اۋەننىڭ ءۇنى
ول اسكەري بورىشىن اۋعاندا وتەپتى. ءان سالاتىن. اسپاپتى باۋىرىنا جيىپ العان كۇيى قۇنىسا تۇسەدى. سونان سوڭ اۋەدەن الدەبىر دىبىستاردى تىڭ تىڭداعانداي كۇي كەشەتىنى بار. بىردە وسىلاي اسپاپتا ويناپ وتىرىپ، ونى قابىرعاعا سۇيەي سالدى دا:
- ول شارشاپ تۇر، - دەدى.
- مۋزىكالىق اسپاپ تا شارشايدى ما؟
- نەگە شارشاماسىن؟ - دەدى ول. - مۇنى اسپاپتىڭ قۇلاق كۇيى كەلمەي تۇر دەگەنمەن شاتاستىرۋعا بولمايدى. مەن ونىڭ قۇلاق كۇيىن كەلتىردىم. ءبىراق ول ءان سالعىسى كەلىپ تۇرعان جوق. دەمەك، ونىڭ كوڭىل كۇيى بولماي تۇر دەگەن ءسوز. سوندىقتان وعان تىنىشتىق بەرۋ كەرەك.
- سوعىس دەگەن قانداي بولادى ەكەن؟ - دەپ سۇرايدى ودان.
- سوعىس دەگەن زاماناقىر، - دەيدى ول مۇندايدا. - زاماناقىر سوعىس دەگەن. وعان ودان باسقا قانداي تەڭەۋ ويلاپ تابۋعا بولادى؟
- ماعان تۇسىنىكسىز جاعدايلار اسكەردەن كەلگەننەن كەيىن بارىپ ورىن الدى، - دەيدى ول. - مەنىڭ كەلۋ قۇرمەتىمە ۇيدە جۇرت قۋانىشقا جينالعان ەدى. "مىنا جۇرت نەگە قۋانىپ جاتىر؟ - دەيمىن مەن. - ولار نەگە كۇلەدى؟ ولار وندا نە بولىپ جاتقانىن بىلمەيدى عوي". جىگىتتەر يىقتان قاعادى. "ءاۋ، ويانسايشى، جىگىتىم! مۇندا قىزدار كەلىپ جاتىر عوي". مەنى ەش نارسە قىزىقتىرماي قالدى. سوعىستىڭ زاردابى عوي، - دەيدى ول.
ول ءان سالىپ وتىرىپ، اسىرەسە، وسى ءبىر ءاندى ءجيى ايتاتىن.
اجارىڭ كوكتەمدەگى اشىق تاڭداي،
جانارىڭ تۇسكەن جاندى جاسىتقانداي.
جاسىڭنان جالىن شاشىپ جارق ەتكەندە
قالادى قانداي جىگىت عاشىق بولماي.
ءوزىن سولداتپىن دەپ ەسەپتەدى. سول ءسوزدى ماقتانىش تۇتتى. جانە ومىردەگى ءار ەر-ازامات ءوزىن سولدات سەزىنۋ كەرەك دەپ تە ايتا بەرەتىن.
You Might Also Like
-
قازاق ۇلتىندا تەڭىزدىڭ جاعاعا تولقىپ سوققان تولقىندارى سەكىلدى ،تولقىن مىنەزدى پاتريوت ۇلدارى مەن قىزدارى بار. ولار ءوزىنىڭ ەلىنە وتانسۇيگىشتىك ،ۇلتجاندىلىق...
-
سقو، جامبىل اۋدانى «بلاگوۆەششەنكا №2 ورتا مەكتەبى» كمم-سىنىڭ 6 "ا" سىنىپ وقۋشىسى: نۇرلان گۇلنۇر جەتەكشىسى: يسەنوۆا مولدير
