ءبارىن دە كوردىڭىزدەر،
بارىنە كوندىڭىزدەر،
بارىنە سەندىڭىزدەر،
ءبارىن ڭە بەردىڭىزدەر،
سىزدەر الپىسقا كەلدىڭىزدەر.
مەنىڭ دە اكەم كەلەر ەدى الپىسقا،
امال نەشىك، جوق بوپ كەتتى تارتىستا.
امال نەشىك، سەلدىر ساقال قارت ۇستا،
اۋىلىندا جۇرەر ەدى بالتا ۇستاپ.
سوعىس، سوعىس... سوعىس جاۋى جەر-كوكتىڭ،
سونى ءبىلىپ، سوعىسقا جول بەرمەك كىم؟!
ەگەر سوناۋ قاندى مايدان بولماسا،
جۇرەر ەدى توپاي كوگى ەڭبەكتىڭ.
جاقسى كۇننىڭ راقاتىن سەزىپ تەك،
نەمەرەمەن ساۋىق قۇرىپ، كەزىپ كەپ،
قايران قارتىم وتىراتىن ەدى عوي،
ولەڭىمدى وقي الماي ەجىكتەپ.
مەن ەگىنسىز قالدىرعىم جوق دالامدى،
مەن كومۋسىز قالدىرعىم جوق انامدى،
مەن اكەسىز قالدىرعىم جوق بالامدى،
ەشقاشان دا ولتىرگىم جوق ادامدى.
الپىسقا كەلدىڭىزدەر،
ءبارىن دە كوردىڭىزدەر.
بارىنە سەندىڭىزدەر،
ءبارىن دە بەردىڭىزدەر.
الپىسقا كەلسەك ەكەن ەندى بىزدەر..

---