الەم ەلدەرىندە تۇماۋدى قالاي ەمدەيدى؟
كۇن سالقىنداي باستاعاننان-اق ادامعا تۇماۋ ءجيى «جابىسا» باستايتىنى راس. ارينە، ءدارىحانالار تۇماۋعا قارسى ءتۇرلى دارى-دارمەككە تولى. ءبىراق، اتالعان اۋرۋعا قارسى بابالارىمىزدان قالعان كەيبىر ادىس-تاسىلدەردىڭ اسەرى دارىلەردەن كەم تۇسپەيدى. ءتىپتى، ولار ءالى كۇنگە دەيىن قولدانىلۋدا.
الەمنىڭ ءتۇرلى ەلدەرىندە قولدانىلىپ كەلە جاتقان ەم تاسىلدەرىن جيناقتاعان ەدىك. مالىمەتپەن تانىسا وتىرىپ، سىزدەر دە باسقا مادەنيەتتەردىڭ مۇرىن بىتەلىپ، تاماق اۋرۋىمەن قالاي كۇرەسەتىنىن باعالاپ كورىڭىزدەر.
ىستىق سيدر (امەريكا)
instagram: @raspberry_tart
قۇرامىندا پياز، سارىمساق، ءزىمبىر، كايەن بۇرىشى، اقجەلكەك، ليمون، بال جانە ءتۇرلى دامدەۋىشتەرى بار سۋىق تيۋگە قارسى كۇشتى سۋسىن. ول بىرنەشە اپتا بويى تۇندىرىلىپ قويىلادى. ودان كەيىن ىشسە، ءسوزسىز، ميكروبتارعا جول جابىلماق! قوسپا اسا اششى بولىپ كەلگەندىكتەن، شەكتەۋلى مولشەردە، شامامەن عانا قولدانۋ كەرەك.
نوقات ۇنىنان ازىرلەنگەن دەسەرت (پاكىستان، ءۇندىستان)
instagram: @riddhirk
جارتىلاي ءتاتتى بولىپ كەلەتىن بۇل دەسەرت ءۇندىستانداعى پەندجاب شتاتىنان شىققان. ول جوتەل مەن سۋىق تيۋگە قارسى ناعىز تابيعي قوسپا. ونى نوقات ۇنى، ءسۇت، گحي مايى جانە قانت قوسۋ ارقىلى دايىندايدى. ەمدەلۋ بارىسىنداعى وتە ۇيلەسىمدى ءتاسىل: تۇماۋراتقان ادام دارى-دارمەگىن ىشسە، وتباسىنىڭ باسقا مۇشەلەرى دەسەرت جەيدى.
تاۋىق سورپاسى (يزرايل)
instagram: @lkopans
جەر شارىنىڭ تەڭ جارتىسى سۋىق ءتيۋدىڭ العاشقى بەلگىلەرى بىلىنە باستاعاننان-اق تاۋىق سورپاسىن ازىرلەۋگە كىرىسەدى دەسەك قاتەلەسپەيمىز. ءبىراق، قويۋ، ءنارلى تاۋىق سورپاسى تەك يزرايلدە عانا «ەۆرەي پەنيسيللينى» دەگەن اتاۋعا يە.
سارىمساق ءشايى (يسپانيا)
سارىمساقتان ازىرلەنەتىن بۇل ءشاي تىم كەرمەك، جاعىمسىز بولىپ قالماۋى ءۇشىن وعان بال جانە ليمون قوسىلادى. قوسپا «يسپاندىق ءدارى» دەپ اتالادى ءجان تۇماۋدان قۇتىلۋعا جاقسى كومەكتەسەدى. اتالعان قوسپانى ارتىق سالماقتان ارىلۋ ماقساتىندا دا ىشۋگە بولادى.
كەسىرتكە سورپاسى (گونكونگ)
instagram: @agrasut
بۇل تاعام تاۋىق سورپاسىنا ۇقساس، تەك، جۇڭگو نۇسقاسىندا جاسالادى. دەسە دە، اسەر ەتۋ ناتيجەسى بىردەي – سۇيىقتىق قالىپقا كەلىپ، مۇرىنمەن دەمالا باستايسىز، جوتەل جەڭىلدەيدى. كەپتىرىلگەن كەسىرتكەنى جەرگىلىكتى دۇكەندەردەن تابۋ قيىن، ونى ارنايى جۇڭگو ۇلتتىق مەديسينا دۇكەندەرىنەن كۇمانسىز تابۋعا بولادى.
قىلشا قايناتپاسى (جۇڭگو)
instagram: @dr.ginamorishige
جۇڭگو ءشوپ مەديسيناسى مىڭداعان جىلداردان بەرى بەلگىلى. قىلشا نەمەسە ما-حۋانگ – ەجەلگى دارىلىك وسىمدىك. بۇل ءشوپتى تۇتىنۋعا الەمنىڭ كوپ ەلدەرىندە تىيىم سالىنعان. سەبەبى، شامادان تىس مولشەردە قولدانۋ ەسىرتكىمەن پارا-پار. ءبىراق، اسپان استى ەلىندە سۋىق تيۋ مەن باس اۋرۋلارىن كەيدە وسى شوپپەن دە ەمدەيدى.
كوپاي بالزامى (پەرۋ)
instagram: @seed.to.sow
كوپاي اعاشىنىڭ مايى بايىرعى زاماننان بەلگىلى جانە ونى ءتۇرلى فورمادا پەرۋدىڭ ەجەلگى تۇرعىندارى قولدانعان. ول تىنىس الۋ جولدارى اۋرۋلارىنا جاقسى كومەكتەسەدى جانە كوبىندە ينگالياسيا مەن سىلاۋ كەزدەرىندە ءجيى پايدالانىلادى. كوپاي بالزامى – بىرنەشە مايلاردىڭ جيىنتىعىنان تۇرادى.
مارينادتالعان ۋمەبوسي قاراورىگى (جاپونيا)
instagram: @maruchofoods
مارينادتالعان ۋمەبوسي قاراورىگىن تۇتىنباس بۇرىن ونى كوك ءشايعا سالىپ، ءبىراز ۋاقىت ءجىبىتىپ قويۋ كەرەك. ونىڭ قۇرامىندا اسكوربين جانە ليمون قىشقىلى كوپ بولعاندىقتان، جاپوندىقتار ونى سۋىق تيۋ مەن تاماق اۋىرعان ساتتەردە پايدالانادى.
ميا كونفەتى (گوللانديا)
instagram: @jolanda4175
ميا كونفەتتەرىنىڭ ءدامى وزگەشەلەۋ، ەرەكشە بولعانىمەن، نيدەرلاندى تۇرعىندارىنا وتە قاتتى ۇنايدى. ءبىر جاعىنان دارى-دارمەك بولسا، ەكىنشى جاعىنان ءتاتتى تاعام بولا الادى. ايتۋلى كونفەتتى قىزىلميا وسىمدىگىنەن جاسايدى. ال، قىزىلميا — جوتەل مەن تاماق اۋرۋىنا قارسى جاقسى كومەكشى. بۇل كونفەتتىڭ ءدامىن سەزىنىپ كورۋ ءۇشىن اتاقتى قىزىلميا تامىرىنان ازىرلەنگەن شىرىندى ەسكە الساق، جەتكىلىكتى.
الكوگولدى شۇلىق (فينليانديا)
instagram: @ramona_reinvall
كوپشىلىگىمىز سپيرتپەن ەمدەلۋدىڭ بىرنەشە ءتۇرىن ەستىگەن بولارمىز — كومپرەسس جاساۋ، دەنەنى سىلاۋ ت.ب. ەندى ونىڭ قاتارىنا فينليانديالىق الكوگولدى شۇلىقتاردى قوسساق بولادى. ول دا وزىنشە سۋىقتان ەمدەمەك. ەم بارىسى: ۇيىقتار الدىندا شۇلىقتى سپيرتكە مالىپ، كيىپ، ونىڭ سىرتىنان قالىڭ ءجۇن شۇلىق كيىپ جاتۋ قاجەت. وسىلايشا تاڭەرتەڭ تۇرعاندا تۇماۋراتۋ بەلگىسى سەزىلمەيدىمىس.
تۇرلەندىرىلگەن كۋركۋما (ءۇندىستان)
instagram: @vegaaninni
ءۇندى مادەنيەتىندە كۋركۋما بىرنەشە تۇرلەندىرۋلەرمەن قولدانىلادى. ونىڭ ءبارى كۋركۋما قۇرامىنىڭ قابىنۋ مەن باكتەرياعا قارسى قاسيەتتەرىنىڭ ارقاسىندا. كۋركۋمانى ءشاي نەمەسە كوفەمەن ارالاستىرىپ ىشۋگە، تاعامدارعا دامدەۋىش رەتىندە قوسۋعا، ينگالياسيا جاساۋعا، ءتىپتى، ءجاي عانا قۋىرىلعان ۇنتاعىمەن دەم السا دا بولادى.
«توم يام» سورپاسى (تايلاند)
instagram: @dirafhadi
تايلىق «توم يام» سورپاسىنا پايدالى شوپتەر مەن دامدەۋىشتەر قوسىلىپ دايارلانادى. ياعني، وندا لەمونگراسس، چيلي اششى بۇرىشى مەن ءزىمبىر بار. ولار تاي حالقى ءۇشىن تىنىس الۋ جولدارى اۋرۋلارىندا العاشقى كومەك كورسەتۋشى بولىپ ەسەپتەلەدى.
سۋىق تەراپياسى (فينليانديا)
instagram: @karinapavlie
سۋىق ءتيۋدىڭ العاشقى ساتىلارىندا ەمدەلۋدىڭ فيندىك ءتاسىلى — جاقسىلاپ بالمۇزداق جەۋ نەمەس مۇزدى سۋاتقا ءتۇسۋ. سودان كەيىن جاقسىلاپ ءسۇرتىنىپ، جىلى كيىنىپ العان ءجون.
شيكى جۇمىرتقامەن ەمدەلۋ (لاتىن امەريكاسى)
instagram: @luchomiligramos
اتالعان ءتاسىلدىڭ ءتۇپ-تامىرى شامانيزمگە اپارىپ سوعادى. دەسە دە، بۇل ءادىس لاتىنامەريكالىق اجەلەر تاراپىنان ءالى كۇنگە دەيىن قولدانىلىپ كەلەدى. ياعني، ولار بالا اۋىرىپ قالسا، وعان كوز ءتيدى دەپ ەسەپتەيدى. ال كوز تيۋدەن ارىلتۋ ءۇشىن شيكى جۇمىرتقامەن ارنايى راسىمدەر جاساپ، سوڭىندا سۋى بار ستاقانعا جارىپ تاستايدى. وسىلايشا، بارلىق جاماندىقتى، زۇلىمدىقتى اشكەرەلەيدىمىس.
نەتي-پوتتىڭ كومەگىمەن شايۋ (ءۇندىستان)
instagram: @cbcthegoods
نەتي-پوت — ىشىندە مۇرىندى شايۋعا ارنالعان تۇزدى ەرىتىندىسى بار ارناي ىدىس. ءۇندىستاندا ونى مۇرىن بىتەلىپ قالعاندا، سۋىق تيۋدە جانە ولاردىڭ الدىن-الۋ ماقساتىندا پايدالانادى.
You Might Also Like
-
قوستاناي وبلىسىنداعى مەكتەپتەردە مۇعالىمدەردىڭ جوعارى ءبىلىمىن راستايتىن جالعان ديپلوممەن قىزمەت اتقارۋ دەرەكتەرى ايقىندالدى.
