InfoHub Logo

17 ناۋرىزدا سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات ءجۇماعاليدىڭ باسشىلىعىمەن جەدەل كەڭەس ءوتتى. كەزدەسۋدە ۇلتتىق قۇرىلتايدىڭ 4ء-شى وتىرىسىندا مەملەكەت باسشىسى بەرگەن تاپسىرمالاردىڭ ورىندالۋى تالقىلاندى.

اگەنتتىك «زاڭ جانە ءتارتىپ» يدەولوگياسىن ەنگىزۋدى جالعاستىرۋعا باسىمدىق بەرەدى. بۇل قوعامدا قۇقىق بۇزۋشىلىققا، اسىرەسە سىبايلاس جەمقورلىققا توزبەۋشىلىك قالىپتاستىرۋعا باعىتتالعان. سونداي-اق، «ادال ازامات» تۇجىرىمداماسى اياسىندا ازاماتتاردى سىبايلاس جەمقورلىققا قارسى وقىتۋ جانە پاتريوتتىق تاربيەگە ەرەكشە كوڭىل بولىنەدى.

جەمقورلىق تاۋەكەلدەرىن ازايتۋ ءۇشىن سيفرلاندىرۋ مەن جاساندى ينتەللەكت ەنگىزۋ جۇمىستارى جالعاسادى. «سيفرلىق تەڭگە» ارقىلى قارجى قوزعالىسىن باقىلاۋ، ءبىلىم سالاسىندا «بۇلتتى بۋحگالتەريا» ەنگىزۋ، «ە-سپورت» جانە «ە-Qurylys» سەكىلدى اقپاراتتىق جۇيەلەر مەملەكەتتىك قاراجاتتىڭ ماقساتسىز جۇمسالۋىنا توسقاۋىل بولۋعا ءتيىس.

ەنەرگەتيكا، اگروونەركاسىپ، كولىك جانە تۋريزم سالالارىنداعى جەمقورلىق تاۋەكەلدەرى ەرەكشە نازارعا الىنۋدا. بۇل سالالار ەكونوميكانىڭ تۇراقتى دامۋىنا ۇلكەن مۇمكىندىك بەرەدى. اگەنتتىك وسى باعىتتار بويىنشا تالداۋ جۇرگىزىپ، انىقتالعان تاۋەكەلدەردى جويۋ جونىندە ۇسىنىمدار ەنگىزدى.

پرەزيدەنت اتاپ وتكەندەي، جىل سايىن جاڭا ينۆەستيسيالىق جوبالار ىسكە قوسىلىپ، قوماقتى بيۋدجەت قاراجاتى بولىنەدى. سوندىقتان انتيكور مەملەكەتتىك قاراجاتتىڭ ءتيىمدى ءارى نىسانالى پايدالانىلۋىن قامتاماسىز ەتۋگە كۇش سالماق.