الماتىدا 10 جاسار بالانى يتتەردەن قۇتقارىپ قالعان ازامات ماراپاتتالدى
الماتى وبلىسى، المالىباق اۋىلىندا بولعان توتەنشە جاعدايدا 10 جاسار بالانىڭ ءومىرىن قۇتقارىپ قالعان سەرىكبەك ساقايبەكوۆ ەرلىك تانىتتى. وقيعا بىرنەشە كۇن بۇرىن ورىن العان: كوشەدە جالعىز كەلە جاتقان بالانى قاڭعىباس يتتەر قۋىپ، شابۋىل جاساي باستاعان. ءقاۋىپتى كورگەن سەرىكبەك باتىلدىق تانىتىپ، ەش ويلانباستان كومەككە ۇمتىلىپ، بالانى يتتەردىڭ اراسىنان الىپ شىققان.
ول بالانى ءقاۋىپسىز جەرگە جەتكىزىپ، العاشقى مەديسينالىق كومەك تە كورسەتكەن. بالانىڭ ومىرىنە تونگەن ءقاۋىپ وسىلايشا سەيىلدى. كۋاگەرلەردىڭ ايتۋىنشا، ەگەر ساقايبەكوۆ دەر كەزىندە ارالاسپاعاندا، قايعىلى جاعداي ورىن الۋى مۇمكىن ەدى.
ازاماتتىڭ بۇل ەرلىگى كوپشىلىكتىڭ كوڭىلىنەن شىعىپ، جۇرتتىڭ ىستىق ىقىلاسىنا بولەندى. بەلسەندى ازاماتتى جەرگىلىكتى دەمەۋشىلەر ارنايى العىس حاتپەن جانە اقشالاي سىيلىقپەن ماراپاتتادى.
ماراپاتتاۋ راسىمىندە ءسوز سويلەگەن اۋىل تۇرعىندارى مەن قوعام بەلسەندىلەرى سەرىكبەكتىڭ بۇل ارەكەتىن – ناعىز ازاماتتىق ەرلىك دەپ باعالاپ، جاس ۇرپاققا ۇلگى ەتتى.
قازىرگى تاڭدا قاڭعىباس يتتەردىڭ كوبەيۋى مەن قاۋىپسىزدىك ماسەلەسى كۇن تارتىبىندە تۇرعانى انىق. بۇل وقيعا جەرگىلىكتى بيلىككە دە وي سالۋى ءتيىس.
سەرىكبەك ساقايبەكوۆتىڭ باتىلدىعى – ازاماتتىق جاۋاپكەرشىلىكتىڭ، ادام ومىرىنە بەيجاي قاراماۋدىڭ كورىنىسى.
You Might Also Like
-
قازاقستاندىق اۋىر اتلەت ءاليحان اسكەرباي استانادا ءوتىپ جاتقان جاسوسپىرىمدەر مەن جاستار اراسىنداعى ازيا چەمپيوناتىندا تاريحي جەتىستىككە قول جەتكىزدى. ول 61 كەلىگە دەيىنگى سالماق دارەجەسىندە قوسسايىس ...
-
گازا ايماعىندا حاماس-تىڭ ۇستەمدىگىنە قارسى باعىتتالعان جاڭا قوزعالىس قالىپتاسىپ جاتىر. ءوزىن «حالىقتىق كۇش» دەپ اتايتىن بۇل قارۋلى توپتىڭ باسىندا 30 جاستاعى ياسير ابۋ شاباب تۇر. ونىڭ ايتۋىنشا، توپتىڭ...
