اپكە
مەنىڭ ءتورت اپكەم بار. ەڭ كىشىسى مەنەن ءبىر-اق جاس ۇلكەن. ەكەۋمىز ءبىر سىنىپتا وقىدىق. مەن بىرىنشىگە بارعاندا ءۇيىمىز كىشكەنتاي تەمىر جول ستانساسىندا ەدى. ون ءۇش شاقىرىم جەردەگى مەكتەپكە اۋىل بالالارى ەسەكپەن قاتىنايمىز. شەشەم تاڭ الاگەۋىمدە تۇرعىزادى. تۇرا سالىپ، اكەمنىڭ ۇيرەتكەنىندەي ەسەكتى ءوزىم ەرتتەيمىن. كورشى بالالاردىڭ اۋىلدان شىعىپ بارا جاتقانىن كورگەندە، ەسەككە ىرعىپ ءمىنىپ، ءۇي جانىندا شۇبەرەك سومكەسىن اسىنىپ تۇرعان اپكەمنىڭ الدىنا كەلىپ كولدەنەڭدەيمىن، ول ەردىڭ ارتىنا مىنگەسەدى. "ال، تايشىق، تارت قانە" دەيمىن جىرداعى باتىرلارشا تەبىنىپ. تايشىق مەنىڭ ەسەگىمنىڭ اتى. الپامىس باتىرمەن سوعىسقان قالماق حانىنىڭ ەسىمى بۇل. اقجەم جولعا ءبىر ءتۇسىپ العان تايشەكەڭ ادەتىنشە باسقالاردان العا وزادى. قۇرعاپ قالعان سازداۋىت سايدان وتە بەرگەندە ەسەگىم جەڭىلدەنىپ قالعانداي ىتقي جونەلەدى. تىزگىندى تارتىپ، كەيىن بۇرىلامىن، اپكەم ادەتتەگىدەي كەسەك-كەسەك كەپكەن ساز بالشىقتان قالتاسىن تولتىرىپ، جۇگىرىپ كەلە جاتادى. قاباقتى قارس ءتۇيىپ، ەسەگىمدى كولدەنەڭدەتەمىن، ىرعىپ مىنەدى. قايتادان جولعا تۇسەمىز. اپكەم ساز كەسەكتى قىتىرلاتا جەپ وتىرادى.
تومەنگى سىنىپتا جۇرگەندە مۇعالىمدەر ماعان ۇرىسسا، ەرەسەك بالالار تيىسسە، الدىمەن اپكەم جىلاپ قويا بەرەدى، ونى كورىپ، كەيدە مەن دە جىلايمىن...
مەنەن كەيىنگى ءىنىم ءومىر جاسىنان تالما اۋرۋلى بولدى. سەكسەنىنشى جىلدارى دۇنيەدەن وزدى. ال بىزدەن ءۇش ءجۇز شاقىرىم قاشىقتاعى مالدى اۋىلدا تۇراتىن اپكەمدەرگە حابار "تەمىر قايتىس بولىپتى" دەگەن سىڭايدا جەتكەن. ءبىر كەزدە بوتاداي بوزداپ اپكەم جەتتى. سونادايدان "بىرگە ويناپ، بىرگە وقىپ ەدىم، قۇداي ەندى سەنەن دە ايىردى-اۋ، باۋىرىم. تەمىرىم"، — دەپ جىلايدى. ءۇيدىڭ ءىشى دە ابىر-سابىر. "ول ءىنىڭ ەمەس، ودان كىشىسى" دەمەك بولعانداردى تىڭدار ەمەس، مەنىڭ اتىمدى جىلاۋعا قوسىپ اڭىراتتى دەرسىز. بىرەۋلەر ماعان ىم قاققان سوڭ، شىداي الماي ەسىكتەن مەن كورىنبەيمىن بە. ۇشىپ تۇرىپ، قۇشاقتاپ الىپ بوساتار ەمەس، ءوزى جىلاپ ءجۇر.
اپكەم ءقازىر قىزىلتوبەدە تۇرادى. ۇلىن ۇياعا، قىزىن قياعا قوندىرا باستاعان كوپ بالالى انا. الىگە دەيىن تاي-قۇلىنداي تەبىسىپ وسكەن مەن دەگەندە ءىلتيپاتى ەرەكشە. بىردەڭە بولسا، قاناتىمەن سۋ سەپكەن قارلىعاشتاي بولىپ، الدىمەن جەتەتىن دە سول اپكەم مەنىڭ...
You Might Also Like
-
قانداي قوعامدىق قۇرىلىس بولماسىن ەكونوميكا نەگىزىن قۇرايدى. ەلىمىزدى جەتپىس جىل بويى بيلەپ كەلگەن كەڭەستىك جۇيە كەلمەسكە كەتىپ، تاۋەلسىزدىك نارىقتىق قاتىناستاردى الا كەلدى. "قولى قيمىلداعاننىڭ...
-
بىردە ىسساپارمەن الماتىعا جول تارتتىم. جولاۋشىلار پويىزىنىڭ كۋپەلى ۆاگونىنا قۇلسارىدان ءبىر تۇرىك جىگىتى وتىردى.
