ كوكتەمىندە استانا مەديسينالىق ۋنيۆەرسيتەتىندە ستۋدەنتتەردىڭ ارىز-شاعىمىنان كەيىن اعىلشىن تىلىنە ارنالعان جۇزدەگەن IELTS جالعان سەرتيفيكاتى انىقتالعان بولاتىن. كەيىن اتالعان جاعداي بويىنشا دەنساۋلىق ساقتاۋ ءمينيسترى ە.ءبىرتانوۆ تۇسىنىك بەرىپ، سەرتيفيكاتى جالعان دەپ تانىلعان ستۋدەنتتەردىڭ مەملەكەتتىك گرانتتارىنان ايىرىلىپ، وقۋدان شىعارىلعانىن ءمالىم ەتتى.   

ايتا كەتەيىك، بۇعان دەيىن 2019 جىلى ۇبت تاپسىرۋدا ءبىرقاتار وزگەرىستەر ەنگىزىلگەنىن حابارلاعان بولاتىنبىز. 

---