InfoHub Logo

قازاقستاندىق اتا-انالار وقۋ جىلىن ۇزارتۋعا قارسى. ولار عالامتوردا ونلاين تۇرىندە نارازىلىق حات ۇيىمداستىرعان. 5 كۇندىك ءبىلىم بەرۋ جۇيەسىنە كوشۋ تۋرالى ۇسىنىستى پرەمەردىڭ ورىنباسارى داريعا نازاربايەۆا جاساعان بولاتىن. بۇل باستامانى ءبىلىم جانە عىلىم ءمينيسترى دە قولدادى. ءبىراق ۇكىمەتتىڭ شەشىمىن اتا-انالار مەن ۇستازدار ءارقيلى قابىلداعان.

5 كۇندىك وقۋ جۇيەسىن كوپشىلىك قولداپ وتىر. ءبىراق جازعى دەمالىستىڭ قىسقارتىلۋىنا قارسى. اتا-انالاردىڭ ويىنشا، قالىپتاسقان ءداستۇردى بۇزۋ ءبىرىنشى كەزەكتە بالالاردىڭ دەنساۋلىعىنا اسەر ەتەدى.

«ەلباسى ءوز سوزىندە مەكتەپ باعدارلاماسىن جۇيەلەۋ تۋرالى ايتتى. ءبىراق ول قاجەتسىز پاندەردى قىسقارتىپ، 5 كۇندىك وقۋعا كوشۋ كەرەك دەگەن بولاتىن. وقۋشىلاردىڭ دەمالىسى قىسقارسا، دەپۋتاتتاردىڭ دا كانيكۋلى ازايۋى كەرەك. قالاداعى بارلىق مەملەكەتتىك مەكەمەلەر جازدا جۇمىس ىستەيدى عوي. ولار دا ەڭبەكتەنسىن»، — دەيدى تولەگەن تورەگەلدين ەسىمدى تۇرعىن.

اتا-انالاردىڭ عالامتوردا قول جيناپ، جاتقانىنان سالاعا جاۋاپتى مەملەكەتتىك ورگانداردىڭ باسشىلارى حاباردار. قاراعاندى وبلىستىق ءبىلىم باسقارماسىنىڭ جەتەكشىسى اسحات ايماعامبەتوۆ جاڭا وزگەرىستى بىلايشا تۇسىندىرەدى.

«پاندەردى ينتەگراسيالاعان كەزدە وقۋشىلارعا تۇسەتىن سالماق ازايادى. بۇل 5 كۇندىك وقۋ اپتاسىنا كوشۋدى جەڭىلدەتەدى. بيىل 1ء-شى سىنىپتاردىڭ جاڭا جۇيەگە كوشۋىنە بايلانىستى وقۋ جىلى 10 كۇنگە ۇزارادى. ولاردا قوسىمشا 33 دەمالىس كۇنى بولادى. ءار وقۋ اپتاسىنا. جانە كۇزگى، قىسقى، كوكتەمگى دەمالىسى تاعى بار. ولار قىسقارمايدى»، — دەيدى  قاراعاندى وبلىستىق ءبىلىم باسقارماسىنىڭ باستىعى اسحات ايماعامبەتوۆ.

تەرىسكەيلىك ۇستازدار بولسا، ءبىلىم سالاسىنداعى تىڭ وزگەرىستەرگە بالالار تەز ۇيرەنەدى، دەپ سانايدى. ولار جاڭا باعدارلامانىڭ قىر-سىرىن مەڭگەرۋ ءۇشىن ارنايى كۋرستارعا قاتىسىپ ءجۇر. ايتۋلارىنشا، وقۋشىلار ۇشان-تەڭىز ماعلۇمات قابىلدايدى. سايكەسىنشە، دەمالىسقا دا كوڭىل ءبولىنۋى كەرەك. 5 كۇندىك ءبىلىم جۇيەسى بالالاردىڭ وقۋعا دەگەن ىنتاسىن وياتادى. ال ماۋسىمعا دەيىن سوزىلاتىن ساباقتارعا ولار جەڭىل داعدىلانادى.

«ءبىز 25 مامىرعا دەيىن وقۋعا ۇيرەندىك. ماۋسىمنىڭ بىرىنە دەيىن وقۋعا دا ۇيرەنەمىز. ار جاعىندا بىرنەشە كۇن عانا قوسىلادى. كەي اتا-انالار جازعى ۋاقىتتا ءوز بالالارىن دەمالىس لاگەرلەرىنە جىبەرە المايدى. كوبى جۇمىستا بولعاننان كەيىن بالالارى قاراۋسىز قالادى. سوندىقتان دا ولاردىڭ مەكتەپتە قالعانى دۇرىس»، — دەدى  باستاۋىش سىنىپ ءمۇعالىمى بوتاگوز ايتجانوۆا.

اقتوبەلىك ۇستازدار وقۋشىلاردىڭ دەنساۋلىعىنا الاڭداۋلى. اۋا-رايى قولايسىز ايماقتا قىستا 40 گرادۋستىق سىقىرلاعان اياز بولادى، ال ماۋسىم ايىنداعى قاپىرىق ىستىق بالا تۇگىلى، ەرەسەكتەردىڭ وزىنە وڭاي تيمەيدى.

«شەتەلدەردە مۇمكىن ءتيىمدى بولار. سەبەبى ونىڭ كليماتى وزگە، جاعدايلارى باسقا. ءبىزدىڭ ەندى ءالى دە زەرتتەۋشىلەر زەرتتەيتىن شىعار، ءبىزدىڭ كليمات قانشا دەگەنمەن ىستىق. مامىر ايىنىڭ وزىندە وقۋشىنى ۇستاپ وتىرۋ قيىنداۋ»، — دەيدى  اقتوبە قالالىق №9 مەكتەپ-گيمنازياسىنىڭ قازاق ءتىلى ءمۇعالىمى ولەگ سۆەت.

«بالالاردى ماۋسىم ايىندا وقىتۋ دەگەن مۇلدەم دۇرىس ەمەس دەپ ويلايمىن اتا-انا رەتىندە. ويتكەنى قىركۇيەكتىڭ وزىندە ءقازىر بارىپ جاتقان وقۋشى بالالارىم بار، ىستىقتاپ، شارشاپ سولاي. ويتكەنى ءار سىنىپتا كونديسيونەر بولمايدى عوي»، — دەيدى اتا-انا گۇلجازيرا قاراتايەۆا.

ءبىلىم الۋ ۇردىسىنە جىل مەزگىلىنىڭ ەشقانداي اسەرى جوق دەگەن پسيحولوگ ماماندار وقۋ جىلىنىڭ ۇزارۋى قيىندىق تۋعىزباۋى ءتيىس دەگەن كوزقاراستا.

«ەگەر جاز مەزگىلىنە بەلگىلى ءبىر جوسپارلار بولسا، اۋىلعا، اتا-اجەلەرىنە بارىپ دەگەندەي، بۇل ماسەلەلەردى جەكە-جەكە قاراستىرىپ، شەشۋگە بولادى. ۇلگەرمەي قالعان ساباقتى ارتىنان ەمتيحان رەتىندە تاپسىرىپ. ءبىراق بۇل جاپپاي ورىن الادى دەپ ويلامايمىن. قيىندىق تۋعىزباۋى ءتيىس»، — دەيدى پسيحولوگ  الەكساندر كولەسنيكوۆ.

قازىرگى تاڭدا قازاقستاندىق وقۋشىلار اپتاسىنا 6 كۇن ءبىلىم الادى. ءبىراق كەلەسى وقۋ جىلىنان باستاپ 1 سىنىپ وقۋشىلارى 5 كۇندىك جۇيەگە كوشەدى. 2017 جىلى ولاردىڭ قاتارىنا 2ء-شى، 5ء-شى، 7ء-شى جانە 9-شى سىنىپ وقۋشىلارى قوسىلادى. 2018 جىلدان باستاپ جاڭا جۇيەگە بارلىق مەكتەپتەردى كوشىرۋ جوسپارلانعان. ءبىراق جازعى دەمالىس ۋاقىتىن ازايتۋ تۋرالى شەشىم ناقتى قابىلدانعان جوق. سوڭعى ءسوز ۇكىمەت تاراپىنان بولماق.

---