استانادا مەملەكەتتىك قىزمەتكەرلەرگە Egov پورتالىن قولدانۋدى ۇيرەتپەك
حالىققا قىزمەت كورسەتۋ ورتالىقتارىنا انىقتاما ءۇشىن كەلەتىن مەملەكەتتىك قىزمەتكەرلەردىڭ سانى ازايماي وتىر. بۇگىندە10-نان اسا مەملەكەتتىك قىزمەتتى ەلەكتروندىق فورماتتا egov.kz-تەن الۋعا بولادى. وسىعان بايلانىستى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى حقكو-داعى كەزەكتى ازايتۋعا قاتىستى ۇسىنىس ءبىلدىردى.
«حالىققا قىزمەت كورسەتۋ ورتالىقتارىنا كەلەتىن مەملەكەتتىك قىزمەتكەرلەر مەن ۆەدومستۆولىق باعىنىشتى ۇيىمدار وكىلدەرىن ازايتۋ ماقساتىندا «ازاماتتارعا ارنالعان ۇكىمەت» مەملەكەتتىك كورپوراسياسىمەن بىرىگە وتىرىپ، وقىتۋ كەستەسىن قۇردىق. قىزمەتكەرلەردى وقىتۋ جۇمىستارى ەكسپو اۋماعىنداعى حقكو-دا وتەتىن بولادى. وسىلايشا، ەرىكتى تارتىپتە ۇيرەتۋ جۇمىستارىن جۇرگىزەتىن بولامىز. وزىمنەن باستاپ، وقۋعا بارامىز»، — دەدى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى استانا قالالىق دەپارتامەنتىنىڭ باسشىسى جازيرا جىلقىشييەۆا.
«ەگەر دە وسىدان كەيىن مەملەكەتتىك قىزمەتشىلەر egov-پەن الۋعا بولاتىن قىزمەتتى حقكو ارقىلى تاپسىرىس بەرسە، وندا بۇل ماماندى جازاعا تارتامىز. ياعني، وسىنداي تاسىلدەر ارقىلى ناتيجەگە جەتەمىز. حالىققا قىزمەت كورسەتۋ ورتالىقتارىندا مەكەنجاي انىقتاماسى ءۇشىن مەمقىزمەتشىلەردىڭ كەزەكتە تۇرعانى دۇرىس ەمەس»، — دەدى ج. جىلقىشييەۆا.
ونىڭ ايتۋىنشا، وتكەن جىلى ەلەكتروندى فورماتتا مەملەكەتتىك قىزمەتتى پايدالانۋ ماقساتىندا وقىتۋ جۇمىستارى مەن ءىس-شارالار اتقارىلعان. بۇل حقكو-دا ادام سانىن ازايتىپ قانا قويماي، قولدانۋشىلاردىڭ ۋاقىتىن ۇنەمدەۋگە وڭ اسەر بەرەدى. جوسپارلانعان ساباقتارعا ءبىر اي ۋاقىت بەرىلەدى. مەملەكەتتىك قىزمەتشىلەردەن كەيىن، ۆەدومستۆولىق باعىنىشتى ۇيىمداردىڭ قىزمەتكەرلەرى دە وقۋدان وتەدى.
«بىلتىر ءبىز «ازاماتتارعا ارنالعان ۇكىمەت» مەملەكەتتىك كورپوراسياسىمەن ەلەكتروندىق نۇسقادا مەملەكەتتىك قىزمەت كورسەتۋ بويىنشا شارالار وتكىزدىك. وسىعان بايلانىستى، ۆەدومستۆولىق ۇيىمداردا وقىتۋ جۇمىسى ءجۇردى. الايدا جاقىندا قالاداعى ءتورت حالىققا قىزمەت كورسەتۋ ورتالىقتارىنا بارىپ كەلدىم، بۇرىنعىسىنشا سول جەردە ادامدار كەزەكتە تۇر. ەڭ قىزىعى، سول جەرگە مەملەكەتتىك قىزمەتشىلەر نەمەسە ۆەدومستۆولىق باعىنىشتى ۇيىم وكىلدەرى بارىپ، حقكو-لاردا كەزەكتە تۇرادى. ەگەر دە بىزدە ەلەكتروندىق سيفرلىق قولتاڭبا بولسا، حقكو-لارعا بارۋدىڭ قاجەتى قانشا؟ بۇل قىزمەتتەردى «egov» ارقىلى الۋدىڭ مۇمكىندىگى بار عوي، ياعني ءداستۇرلى انىقتامالاردى ەلەكتروندىق ۇكىمەت پورتالىمەن الۋعا بولاتىنىن بىلەسىزدەر»، – دەپ تۇيىندەدى دەپارتامەنت باسشىسى.
You Might Also Like
-
وتكەن عاسىرداعى دۇكەن مەن كافەلەردىڭ پايدا بولۋ جانە دامۋ تاريحىن قامتىعان ەسكى فوتولاردى نازارلارىڭىزعا ۇسىنامىز.
-
بەردەندە اينالا ساناعاندا ءۇش-اق تۇياق بار: جاۋىر قارا ات، مۇقىل سيىر، قىزىل بۇزاۋ. اشارشىلىق، جۇتتان بەرى وسى ءۇش مالىنىڭ سانى ارتقان دا ەمەس، كەمىگەن دە ەمەس.
