اقشا ىزدەگەن بالا
ول دۇكەننىڭ الدىنا قايتا كەلدى. ىشىنەن شەتەل اۋەنى ەستىلەدى. ساتۋشى قىز دۇنيەدەن تۇڭىلگەن كەيىپپەن دالاعا قاراپ وتىر. كەنەت كوزى بالاعا ءتۇستى دە، جۇدىرىعىن ءتۇيىپ قاباعىن شىتتى. ءبىر ساعاتتان استام ۋاقىت دۇكەن ماڭىن توڭىرەكتەپ جۇرگەن ول سەزىكتى كورىنسە كەرەك.
بالا بۇرىلىپ كوپ قاباتتى ءۇي جاققا بەتتەدى. جانارى جاساۋراپ، دۇنيە تۇماندانىپ كەتكەن. اقىرىن بايقاتپاي ماڭدايىن سۇرتكەن بولىپ كوزىن سيپاپ الدى. ەسىل-دەرتى اياعىنىڭ استىندا. اقشا ىزدەپ كەلە جاتىر. ەگەر جيىرما تەڭگە تاۋىپ السا، اپكەسىنە تەلەفون شالاتىنىن، ەگەر ءجۇز تەڭگە تاپسا، ەشكىمنىڭ كومەگىنسىز اۋىلعا جەتەتىنىن بىلەتىن. سوندىقتان جەڭگەسىنىڭ كوزىن الا بەرە كوشەگە شىعىپ اقشا ىزدەيدى. ارينە، اقشا بار دۇنيەدە ونى جوعالتاتىن ادامدار دا بولادى. ال الدەكىمنىڭ جوعالتقان نارسەسىن بىرەۋ تاۋىپ الىپ جاتپاي ما. بالانى اقشا ىزدەۋگە شىعارعان وسى وي. ءبىراق ارنايى ىزدەگەن زات تابىلا قويۋشى ما ەدى.
ول ەكىنشى قاباتقا كوتەرىلىپ، قوڭىراۋدى باسپاستان بۇرىن تىڭ تىڭدادى. تىنىش ءتارىزدى. مارجاننىڭ دا، جەڭگەسىنىڭ دە داۋىسى شىقپايدى. ۇيىقتاپ جاتىر ما ەكەن. ول قىزىل تۇيمەنى باسۋعا وقتالعان ساۋساعىن تارتا قويدى. "ۇيىقتاپ جاتسا شاتاق بولادى" دەپ ويلادى ول. قالقيعان كۇلاعىن ەسىككە جاپسىرىپ تاعى تىڭ تىڭدادى. ۇرىسقاندا جەر-جەبىرىڭە جەتەتىن جەڭگەسىنەن قاتتى قورقاتىن. اعاسىنا اۋىلعا اپارىپ تاستاشى دەۋگە دە باتىلى بارمايدى. بوتەندىگىن، اكەسىنىڭ باسقالىعىن كورسەتىپ جاتىر دەپ وكپەلەيتىندەي كورىنەدى. ول اۋىلدى قاتتى ساعىنعان، شومىلعاننان كەيىن بىرنەشە كۇن بالىق ساسىتاتىن كولىن دە، جارتاستان سەكىرۋگە باتپايتىن دوسى سەرىكتى دە، اسىرەسە كومبەگە نان ءپىسىرىپ، ءبىر شوكىم بولىپ وتىراتىن ماماسىن ساعىنعان. "ءوزىم كىنالىمىن، — دەپ كۇبىرلەدى ول، — قايدان عانا الماتىداعى اعاما بارامىن دەپ بايبالام شىعاردىم دەسەڭشى". كۇندە قۇلاق ەتىن جەي بەرگەن سوڭ ماماسى اۆتوبۋسقا سالىپ اكەلىپ تاستادى. بايقۇس ماماسىن جەڭگەسى ءبىر كۇن دە قوندىرماي، كەلگەن كۇنى قايتارعان. "ورىن جوق. ونسىز دا اۋا تار. مارجانعا زيان" دەدى جەڭگەسى. ال اعاسى "وندا كەشكى اۆتوبۋسقا ۇلگەرىپ كەت" دەگەن. ماماسى قايتىپ كەتتى. جول بويى ارمانداعان سۋىنا دا تۇسكەن جوق، تۋعان كەزىندە ءبىر كورىپ جەتە الماي جۇرگەن مارجاندى دا ماۋقىن باسىپ كوتەرمەدى. بالانىڭ كوزىنە جاس ۇيىرىلگەن. اۋىلعا جەتسەم ەندى ءقايتىپ ەشقايدا كەتپەيمىن دەپ شەشتى ول. بار ارمانى اعاسىنىڭ قاسىندا ءجۇرىپ ماشينا جوندەگەندى ۇيرەنۋ ەدى. كەلگەلى جۇمىسىنا ءبىر بارعان جوق. ال ماماسى "ەسىل-دەرتى تەمىر، رەتى كەلسە قاسىڭا الىپ ءجۇرىپ كورسەتەرسىڭ" دەگەن كەتەرىندە. اعاسى ىرجيىپ، باسىن يزەگەن. سودان كەيىن ۇمىتىپ كەتتى مە، ءۇنسىز. ەسىنە سالۋعا تاعى ىڭعايسىزدانادى، "اكەمىز بولەك بولعان سوڭ مەنىڭ قىزىمدى باققىسى جوق" دەپ وكپەلەي مە دەپ قورقادى. ال ول مارجاندى جانىنداي جاقسى كورەدى.
اعاسىن، جوق، اللدىمەن اپكەسىن، سودان سوڭ مارجاندى جاقسى كورەدى. ال مامام شە دەپ ويلايدى ول. ماماسى ەسىنە تۇسكەندە كوزى قايتا جاساۋراپ، يەگى كەمسەڭدەگەن. بىرەۋ-مىرەۋ كورىپ قالماسىن دەپ الاقانىمەن جاسىن ءسۇرتىپ، مۇرنىن تارتتى. باعانالى بەرى سۇيەنىپ تۇرعان تاس قابىرعادان دەنەسى تىتىركەنىپ كەتتى. ءبىراق ادەيىلەپ جابىسا ءتۇستى دە سىرعىپ بارىپ وتىردى. ءۇيدىڭ ىشىنەن دىبىس شىقپايدى. ءبىر جاققا كەتىپ قالدى ما ەكەن؟ "مارجان جىلاسىن" دەپ ويلادى ول. سودان سوڭ كىرەمىن.
الدە تاعى اقشا ىزدەپ كەلسەم بە ەكەن دەپ ءبىر ويلادى. وقتالا بەرىپ قايتا وتىردى. قارنى شۇرقىراپ اشىپ بارادى. ونىڭ ۇستىنە كوزى دە قىزارىپ كەتكەن شىعار. ول دەمىن ىشىنە تارتىپ تىڭ تىندادى. تىم-تىرىس. ۇلكەن ءۇيدىڭ ىشىنەن قىبىر ەتكەن دىبىس شىقپايدى. كوزىنە قايتا جاس تىعىلدى. ماناعى دۇكەنشى قىز ءتۇستى ەسىنە.
— تەلەفونىڭىزبەن اپكەمە زۆونداپ السام بولا ما، قاتتى كەرەك بولىپ تۇر ەدى، — دەسە شە.
كوز الدىنا قاباعىن قارس تۇيگەن سارى قىز ەلەستەدى.
— جيىرما تەڭگەڭ بار ما، بالا؟
ول ورنىنان سۇيرەتىلىپ تۇرىپ دالاعا بەتتەگەن. اقشا ىزدەۋ كەرەك. جيىرما تەڭگەسىز ەشكىم تەلەفونمەن سويلەستىرمەيدى.
ال دالادا شىلدەنىڭ اپتاپ ىستىعى بولاتىن.
You Might Also Like
-
قازان باپپەن قايناپ جاتىر. ءوز ورنىن ءوز ءىسىن بىلەتىن سابىرلى ادام ءتارىزدى. از عانا بۋ شىعارىپ، ءبىرقالىپتى بۇلكىلدەيدى..
-
ەرتەڭ اۋىلعا بارامىن. اۋىلدا تىرشىلىك توقتاپ قالعان. كۇندەلىكتى كۇيبەڭنەن وزگە اۋىلداعى ادامداردى ەش نارسە تولعاندىرمايدى. ول جەردەگى ماحابباتتىڭ ءوزى جايباراقات. ەشكىمنىڭ ەسى كەتىپ، دۇنيەنى تالاق ە...
