InfoHub Logo

اتىراۋ وبلىسىنداعى جانگەلدى اۋىلىندا ورىن العان وتباسىلىق قىرعىنعا قاتىستى سوت وتىرىسىندا پروكۋرور ميراس باۋىرجانوۆ قىلمىستىڭ ءمان-جايىن تولىق باياندادى. بۇل قىلمىستى جاسادى دەگەن كۇدىكپەن سۇلتان سارسەمالييەۆ سوت الدىندا جاۋاپ بەرىپ وتىر.

بۇل تۋرالى Infohub.kz اقپارات اگەنتتىگى حابارلايدى.

پروكۋروردىڭ ايتۋىنشا، سارسەمالييەۆ 2025 جىلدىڭ ناۋرىز ايىندا اتىراۋداعى مۇنايشى ىقشام اۋدانىنداعى ۇيىندە ايەلىنىڭ ءىنىسى ناۋرىز مۇقانعالييەۆتى ولتىرگەن. ودان كەيىن مارقۇمنىڭ اتىنان ۇيالى قوسىمشا ارقىلى 4 ميلليون تەڭگە نەسيە راسىمدەگەن. بىرنەشە كۇن وتكەن سوڭ، ناۋرىزدىڭ تەلەفونىمەن WhatsApp ارقىلى ناسيپ وتەشقالييەۆادان 350 مىڭ تەڭگە سۇراعان. اقشانى تاكسي قىزمەتىن اتقاراتىن ەر ادام ارقىلى الدىرعان. تاكسي جۇرگىزۋشىسى تەرمينال ارقىلى اقشانى ناۋرىز مۇقانعالييەۆتىڭ نومىرىنە اۋدارعان.

وتباسىلىق جانجال جانە قوس ادامنىڭ ءولىمى

2025 جىلدىڭ قاراشا ايىندا سۇلتان سارسەمالييەۆ ايەلى جانە ەكى قىزىمەن بىرگە قىزىلقوعا اۋدانىنداعى جانگەلدى اۋىلىنا قوناققا بارعان. سول كەزدە وتباسى مۇشەلەرى اراسىندا جانجال تۋىنداعان.

كۇدىكتى ءۇيدىڭ اۋلاسىنداعى قورادا شارۋامەن اينالىسىپ جۇرگەن ناسيپ وتەشقالييەۆانى بايقاپ، ونى پىشاقتاپ ولتىرگەن. سودان كەيىن ءوزىنىڭ قايىن اتاسىن جارالاپ، قوراعا كومىپ تاستاعان.

سوت پروسەسى اشىق تۇردە ءوتىپ جاتقانى ايتىلدى. ءىستى اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى زارەما حاميدۋللينا قاراپ جاتىر.

كۇدىكتىگە بۇعان دەيىن ق ر قك-نىڭ 99-بابى 2-تارماعىنىڭ 1-تارماعى («ەكى نەمەسە ودان دا كوپ ادامدى ءولتىرۋ») بويىنشا، سونداي-اق 188-بابى («ۇرلىق») جانە 190-بابى («الاياقتىق») بويىنشا مال ساتۋ جانە بانك كارتالارىن ۇرلاۋ فاكتىلەرى بويىنشا قىلمىستىق ءىس قوزعالعان.

بۇعان دەيىن بولعان وقيعالار

ەستەرىڭىزگە سالساق، 2025 جىلدىڭ سوڭىندا جانگەلدى اۋىلىنان بۇكىل وتباسى بەلگىسىز جاعدايدا جوعالىپ كەتكەن بولاتىن. كەيىن، 2026 جىلدىڭ 6 قاڭتارىندا اتىراۋ وبلىسىندا جوعالعان وتباسىنىڭ ەكى مۇشەسىنىڭ – وتباسى باسشىسى ماقسوت قارابالين مەن ونىڭ ايەلى ناسيپ وتەشقالييەۆانىڭ مايىتتەرى شارۋاشىلىق قوراسىنان تابىلعان ەدى. كەيىن ولاردىڭ دەنەلەرىندە پىشاق جاراقاتى بولعانى انىقتالدى.

سوت-مەديسينالىق ساراپتاما قورىتىندىسى مەن تەرگەۋ بارىسىندا انىقتالعان دالەلدەمەلەرگە سايكەس، ناۋرىز مۇقانعالييەۆ 2025 جىلدىڭ مامىر ايىندا، ال قالعان ۇشەۋى – وتباسى باسشىسى، ونىڭ ايەلى جانە قىزى قاراشا ايىندا قايتىس بولعانى بەلگىلى بولدى.

2026 جىلدىڭ 9 قاڭتارىندا وتباسى مۇشەلەرىن ءولتىردى دەگەن كۇدىكپەن ولاردىڭ كۇيەۋ بالاسى سۇلتان سارسەمالييەۆتىڭ ىزدەستىرىلىپ جاتقانى رەسمي تۇردە حابارلاندى. قايتىس بولعانداردىڭ قىزدارى دا كۇدىكتى رەتىندە تانىلدى.

اقپاننىڭ 24ء-ى كۇنى سارسەمالييەۆ پەن مۇقانعالييەۆا يندونەزيانىڭ لومبوك ارالىنداعى سەنارۋ اۋىلىندا ۇستالعانى بەلگىلى بولدى. ناۋرىز ايىندا ولاردى اتىراۋعا جەتكىزدى.

كەيىننەن پوليسيا قىزمەتكەرلەرى سۇلتان سارسەمالييەۆتى قايىن اتاسى مەن ەنەسى ولتىرىلگەن ۇيگە الىپ كەلدى. سول جەردە ول تەرگەۋشىلەرگە قىلمىستى قالاي جاساعانىن كورسەتىپ، سۇراقتارعا جاۋاپ بەردى.

سوتتالۋشىعا ق ر قك-نىڭ 99-بابى 2-تارماعىنىڭ 1-تارماعى – «ەكى نەمەسە ودان دا كوپ ادامدى ءولتىرۋ» بويىنشا قىلمىستىق ءىس قوزعالدى. بۇعان قوسا، وعان مارقۇمداردىڭ مالدارىن ساتۋ جانە بانك كارتالارىن پايدالانۋمەن بايلانىستى ۇرلىق جانە الاياقتىق تۋرالى باپتار دا تاعىلدى.

اتىراۋ وبلىستىق پروكۋراتۋراسى بولسا، اقبايان مۇقانعالييەۆانىڭ ءوز وتباسى مۇشەلەرىنىڭ ولىمىنە قاتىسى جوق ەكەنىن حابارلادى. وبلىس پروكۋرورىنىڭ كومەكشىسى جاندار بولاتبەكتىڭ ايتۋىنشا، وعان قاتىستى قىلمىستىق قۋدالاۋ توقتاتىلدى.

سونداي-اق، الماتىدا اقبايان مۇقانعالييەۆاعا پسيحياتريالىق ساراپتاما جۇرگىزىلگەنى بەلگىلى بولدى.