InfoHub Logo

ادامنىڭ «امال - ايلاسى» كوپ جاعىدايدا سويلەگەن سوزىنەن بەينەلەنىپ وتىرادى، كەيبىرەۋلەرى انت-سۋ ءىشىپ، اۋزىمەن وراق ورىپ، كەز كەلگەن جەردە ۇادە بەرىپ جاتادى، ناتيجەدە ونداي ادامنىڭ ارەكەتى كوپ تە، بەرەكەتى از، ەلگە دە جەك كورىنىشتى بولادى، ازابى كوپ تە القاۋى جوق بولىپ تاباننان تۇرادى.

ادامنىڭ «ايلاسى» سويلەگەن سوزىنەن اق بەلگىلى بولادى، «ايلاكەر» ادام اۋزىنا كەلگەندى كوكىمەيدى. ءبىراق، سويلەي ءبىلۋ دە وڭاي شارۋا ەمەس، ءسوز سويلەۋ ونەرىنە ۇزاق ۋاقىت بارىسىندا كوپ جاتتىعۋ ارقىلى عانا جەتىلۋگە بولادى.

بىرەۋ ساعان «سويلەي الاسىڭ با؟» دەسە، ساعا كۇلكىلى سەزىلەتىن شىعار. اقىل ەسى دۇرىس ادامنىڭ سويلەي المايتىنى بولۋشى ما ەدى؟ ءىس جۇزىندە ماسەلە ونداي قارا ءدۇرسىن ەمەس. اۋزى بار ادامنىڭ ءبارى دە سويلەي الادى، ءبىراق، كەيبىرەۋلەر ءسوز سويلەگەندە «امال ايلا» قاراستىرمايدى، اۋزىن باقپاي، ءسوز دەگەنىڭدى اۆتوماتتىڭ وعىنداي جاۋدىرىپ جاتادى، ءوز كوڭىلى جادىراسا بولعانى وزگەنىڭ كوڭىل - كۇيىمەن مۇلدەم ساناسپايدى.

ەندەشە، كۇلكىلى جايتقا توقتالىپ وتەلىك.
بىرەۋ ۇيىنە قوناق شاقىرىپتى، شاقىرىلعان ءتورت ادامنىڭ ۇشەۋى الدىمەن كەلىپتى. توسا-توسا تاعاتى تاۋسىلعان ءۇي يەسى: «قاپ، كەلۋگە ءتيىستى ادامنىڭ كەلمەي قالعانى-اي» دەيدى وزىنە ءوزى كۇبىرلەپ. مۇنى قۇلاعى شالىپ قالعان قوناقتىڭ بىرەۋى: «بۇلاي بولعاندا، كەلمەۋگە ءتيىستى ادام مەن بولسام كەرەك» دەن ويلاپ قوش ايتىپ كەتىپ قالادى. ساسقالاقتاعان ءۇي يەسى: «كەتپەۋگە ءتيىستى ادامنىڭ كەتىپ قالعانىن قاراشى» دەيدى. «سوندا كەتۋگە ءتيىستى بولسام دا كون بەتتەنىپ وتىرىپ العان مەن بولدىم عوي؟» دەپ وكپەلەگەن ەكىنشى قوناق تا ورنىنان تۇرىپ، جولىنا تۇسەدى. ءۇي يەسى ءۇشىنشى قوناققا: «ولار جاڭساق ءتۇسىندى، مەنىڭ ايتىپ وتىرعانىم ولار ەمەس..........» «ايتىپ وتىرعانى ولار بولماسا، مەن بولدىم عوي» دەپ ويلاعان ءۇشىنشى قوناق تا ءۇي يەسىنىڭ ءسوزى اياقتاماي جاتىپ كەتە بەرەدى.

اڭعارماي سويلەگەن ءسوز بىرەۋدىڭ ساعىن سىندىرۋى، جاڭساق ۇعىم تۋدىرۋى، ءبىر پالەگە ۇرىندىرۋى مۇمكىن. سوندىقتان، ءبىز ءسوزدى ورىنعا، جاعدايعا قاراي سويلەۋگە نازار اۋدارا ءبىلۋىمىز كەرەك.
ءسوز ونەرى بالالار ءۇشىن قيىن ەمەس، ۇيتكەنى، بالا نەنى ويلاسا سونى ايتادى، ال، ەرەسەكتەر ءۇشىن قيىن جۇمىس.
«باسقا پالە تىلدەن» دەگەن ءتامسىل بار، «ءتىل – سايتاننان دا ءازازىل.... ىزگى نيەتتى ادامدار ءسوز سويلەۋدەن بۇرىن ويلانىپ – تولعانىپ السىن دەپ تىلگە توسقاۋىل ءتىس، قاقپاق قىلىپ ەرىن جاراتقان. اڭعارماي سويلەگەن، اۋىرماي ولەدى». مۇنىڭ ءمانىسى ءسوز سويلەۋدەن بۇرىن ويلانىپ ال، ءوز سوزىڭە ءوزىڭ يە بول، قاتە سويلەپ ەلگە كەسىرىڭدى تيگىزبە دەگەن ءسوز.

ءتىل - جۇرەكتىڭ جارشىسى. ويدىڭ بيلەۋىندە بولىپ وتىراتىن ءتىل - ءبىر ادامنىڭ مىنەز قۇلقىنىڭ ساۋلەسى. ءوز تىلىڭە ءوزىڭ يە بولماۋ، لاعىپ سويلەۋ، وسەك اياڭ تاراتىپ بىرەۋدى پالەگە جولىقتىرۋ سياقتىلاردىڭ ءبارى ادەپكە جات.
ءوز تىلىنە ءوزى يە بولا ءبىلۋ – ەڭ ۇلكەن تابىس!