اش قاسقىردىڭ ارمانى
شىتىناعان اياز. قويلار جىلى قورادا بىرت-بىرت كۇيىس قايىرىپ جاتادى. سىرتتا ماڭ توبەتتەر ماڭق-ماڭق ۇرەدى. قورادا كۇزەت ساق. اش قاسقىر اۋىل سىرتىن تورۋىلدايدى. ارلان بۇل ماڭدا قويدىڭ بارىن سەزەدى. سىلەكەيى شۇبىرادى. ءسويتىپ اۋىلعا جاقىن كەلەدى. مۇنى سەزگەن توبەت ارس ەتە قالادى. قاسقىر قاشا جونەلەدى. جاپان دالا. قاسقىر الدەكىمگە مۇڭ شاققانداي، ۇزاق ۇليدى. ءبىراق گۋلەگەن بوراننىڭ گۋىلى ودان باسىمىراق بولادى.
ءبارى تاعى دا جورتۋىلعا شىعادى. تاڭ اتادى. اۋىلدان ورگەن قالىڭ قوي ورىسكە بەتتەيدى. قاسقىر وتاردىڭ الدىن توريدى. سول كەزدە شوپان اتىنا قامشى باسادى دا وتاردىڭ الدىڭعى جاعىنا شىعادى.
— قاپ! – دەپ وكىنەدى قاسقىر. — اتتى قويشى، اشۋى قاتتى قويشى دەگەن وسى دا!
قاسقىر ەندى ءبىر جىرانى جاعالاپ، وتاردىڭ ەكىنشى شەتىنە قاراي ويىسادى. قاراسا، قويدىڭ سوڭىندا ەكى قويشى اڭگىمەلەسىپ كەلە جاتىر ەكەن.
— ەكى قويشى – ەرمەك قويشى، ءبىر توقتىسىن بەرمەك قويشى، – دەيدى دە اۋزىن ارانداي اشىپ، قويعا تاپ بەرەدى. ۇرىككەن قالىڭ قوي دۇركىرەپ، كەيىن شەگىنەدى. ەكى قويشى قاتار تۇرا قالىپ، قوس اۋىز مىلتىقتىڭ شۇرىپپەسىن باسىپ-باسىپ جىبەرەدى. وماقاcا قۇلاپ، ءبىر اۋناپ تۇرعان ارلان اقساڭداي باسىپ، اۋلاق قاشىپ كەتەدى.
قاسقىردىڭ قارنى شۇرىلدايدى. تاعى دا جورتۋىلعا شىعادى. تاۋ قويناۋىنداعى قاپتاعان مالدى كورەدى. قاراسا، قوي سوڭىندا وگىز مىنگەن قويشى ءجۇر ەكەن.
— ۋ-ۋ-ۋ!..– دەيدى ارلان. — وگىزدى قويشى – ولگەن قويشى، جەپ بولعان سوڭ كورگەن قويشى، – دەپ، تاستاردىڭ تاساسىمەن قويعا تاقاپ كەلەدى. وگىز قاسقىردىڭ ءيىسىن سەزە قويادى. جەلكەسىن كۇجىرەيتىپ:
— ءمو-و-و!.. – دەپ، قويدىڭ شەتىنە قاراي وڭكەڭدەي تۇرا ۇمتىلادى.
جولى بولماعان كوكجال بۇل جەردەن دە قايقاڭ ەتىپ قاشا جونەلەدى.
قاسقىر قايعىرىپ، مۇڭعا باتادى. ءوزىنىڭ ءبورى بولىپ جارالعانىنا ناليدى. امال قانشا، اش قارىندى جۇباتۋ كەرەك. بيىك تاۋدىڭ باسىنا شىعىپ، ۇزاق تىڭ تىڭدايدى. جان-جاعىنا كوز سالادى. سوناۋ ويداعى ءبىر وتاردىڭ سوڭىندا ويناپ جۇرگەن بالا قويشىنى كورەدى.
— ۋ-ۋ-ۋ!..– دەيدى قاسقىر ايانىشتى ۇنمەن ۇلىپ. — بالا قويشى، اۋلاقتا ويناپ قالا قويشى!..
بۇل كەزدە قاسقىردىڭ ءىشى بۇرىنعىدان بەتەر ۇلىپ سالا بەرەدى. اش ءبورى بەتەگەدەن بيىك، جۋساننان الاسا بولىپ، جەر باۋىرلاپ قويعا جاقىنداي بەرەدى، جاقىنداي بەرەدى. بالانىڭ كوزى قىراعى ەكەن. قاسقىردى كورە سالادى دا بار داۋسىمەن ايقايعا باسادى:
— ءبورىباسار، ءبورىباسار، ايت، ايت، ايتاق! سىرتتان، سىرتتان، ايت، ايت، ايتاق!
بالانىڭ اششى داۋسىنان ەلەڭ ەتە قالعان ەكى توبەت ەنتەلەپ كەپ، قاسقىردى تارپا باس سالادى. اش قاسقىر ءالسىز ەكەن. ەكى يت ادىمىن اشتىرمايدى.
You Might Also Like
-
ءومىرىڭىزدى قۇر وتكىزىپ جاتقانىڭىزدىڭ 13 بەلگىسى
-
بۇگىنگى كۇن – جاقىن ارادا بولاتىن جاقسى جاڭالىقتىڭ باستاپقى كەزەڭى. جانە، سول بولاشاق جارقىن بولۋ ءۇشىن، تومەندە ايتىلاتىن 30 زاتتى ءدال ءقازىر ىستەۋدى باستاڭىز.
