InfoHub Logo

حالىقارالىق ىزدەۋدە جۇرگەن «استانا LRT» ءجشس-نىڭ ەكس-باسشىسى تالعات اردان تۇركيادا قولعا ءتۇستى. بۇل تۋرالى Infohub.kz  Ushqyn.kz-كە سىلتەپ حابارلايدى. 

ۆەدومستۆو مالىمەتىنشە، ارداندى تۇركيانىڭ قۇقىق قورعاۋ ورگاندارى انتاليا قالاسىندا ۇستاعان. ونىڭ ناقتى ورنالاسقان جەرى بيىل انىقتالعان. بۇعان دەيىن، 2019 جىلى باس پروكۋراتۋرا تۇركيانىڭ ادىلەت مينيسترلىگىنە ونى ەكستراديسيالاۋ جونىندە رەسمي سۇراۋ جولداعان بولاتىن. تۇركيا تاراپى وسىعان سايكەس ىزدەستىرۋ شارالارىن ۇيىمداستىرىپ، ناتيجەسىندە اردان قولعا ءتۇستى.

انتاليا سوتى 2025 جىلعى 9 مامىردا ونى قازاقستانعا دەپورتاسيالاۋ تۋرالى شەشىم شىعاردى. قازىرگى ۋاقىتتا تالعات اردان قاماۋدا وتىر. قازاقستاننىڭ قۇزىرلى ورگاندارى ونى ەلگە قايتارۋ ءۇشىن قاجەتتى قۇقىقتىق راسىمدەردى باستاپ كەتتى.

ايتا كەتەيىك، استانا قالاسىنىڭ سوتى بۇعان دەيىن تالعات ارداندى اسا ءىرى كولەمدەگى بيۋدجەت قارجىسىن جىمقىرعانى جانە قىزمەتتىك وكىلەتتىگىن اسىرا پايدالانعانى ءۇشىن سىرتتاي 9 جىلعا باس بوستاندىعىنان ايىرعان بولاتىن. ول قىلمىستىق كودەكستىڭ 189-بابى 4-بولىگى جانە 361-بابى 4-بولىگى بويىنشا كىنالى دەپ تانىلعان.