يت پەن مىسىق نەگە اراز؟
ەرتەدە يت پەن مىسىق وتە تاتۋ بولعان ەكەن. ەكەۋىن دە ادام اسىراپ، ۇيىندە ۇستاپتى.
كۇندەردىڭ ءبىر كۇنىندە ءبىر ادامنىڭ ماي سىڭگەن تەرى دورباعا سالىپ ساقتاپ جۇرگەن التىنى جوعالادى. قانشا ىزدەسە دە تابىلمايدى. التىننان ايىرىلعان ادامنىڭ كۇيى تايىپ، جۇدەۋلەنە باستايدى. تاپقان-تايانعانى ىشىپ-جەۋگە جەتپەۋگە اينالادى. مۇنى كورگەن يت پەن مىسىق قاتتى قىنجىلىپ، قوجاسىنىڭ جوعالعان التىنىن ىزدەۋگە كىرىسەدى. ەكەۋى وي-قىردى ارالاپ، بارماعان تاۋى، باسپاعان جەرى قالمايدى. اقىرى تيتىقتاپ، ۇيلەرىنە قايتادى.
يت پەن مىسىق ۇنجىرعاسى ءتۇسىپ، ءۇنسىز كەلە جاتقاندا، كەنەت قوجاسىنىڭ ماي سىڭگەن دورباسىنىڭ ءيىسى مۇرىندارىن جارىپ جىبەرە جازدايدى. قۋانعاننان يت قىڭسىلاپ، مىسىق مياۋلاپ جىبەرەدى.
يت اينالا جۇگىرىپ، تىمىسكىلەپ، اقىرى ءبىر تىشقاننىڭ ءىنىن تىرنالاپ قازا باستايدى. مىسىقتىڭ قۋانىشى قوينىنا سىيماي، اڭدىپ قاراپ وتىرا بەرەدى. يت كوپ ازاپتانىپ، تىشقان ءىنىنىڭ تۇبىنە جەتسە، التىن سالىنعان مايلى دوربانى تىشقان تىعىپ قويعان ەكەن.
يت:
— مىنانى كوردىڭ بە؟ – دەپ، التىندى مىسىقتىڭ الدىنا لاقتىرىپ تاستايدى. مىسىق سول كەزدە يەسىنە جاقسى اتانباق بولىپ، يتتەن بۇرىن التىندى الا قاشادى. مىسىق ءۇي-ۇيدىڭ توبەسىمەن قارعي جۇگىرىپ، يەسىنە جەتەدى دە التىندى تاستاي سالادى. مۇنى كورىپ، قوجاسى قۋانىپ كەتەدى. مىسىقتى باۋىرىنا باسىپ، ايمالاي بەرەدى. ءسويتىپ تۇرعاندا، قارا تەرگە ءتۇسىپ، سابالاق-سابالاق بولىپ، ارسالاڭداپ يت تە جەتەدى. كەلگەن بويدا قوجاسىنىڭ اياعىنا ورالىپ، قىڭسىلاي ەركەلەيدى. ەشتەڭەنى تۇسىنبەگەن ول ءيتىن تەۋىپ، جەكىرىپ قۋىپ تاستايدى. ءجابىر كورگەن يت ىزالانىپ، مىسىققا تاپ بەرەدى. قوجاسى اراشالاپ، ەكەۋىن زورعا ايىرىپ الادى دا مىسىقتى ۇيىنە الىپ كەتەدى. سول كۇننەن باستاپ ءيتتى ۇيىنە جولاتپايدى.
مىنەكي، سودان بەرى يت پەن مىسىق بىرىمەن ءبىرى اراز بولىپ قالىپتى. مىسىقتىڭ تىشقانعا وشتەسۋى دە سول كۇننەن باستالىپتى.
You Might Also Like
-
ەرتە زاماندا سيىر سىزىلعان كەربەز، سۋىرىلا شاپقان جۇيرىك بولىپتى. ءارى اسقان تاكاپپار، ماقتانشاق تا ەكەن.
-
بۇل سوناۋ ەرتە زاماندا بولعان ەكەن. ول كەزدە سوعىستىڭ نە ەكەنىن ەشكىم بىلمەپتى. بىرەۋدى-بىرەۋ ولتىرمەيدى ەكەن. كەدەي دە، باي دا، ساراڭ دا بولماپتى.
