InfoHub Logo

اۋىل مەكتەپتەرى قالا مەكتەپتەرىنەن 2 جىلعا ارتتا قالىپ قويعان. بۇل تۋرالى بۇگىن ق ر ءبىلىم جانە عىلىم ءمينيسترى ەرلان ساعادييەۆ الماتىدا وتكەن عىلىم قىزمەتكەرلەرى كۇنىنە ارنالعان «عىلىم جانە بيزنەس» حالقارالىق فورۋمى بارىسىندا ايتتى.

ءمينيستردىڭ ايتۋىنشا، ءبىلىم بەرۋ جۇيەسىنە ەنگىزىلگەلى وتىرعان جاڭا باعدارلاما اۋىل مەن قالا مەكتەپتەرىنىڭ اراسىنداعى ارتتا قالۋشىلىقتى قىسقارتۋعا باعىتتالعان.

«ءبىزدىڭ باستى مىندەتىمىز - قالا مەن اۋىل مەكتەبىنىڭ اراسىنداعى ارتتا قالۋشىلىقتى جويۋ. ەكونوميكالىق ىقپالداستىق جانە دامۋ ۇيىمى (ەىدۇ) ەلدەرى اراسىندا اۋىل مەكتەبى قالا مەكتەبىنەن فۋنكسيونالدى ساۋاتتىلىق بويىنشا 8 سىنىپقا قاراي 1 جىلعا كەش قالعان بولسا، قازاقستان مەكتەپتەرى ەكى جىلعا كەش قالىپ قويعان. بۇگىن وسى ماقساتتا الدىمىزدا ۇلكەن مىندەت تۇر. ەىدۇ ەلدەرى اۋىل مەكتەبىنىڭ مازمۇنىن 1980 جىلدارى جاڭعىرتا باستادى. 1990 جىلدارى رەفورما تولىق جۇزەگە اسىرىلدى. 1997 جىلى ولار ءبىلىم بەرۋ ساپاسىن انىقتاۋ جۇيەسىن ەنگىزدى. اتالعان باعدارلاماعا 70 ەلدىڭ ءبىلىم بەرۋ جۇيەسى قاتىستى»، - دەدى مينيستر.

ەرلان ساعادييەۆ جاڭا ءبىلىم بەرۋ مازمۇنىنا قازاقستان مەكتەپتەرى بيىل 1 قىركۇيەكتەن كوشە باستايتىنىن جەتكىزدى.

باعدارلاما نازاربايەۆ زياتكەرلىك مەكتەبىندە اپروباسيادان وتكەن. بيىل جازدا 73 مىڭ وقىتۋشى قايتا وقىتىلىپ، جاڭا جۇيەگە 350 مىڭ وقىتۋشى مەن 3 ملن وقۋشى قاتىسادى.

«باعدارلاما بولكە نان ەمەس، ونى ءبىر جەرىن كەسىپ الىپ تاستاۋعا بولمايدى. بۇل ۇلكەن عىلىم. بالا باستاۋىش كلاستاردان فۋنكسيونالدى ساۋاتتىلىق نەگىزدەرىن مەڭگەرۋى ءتيىس. نەگىزگى ماقسات - اۋىل مەن قالا مەكتەبىنىڭ دەڭگەيىن تەڭەستىرۋ. بيىل 1 سىنىپ وقۋشىلارى 1 ماۋسىمعا دەيىن وقيدى. بۇل ءوز كەزەگىندە 5 كۇندىك ءبىلىم بەرۋ جۇيەسىنە كوشۋدى بىلدىرەدى. كەلەر جىلى اتالعان باعدارلاماعا 2،5،7 سىنىپتار كوشەدى. 9 سىنىپتار دا كوشۋى ىقتيمال»، - دەدى مينيستر.

---