InfoHub Logo

اقش-تىڭ ارنايى وكىلى كەيت كەللوگ ۋكرايناداعى قاقتىعىس پەن رەسەيگە قارسى جوسپارلار تۋرالى ءبىرقاتار مالىمدەمە جاسادى،- دەپ حابارلايدى Infohub.kz.

اقش-تىڭ ارنايى وكىلى كەيت كەللوگ سوڭعى مالىمدەمەلەرىندە ۋكراينا مەن رەسەي اراسىنداعى سوعىسقا بايلانىستى ءبىرقاتار ماڭىزدى ۇسىنىستار مەن ىقتيمال ارەكەتتەردى جاريا ەتتى. ونىڭ سوزىنشە، باتىس ەلدەرى قاقتىعىستى رەتتەۋگە باعىتتالعان ناقتى جوسپارلاردى تالقىلاپ جاتىر.

بەيبىت رەتتەۋ جوسپارى:

ۇلىبريتانيا، فرانسيا، گەرمانيا جانە پولشا بىرلەسىپ، «E3» دەپ اتالاتىن اسكەري كۇشتەردى دنەپر وزەنىنەن باتىسقا قاراي ورنالاستىرۋدى كوزدەپ وتىر. بۇل كۇشتەر ۇرىس ايماعىنان الشاق تۇرادى، ال شىعىستا ورنالاساتىن بىتىمگەرلىك كۇشتەر قاقتىعىستىڭ قايتا باستالۋىنا جول بەرمەۋ ءۇشىن مونيتورينگ جۇرگىزەدى.

ۋكراينا مەن رەسەي اراسىنداعى كەلىسسوزدەر تىزبەگى پاريج بەن لوندوندا تالقىلانعان. كەللوگتىڭ ايتۋىنشا، ەگەر بۇل ۇسىنىستار جۇزەگە اسسا، بەيبىتشىلىك ورناتۋعا بولادى.

ىستامبۇلدا وتەتىن كەلىسسوزدەردە سوعىس ارەكەتتەرىن بارلىق مايداندا — اۋە، جەر، تەڭىز جانە ينفراقۇرىلىمدا — توقتاتۋ ماسەلەسى قارالادى.

سونداي-اق لۋگانسك، دونەسك، حەرسون جانە زاپوروج وبلىستارىنىڭ مارتەبەسى، زاپوروج اەس-ىنىڭ تاعدىرى، مايدان شەبىندە اتىستى توقتاتۋ، ۋكراينادان اكەتىلگەن بالالاردى قايتارۋ جانە ەۋرووداققا مۇشەلىك تاقىرىبى تالقىلانباق.

قاتاڭ سانكسيالىق قىسىم:

رەسەي كەلىسسوزدەردەن باس تارتسا، وعان بۇرىن-سوڭدى بولماعان جويقىن سانكسيالار سالىنادى.

اقش كونگرەسى رەسەيگە قارسى قاتاڭ سانكسيالار ەنگىزۋ تۋرالى زاڭ جوباسىن ازىرلەپ قويعان. ونى 70 سەناتور قولداعان.

سانكسيالار رەسەيدىڭ ورتالىق بانكىن، «كولەڭكەلى فلوتىن» جانە ەكونوميكاسىنىڭ 70%-ىن قامتيتىن سالالاردى نىساناعا الادى. بۇل تۋرالى پۋتينگە الدىن الا ەسكەرتۋ بەرىلگەن.

ەۋروپا ەلدەرى دە ءوز تاراپتارىنان ەڭ قاتاڭ سانكسيالار پاكەتىن دايىنداپ جاتقانىن مالىمدەدى.

زاپوروج اەس-ىنە قاتىستى اقش ءوز ۇسىنىسىن جاساعان جانە ونى قايتا ىسكە قوسۋعا دايىن ەكەنىن جەتكىزدى.

كەللوگ مالىمدەمەسىندە ۋكراينا جاقىن بولاشاقتا ناتو-عا مۇشە بولا قويمايتىنىن، ءبىراق بولاشاقتا مۇنداي مۇمكىندىك بار ەكەنىن اتاپ ءوتتى.