InfoHub Logo

گازا ايماعىندا حاماس-تىڭ ۇستەمدىگىنە قارسى باعىتتالعان جاڭا قوزعالىس قالىپتاسىپ جاتىر. ءوزىن «حالىقتىق كۇش» دەپ اتايتىن بۇل قارۋلى توپتىڭ باسىندا 30 جاستاعى ياسير ابۋ شاباب تۇر. ونىڭ ايتۋىنشا، توپتىڭ باستى ماقساتى — گۋمانيتارلىق كومەكتىڭ ادىلەتتى ءبولىنۋىن قامتاماسىز ەتۋ.

رافاح ماڭىنداعى توپتاسقان جاساقتار سوڭعى كۇندەرى گۋمانيتارلىق جۇكتەردى كۇزەتىپ، ولاردىڭ تۇرعىندارعا جەتۋىن قامتاماسىز ەتۋگە تىرىسۋدا. الايدا بۇل ارەكەتتەر حاماس تاراپىنان قاتاڭ قارسىلىققا تاپ بولىپ وتىر. «حالىقتىق كۇشتىڭ» مالىمەتىنە قاراعاندا، حاماس ولاردىڭ جاساقتارىنا شابۋىل جاساپ، 50-گە جۋىق ەرىكتىنىڭ ءومىرىن قيدى، ولاردىڭ اراسىندا ابۋ شابابتىڭ جاقىن تۋىستارى دا بار.

اين رابين، توپ وكىلدەرىنىڭ ءبىرى، Euronews اگەنتتىگىنە بەرگەن سۇحباتىندا بىلاي دەدى:

«ءبىز قارۋلى جاساق ەمەسپىز، ءبىز ەرىكتى ازاماتتارمىز. ءبىزدىڭ ماقساتى­مىز — گۋمانيتارلىق كومەكتى ۇرلاۋعا جول بەرمەۋ. حاماس ءبىزدىڭ ارەكەتىمىزدى ءوز بيلىگىنە تونگەن ءقاۋىپ رەتىندە قابىلداپ وتىر».

ياسير ابۋ شابابتىڭ ءوزى، Makan راديوسىنا بەرگەن سۇحباتىندا، «حالىقتىق كۇش» جاساعى كەيبىر وپەراسيالاردى يزرايل اسكەرىمەن كەلىسىپ جۇرگىزەتىنىن راستادى. الايدا ونىڭ ايتۋىنشا، بۇل تەك اقپارات الماسۋ دەڭگەيىندە شەكتەلەدى:

«ءبىز قانداي دا ءبىر ايماققا كىرەتىنىمىز جايلى حابارلاپ وتىرامىز، ءبىراق اسكەري وپەراسيانى ءوزىمىز اتقارامىز. ساحال وعان تىكەلەي قاتىسپايدى».

ابۋ شاباب گازا حالقىنا ۇندەۋ تاستاپ، حاماس-تى وزبىرلىقپەن بيلىك جۇرگىزىپ وتىرعان ۇيىم دەپ سيپاتتادى جانە قاجەت بولسا، ازاماتتىق قاقتىعىسقا دا بارۋعا دايىن ەكەندىگىن جاسىرمادى.

ساراپشىلاردىڭ ايتۋىنشا، ونىڭ اشىق مەدياعا شىعۋى — بۇل توپتىڭ ەندى تەك جەرگىلىكتى ارەكەت ەتۋشى جاساق ەمەس، ساياسي ىقپالى بار قۇرىلىمعا اينالا باستاعانىن كورسەتەدى.

ال حاماس «حالىقتىق كۇشتى»» ساتقىندار توبى رەتىندە سيپاتتاپ، ونى تولىق جويۋعا باعىتتالعان وپەراسيالار جۇرگىزىپ جاتىر. گازا تۇرعىندارىنىڭ پىكىرى ەكىگە ءبولىندى: ءبىرى بۇل توپتى «ساتقىن» دەسە، ەندى ءبىر بولىگى ولاردى حاماس-تان قۇتقارۋشى رەتىندە قولدايدى.