InfoHub Logo

بۇل سوناۋ ەرتە زاماندا بولعان ەكەن. ول كەزدە سوعىستىڭ نە ەكەنىن ەشكىم بىلمەپتى. بىرەۋدى-بىرەۋ ولتىرمەيدى ەكەن. كەدەي دە، باي دا، ساراڭ دا بولماپتى.

         كۇندەردىڭ ءبىر كۇنى جاقسىلىق دەگەن كىسىنىڭ ايەلى ۇل تاۋىپتى. شىلدەحاناعا كوپ ادام جينالىپتى. ديۋانا دا كەلىپتى. ديۋانا ءسابيدىڭ بەتىنە قاراپ:

         — مىنا بالا تۇبىندە جۇرتقا پالە بولىپ جۇرمەسە نە قىلسىن، – دەپتى.

         جىل ارتىنان جىل ءوتىپتى. بالا ءوسىپ ەر جەتەدى. وسكەن سايىن ساراڭدىعى دا ارتا بەرەدى. دۇنيەگە قوماعايلانىپ، ەكى كوزى قانتالاپ قارايتىن بولادى.

         پىشاق، شوت، بالتا سەكىلدى وتكىر زاتتارعا اۋەس بولىپ الادى. مۇنداي زاتتارىن جۇرت ودان جاسىراتىن ادەت تاۋىپتى.

         كۇندەردىڭ ءبىر كۇنىندە ساراڭ بالا وزىنە ساداق پەن جەبە جاساپ الادى دا قارتايعان اكە-شەشەسىن قۋىپ جىبەرەدى. دالاداعى اڭدار مەن قۇستاردىڭ ءبارى مەنىكى بولسا دەپ ارماندايدى.

         ءبىر كۇنى ول قىرعا شىعادى. كوكتەم كەزى ەكەن. كۇن جارقىراپ، قۇستار سايراپ، جەر ءجۇزى قۇلپىرىپ تۇرادى. ساراڭ قاراسا باعىنداعى الما اعاشىندا كوگەرشىن قوناقتاپ وتىر ەكەن. ول: "مەنىڭ الما اعاشىما قوناقتاپ وتىرعان كوگەرشىن دە مەنىكى بولۋ كەرەك" - دەيدى. سويتەدى دە كوگەرشىندى كوزدەپ، ساداعىمەن اتۋعا ىڭعايلانادى. ءدال سول كەزدە كەنەتتەن اق كوگەرشىن عايىپ بولىپ كەتەدى دە، ونىڭ ورنىندا ساقالدى ءوزىنىڭ اكەسىنىڭ وتىرعانىن كورەدى. ساراڭنىڭ قولى سالق ەتىپ تومەن ءتۇسىپ كەتەدى. مىنە قىزىق. الما اعاشىندا تاعى دا اق كوگەرشىن وتىر. ساراڭ ساداعىن تاعى كوتەرەدى دە اكەسىنىڭ اعاشتا وتىرعانىن تاعى كورەدى. ىزا بولعان ساراڭ ەندى اي-جايعا قارامايدى. ساراڭدىعى  "ات، ات" - دەپ قىستايدى دا، اتىپ جىبەرەدى. سول كەزدە الما اعاشىنىڭ تۇبىنە سىلق ەتىپ ءوزىنىڭ اكەسى قۇلاپ تۇسەدى. ال اق كوگەرشىن شارىقتاپ ۇشىپ كەتەدى. بىرەۋدى-بىرەۋ ولتىرەتىن سۇمدىق وقيعا جەر بەتىندە تۇڭعىش رەت وسىلاي باستالعان ەكەن دەيدى.

قارت اكەنىڭ قانى الما اعاشىنىڭ اپپاق گۇلىنە شاشىرايدى. سودان بەرى الما اعاشى اق تۇسپەن گۇلدەمەي قىزعىلتتانىپ گۇلدەيدى ەكەن. ال اق كوگەرشىن سودان بەرى ەشۋاقىتتا اعاشقا قوناقتامايتىن بولىپتى. كوگەرشىن كوزىنىڭ قىزىل بولۋىنىڭ سەبەبى دە جەرگە تامعان ادام قانىن كورۋمەن ەكەن دەيدى.

---