InfoHub Logo

تاقىرىبى: ءان - كۇي - حالىق قازىناسى.
ماقساتى:
ا) ءداستۇرلى ونەر تۇرلەرىن وقىتىپ، ۇيرەتۋ ارقىلى وقۋشىنىڭ ۇلتتىق پسيحولوگياسىن قالىپتاستىرۋ. ءان - كۇي، بەينەلەۋ ونەرى، ەڭبەككە باۋلۋ پاندەرىنىڭ بايلانىسى ارقىلى ونەرگە باۋلۋ.
ءا) ءان - كۇي تاريحىنا توقتالا وتىرىپ، وسى سالاداعى تاريحي تۇلعالاردى ۇلگى تۇتىپ، تۋعان جەردى سۇيۋگە تاربيەلەۋ.
ب) وقۋشىلاردىڭ اۋەندى ءتۇسىنىپ، سەزىنە ءبىلۋىن، ەستە ساقتاۋ، قيالداۋ، ويلاۋ قابىلەتتەرىن ارتتىرۋ.
كورنەكىلىگى: ءاننىڭ اۋەندەرىنەن ۇزىندىلەر، ءان مازمۇنىن بەينەلەيتىن سۋرەتتەر سلايدى. قۇرمانعازى، دينانىڭ پورترەتتەرى. كيىز ءۇيدىڭ ماكەتتەرى.
ءتۇرى: ويىن ساباق (توپتىق جارىس)
باعدارلاماسى: 1) اۋەندى تاپ ويىنى.
2) مۋزىكالىق تەرميندەر.
3) سىرلى دا سازدى اۋەن.
4) كۇي - كۇيشى، ءان مەن ءانشى
5) قورىتىندىلاۋ

ساباقتىڭ بارىسى:
ۇيىمداستىرۋ ءبولىمى: كەڭ زال ءىشى كۇمبىرلەگەن كۇيگە تولى. سىنىپ بەزەندىرىلىپ، وقۋشىلار 2 توپقا ءبولىنىپ جايعاسادى. ءار توپتىڭ الدىنا سيگنالدىق بەلگى بەرۋ قۇرالى قويىلادى.
ءمۇعالىمنىڭ كىرىسپە ءسوزى: بالالار، «ءان - كۇي - حالىق قازىناسى» اتتى سايىس ساباعىمىزعا قوش كەلدىڭىزدەر! بۇگىن سىزدەر مۋزىكا ءپانى بويىنشا العان بىلىمدەرىڭىزدى ورتاعا سالىپ، سايىسقا تۇسكەلى وتىرسىزدار. بارشاڭىزعا ساتتىلىك
تىلەي وتىرىپ، ويىن ساباعىمىزدى جالعاستىرۋدى جۇرگىزۋشىلەرگە تاپسىرامىن.
ورتاعا جۇرگىزۋشىلەر شىعادى.
1 - جۇرگىزۋشى: ءان بارادى اينالىپ گۇل دالانى،
تاڭ سامالى تولقيدى جىلعاداعى
اعىسىنان تىنبايتىن تىرشىلىكتىڭ
جايناتادى دالاسىن نۇر جانارى.
2 - جۇرگىزۋشى: ءان اۋەندە توگىلەدى بۇگىن ءبىر ءۇن
تاراتقانداي الەمگە عۇمىر نۇرىن.
ساندۋعاشتاي سايرايدى سەرپىپ تاستاپ
اسپاننىڭ كوك كۇمبەزدى شىمىلدىعىن.
ەكەۋى بىرگە: «ءان - كۇي - حالىق قازىناسى» اتتى سايىسىمىزعا قوش كەلدىڭىزدەر!
سايىسىمىزدىڭ العاشقى «اۋەندى تاپ» كەزەڭىن باستايمىز. بۇل كەزەڭنىڭ شارتى: مەكتەپ باعدارلاماسىندا بەرىلگەن حالىق اندەرىنىڭ جانە بالالار اندەرىنىڭ اۋەنى ءار توپتىڭ تاڭداۋى بويىنشا ورىندالادى. سول اۋەندى قاي توپ ءبىرىنشى بولىپ تاپسا سول توپ 5 ۇپاي الادى.
1 - جۇرگىزۋشى: ءان اۋەنىن تابىڭدار
ءبارىڭ بەرمەن كەلىڭدەر!
بۇل قىزىقتى ويىندى
تاماشالاپ كورىڭدەر.
2 - جۇرگىزۋشى: ەش قيىنى جوق مۇنىڭ
سازىن بىلسەڭ ولەڭنىڭ
تۇسىنسەڭىز بولعانى
قۇدىرەتىن ونەردىڭ.
بۇل ويىننان قاشپايىق
اۋەنىن تاۋىپ تاستايىق
ءازىر بولساق ءبارىمىز
ال ويىندى باستايىق!
(ويىن سوڭىندا ۇپاي سانى ەسەپتەلەدى.)

2 - كەزەڭ «مۋزىكالىق تەرميندەر»
شارتى: ەكراندا مۋزىكا ءپانى بويىنشا سۇراقتار جانە جاۋابىنىڭ 3 نۇسقاسى بەرىلەدى. قاي توپ دۇرىس نۇسقاسىن ءبىرىنشى بولىپ تاپسا 10 ۇپايعا يە بولادى.

سۇراقتارى:
1. قاي ءان تۇرمىس - سالت ءانى؟
ا) قاراتورعاي
ءا) ەلىم - اي
ب) بەسىك جىرى
2. ءاندى شىعارۋشى ادام:
ا) اقىن
ءا) جىراۋ
ب) كومپوزيتور
3. قوسالقا كۇيىنىڭ اۆتورى كىم؟
ا) قۇرمانعازى
ءا) داۋلەتكەرەي
ب) قورقىت
4. قايسىسى ۇرمەلى اسپاپ؟
ا) جەتىگەن
ءا) شاڭقوبىز
ب) سازسىرناي
5. وركەستردى باسقارۋشى ادام:
ا) ءانشى
ءا) ديريجەر
ب) كۇيشى
6. ساحنالانىپ، ءان ايتىلىپ، بي بيلەنەتىن ەرتەگى:
ا) پەسا
ءا) ۆالس
ب) وپەرا
7. كوپ ادامنىڭ بىرىگىپ ءان ايتۋى:
ا) كونسەرت
ءا) حور
ب) دۋەت
8. مۋزىكا تىلىندە دىبىستىڭ وتە قىسقا، جەڭىل ورىندالۋى:
ا) فەرماتا
ءا) ستاككاتو
ب) كرەششەندو
9. «كوكشولاق» ءانىنىڭ اۆتورى كىم؟
ا) كەنەن ازىربايەۆ
ءا) يبراگيم نۇسىپبايەۆ
ب) جاياۋ مۇسا
10. قۇرمانعازىنىڭ شاكىرتى بولعان كۇيشى:
ا) دينا
ءا) سارمالاي
ب) ىقىلاس
(ويىن سوڭىندا ۇپاي سانى ەسەپتەلەدى)

3 - كەزەڭ «سىرلى دا سازدى اۋەن»
ءمۇعالىم:- بالالار ءاربىر ءاننىڭ، اۋەننىڭ وزىنە ءتان مازمۇنى، ءمانى بار. ءان جايدان جاي شىقپايدى. وعان بەلگىلى ءبىر تاريحي وقيعا، كوڭىل كۇي اسەر ەتەدى.
سونىڭ سالدارىنان ءانشىنىڭ كوكەيىنەن ءان تۋىنداپ، سول وقيعانى بەينەلەيدى.
- ال، سەندەر قالاي ويلايسىڭدار تاعى قانداي ونەر يەلەرى ءوز ويلارىن بەينەلەپ كورسەتە الادى؟
- اقىندار، سۋرەتشىلەر، مۇسىنشىلەر، ساۋلەتشىلەر ت. ب.
- دۇرىس ايتاسىڭدار، بالالار، ءبىزدىڭ ەندىگى كەزەڭىمىز ءانشى مەن سۋرەتشى اراسىنداعى بايلانىس تۋرالى بولماق. ءانشى ءوز ويىن ءان ارقىلى جەتكىزسە، سۋرەتشى بەينەلەۋ ارقىلى ياعني قىلقالام ارقىلى جەتكىزەدى.
- قانداي اتاقتى سۋرەتشىلەردى بىلەسىڭدەر؟
- ق. تەلجانوۆ، گ. يسمايىلوۆا، ءا. قاستەيەۆ ت. ب.(پورترەتتەرى بويىنشا اڭگىمەلەسۋ)
بۇل كەزەڭنىڭ شارتى: سۋرەتشىلەردىڭ سالعان سۋرەتتەرى كورسەتىلەدى. سول سۋرەتتەردىڭ وزدەرىڭ بىلەتىن قانداي انگە قاتىستى بەينەلەنگەنىن تابۋ. قاي توپ ءبىرىنشى تاپسا سول توپ ءار دۇرىس جاۋاپ ءۇشىن 10 ۇپاي الادى.
تومەندەگى اندەرگە ساي بەينەلەنگەن سۋرەتتەر كورسەتىلەدى.
1. قاماجاي 5. الاتاۋ
2. مەكتەبىم 6. شىرشا ءانى
3. اقساق قۇلان 7. جەتىم بالا
4. ورتەكە 8. بەسىك جىرى.
(ويىن سوڭىندا ۇپاي سانى ەسەپتەلەدى)

4 - كەزەڭ «كۇي - كۇيشى، ءان مەن ءانشى»
- بالالار، سەندەر مۋزىكا ءپانى ارقىلى كوپتەگەن كۇيشىلەردى، كومپوزيتورلاردى، اۋەلەتە ءان سالعان انشىلەرمەن تانىس بولدىڭدار. قانداي
اتاقتى كومپوزيتورلاردى، كۇيشى، انشىلەردى بىلەسىڭدەر؟
- قۇرمانعازى، دينا، تاتتىمبەت، ىقىلاس، قورقىت، جاياۋ مۇسا، اقان، ءبىرجان ت. ب.
- دۇرىس ايتاسىڭدار، ەندەشە سەندەردىڭ الدارىڭدا وسىنداي دارىندى دا تالانتتىلار شىققان قازاق دالاسى بەينەلەنگەن.
كەلەسى كەزەڭىمىزدىڭ شارتى:
وسى دالانىڭ كورىنىسىن تويلى اۋىلعا اينالدىرۋ. ول ءۇشىن جايلاۋعا اتا - بابامىزدان مۇرا بولىپ قالعان كيىز ۇيلەردى تىگىپ، ويۋ - ورنەكتەرمەن بەزەندىرەمىز. ول ويۋ - ورنەكتەردىڭ ءبىر جارتىسىنا كۇيشى، كومپوزيتورلاردىڭ اتتارى جازىلعان ال ەكىنشى جارتىسىنا توپ مۇشەلەرى شىعارماسىنىڭ اتىن جازىپ كيىز ۇيلەرگە جاپسىرادى. قاي توپ ءبىرىنشى اياقتاسا سول توپ 30 ۇپاي الادى.
(كەشتىڭ سوڭىندا بارلىق كەزەڭنىڭ ۇپايلار سانى انىقتالىپ، جەڭىمپاز توپ ماراپاتتالادى.)
سايىس «ءان ساباعى» انىمەن اياقتالادى.