InfoHub Logo

قىزىلوردا وبلىسى، قازالى اۋدانى، قازالى اۋىلى،
№100 مەكتەبىنىڭ تالىمگەرى پشانوۆا ايگۇل ابۋباكىر قىزى

ماقساتى: وقۋشىلاردى اتا - انا ءسوزىنىڭ ءمانىن ۇعىنۋعا ۇيرەتۋ، وتباسى مۇشەلەرىنىڭ اراسىنداعى باۋىرمالدىقتى، سىيلاستىقتى دوستىق قارىم – قاتىناستى قالىپتاستىرۋ.
انا ءۇشىن ايانبا - انت ۇرادى،
بالا ءۇشىن ايانبا - بەتىڭ كۇيەدى.
ەل ءۇشىن ايانبا - ەرلىگىڭە سىن،
جۇرت ءۇشىن ايانبا - جىگىتتىگىڭە سىن. (ب. مومىش ۇلى)

انام ماعان”ۇلكەندى سىيلا” دەگەن،
سول ءسوز ماعان ىزگىلىك قۇيعان ەرەن.
ۇلكەندەردەن اۋىسقان كىشىلىكتى،
ۇلكەندەردىڭ وزىنە سىيعا بەرەم. ( م. ماقاتايەۆ).

جەل بەسىكتەن جەر بەسىككە دەيىنگى ادام ومىرىندەگى تاربيەنىڭ ۇيتقىسى اتا - انا مەن مەكتەپ. بولاشاق دەسەك تە، كەلەشەك دەسەك تە بالا «ۇرپاق» دەگەن ماعىنا بىلدىرەدى.
ادامنىڭ وزگە تىرشىلىك يەسىنەن ايىرماشىلىعى – ومىرگە پەرزەنت اكەلگەن سوڭ ونىڭ بولاشاعىن ويلاۋ، ادام ەتىپ تاربيەلەۋ. وسىعان وراي ۇلى اباي اتامىزدىڭ «وتىز ءتورتىنشى قارا سوزىنەن» ءۇزىندى تىڭداپ كورەيىك:
...« ادام بالاسىنا ادام بالاسىنىڭ ءبارى – دوس. نە ءۇشىن دەسەڭ، دۇنيەدە جۇرگەندە - تۋىسىڭ، ءوسۋىڭ، تويۋىڭ، اشىعۋىڭ، قايعىڭ، قازاڭ، دەنە ءبىتىمىڭ، شىققان جەرىڭ، بارماق جەرىڭ – ءبارى بىردەي، احيرەتكە قاراي - ءولۋىڭ، كورگە كىرۋىڭ، ءشىرۋىڭ، ماحشاردا سۇرالۋىڭ – ءبارى بىردەي، ەكى دۇنيەنىڭ قايعىسىنا، پالەسىنە ءحاۋپىڭ، ەكى دۇنيەنىڭ جاقسىلىعىنا راحاتىڭ ءبارى بىردەي ەكەن. بەس كۇندىك ءومىرىڭ بار ما، جوق پا؟ بىرىڭە - ءبىرىڭ قوناق ەكەنسىڭ، ءوزىڭ دۇنيەگە دە قوناق ەكەنسىڭ، بىرەۋدىڭ باعىنا، مالىنا كۇندەستىك قىلىپ، يا كورسەقىزارلىق قىلىپ كوز الارتىسپاق لايىق پا؟» - دەپ اباي اتامىز ايتىپ كەتكەندەي، مىنا قىسقا ومىردە ادام ءوز ءومىرىن قۇرمەتتەپ، باعالاي ءبىلۋى كەرەك دەپ ويلايمىن.