InfoHub Logo

اۋليە بابا كۇز ءتۇسىپ، جاپىراقتار سارعايا باستاعان شاقتا ءوزىنىڭ ەجەلگى، ەسكى مەكەنى — قىرىق جىل قىزىعىن كورگەن قىزىلتاس ماڭىنداعى قالپاقتاس قويناۋىندا (كەيىنىرەكتە ەرەنشىنىڭ سايى اتالعان تۇستا) اللانىڭ اماناتىن بەرىپ، دۇنيە سالىپتى. ول بىلاي بولسا كەرەك. جىلقىسىن تۇگەندەپ، كەمەراشىدان جوعارى ساردوڭعال اسىپ، تەكەلىگە قاراي بەت تۇزەگەن شاعىندا، كىشى انامىزدىڭ ۇيىندە وتىرىپ:

— بولدى، قايتالىق. داۋرەنىم ءوتتى، تالقانىم تاۋسىلۋعا تايالدى، — دەيدى.

جيىلعان جۇرت بۇعان سەنەر-سەنبەستەرىن بىلمەي، اڭ-تاڭ بولىسادى. نازارلارى بي اتانىڭ وزىندە. اجارى ايداي، اۋىرىپ-سىرقاماعان جاننىڭ بۇل سوزىنە قايران قالىسادى. سول ساتتە ەسەكەڭنىڭ ءوزى:

— بايقاپ تۇرمىن، باتىرىپ ايتپاسام، بارلىعىڭنىڭ ناناتىن تۇرلەرىڭ جوق. الەمدە اقىل-ەستەن سەزىمتال ەشتەڭە جوق. ەس جوعالماسا، ەل بولادى، ۇرپاق وسەدى. سوندىقتان ءوز جاندارىڭدى وزدەرىڭ قاستەرلەپ، قادىرلەپ، تىڭداي بىلسەڭدەر، جامان بولمايسىڭدار. مەنىڭ نۇرىم ۇرپاعىمنىڭ جۇزىندە جۇرەتىن ءتارىزدى. سوعان قۋانىپ وتىرمىن. ۇلى ءتاۋبام دە —  سول.

سەندەر، كوپ قارايلاماڭدار، ۇلكەن ۇيگە حابارشى جىبەرىڭدەر. مەن بارىپ جەتكەنشە، تۇگەل جيىلسىن، باقۇلداسىپ كەتەيىن، — دەيدى.

بۇدان سوڭ اتىنا ءمىنىپ، سول ماڭداعى ەڭ بيىك توبەگە شىعىپ:

— ەلىمنىڭ قۇتى، ەرلەرىمنىڭ پاناسى: ساردوڭعال، سارنوقاي، قورا، شاجا، ساندىقتاس، ءسارتور، ۇلى الاتاۋ، قوش، قوش بولىڭدار ءبارىڭ دە، قوش! — دەپ ءۇش مارتە داۋىستايدى دا، باتىسقا — قىزىلتاسقا قاراي اتىنىڭ باسىن بۇرادى.

جەتكەن حابارشىدان قۇلاقدار بولعان ەل ەكى كەشتىڭ اراسىندا كۇتىپ وتىرىپتى. داستارقان باسىنا باتا جاساپ بولىپ:

— بۇعان دا شۇكىرشىلىك، قوش بولىڭدار، حالايىق... مەنىڭ جانازامدى شىعارىپ بولعان سوڭ، سۇيەگىمدى اق اتانعا ارتىڭدار دا، باسىن بوس جىبەرىڭدەر. ول قاي جەرگە بارىپ شوكسە، سول جەرگە جەرلەڭدەر. بار اماناتىم وسى! — دەپتى دە، ۇياسىنا قونا بەرگەن كۇنمەن بىرگە نۇرلانىپ جاتىپ، ۇلى بابا كوز جۇمىپتى.

ارتىنداعى ۇرپاعى اتا اماناتىن مۇلتىكسىز ورىنداپ، اق اتانعا ارتىلعان ءمايىتىنىڭ ارتىنان ەرىپتى. ول قازىرگى قىزىلجار قاباعىنا بارىپ شوككەن ەكەن. سول جەردە ءقازىر قاسيەتتى بابانىڭ بەسىنشى ۇرپاعى جاڭارتىپ سالعان بەسىنشى ەسكەرتكىش-كەشەن الىستان كورىنەدى.

---