InfoHub Logo

الەمدەگى ەڭ كەرەمەت كينوزال — مي. ءبىراق سەن ونى تەك كىتاپ وقىعاندا عانا تۇسىنەسىڭ.

سكوتت ريدلي

بارلىعىمىز بالا-شاعامىزدىڭ ءبىلىمدى بولۋىن، كوپ كىتاپ وقۋىن قالايتىنىمىز انىق. ءبىراق وسى بىلىمگە باۋلۋعا، كىتاپقا وقۋعا باعىت-باعدار كورسەتىپ جاتقانىمىز قانشاما؟! ويتكەنى كىتاپ وقۋ داعدىسىن قالىپتاستىرۋ وڭاي شارۋا ەمەس. كەز كەلگەن نارسەنى ماجبۇرلەپ ىستەتۋ ۇزاققا بارمايتىنى سياقتى كىتاپ وقۋ داعدىسىن قالىپتاستىرۋدا دا ماجبۇرلەۋ ىسكە اسپايدى. كەرىسىنشە ماجبۇرلەپ قيناپ وقىتۋ بالادا كەرى اسەر، كىتاپقا دەگەن تەرىس كوزقاراس قالدىرۋى مۇمكىن. ال سونىمەن قاتار كىشكەنتاي كەزىندە قالىپتاسقان داعدىلار ادامنىڭ بۇكىل ءومىرىن تۇرلەندىرەدى. ياعني 10 جاسقا دەيىنگى مەرزىم قيال كۇشىنىڭ جەتىلۋى جانە كىتاپ وقۋدى جاقسى كورۋى تۇرعىسىندا وتە ماڭىزدى كەزەڭ. ەگەر وسى كەزەڭدە بالا كىتاپتان الشاق قالسا كەيىنگى كەزەڭدەردە ءوز ەركىمەن كىتاپ وقۋدا قيىندىق تارتادى.

كورىنگەن كىتاپتى وقي بەرگەن جارامايدى، كوڭىلدە تۋعان ساۋالدارعا جاۋاپ بەرە الاتىن كىتاپتاردى وقىعان ابزال.

ليەۆ تولستوي

كىتاپ وقۋ داعدىسىن قالىپتاستىرۋدا وتباسىنىڭ ماڭىزى زور. بالا ءۇشىن ەڭ اسەرلى ءتالىم وشاعى سانالاتىن وتباسىدا ەشكىم كىتاپ وقىمايتىن بولسا، بالادا دا كىتاپ وقۋ قالاۋى بولمايدى. سوندىقتان الدىمەن وزىمىزگە قاراۋىمىز كەرەك. ءۇي ىشىندە كىتاپ وقۋعا دەگەن قىزىعۋشىلىق بار ما؟! الدە تەلەفونعا ءۇڭىلىپ وتىرۋعا بەيىمبىز بە؟! اپتادا نەمەسە ايدا قانشا كىتاپ نەمەسە قانشا بەت وقيسىز؟! ەڭ بولماعاندا بالانى ىنتالاندىرۋ ءۇشىن كىتاپ وقىعانسىماق بولىپ، ىرىمىن جاساي الاسىز با؟!

قولعا تۇسكەنىن ەمەس، ابدەن تاڭداپ-ساراپتاپ وقىڭىز. ءدىل مەن جانىڭىزدى بايىتىپ، ونى تاربيەلەڭىز.

يۆان تۋرگەنيەۆ

كوپ ۋاقىت ءبولۋ دە شارت ەمەس، جارتى ساعات كىتاپقا كوڭىل بولسەڭىز نەمەسە كىتاپ وقىعانسىماق بولساڭىز، بالاڭىزدىڭ كىتاپقا قىزىعۋشىلىعىن وياتا الاسىز. ءتىپتى بالاڭىز وقۋ، جازۋ بىلمەيتىن بولسا دا وسىلاي بالانىڭ قىزىعۋشىلىعىن وياتۋعا تىرىسۋ كەرەك. بالالارعا ارنالعان كىتاپشا، جۋرنال اپەرىڭىز. وقۋ بىلمەسە دە بەتتەرىن اقتارىپ، سۋرەتتەرىن قارايدى. ءوزىڭىز دە وعان ىشىنەن ەرتەگى، اڭگىمەلەرىن وقىپ بەرىڭىز. بىر-ەكى رەت وقىپ داعدىعا اينالدىرساڭىز، كەيىنگى كۇندەرى بالاڭىز وقىپ بەرۋىڭىزدى ءوزى سۇرايتىن بولادى.

ءسىزدى ويلاۋعا ءماجبۇر ەتەتىن كىتاپ قانا ءوز مىندەتىن تولىق اتقارعان كىتاپ.

دوروتي پاركەر

تاعى ءبىر ايتا كەتەتىن ءجايت تەلەديدار، ينتەرنەت، الەۋمەتتىك جەلى، تەلەفون سەكىلدى كوڭىلدى الاڭداتاتىن، ۋاقىتتى جەيتىن دۇنيەلەر بار. وسى دۇنيەلەرگە دە ورىندى شەكتەۋ قويعان ءجون.

مادەنيەتتىڭ مايەگى — كىتاپ.

شەرحان مۇرتازا

ءقادىرلى زامانداستار! وقۋعا، وقىعان ۇرپاققا قاجەتتىلىك بار. ۇلتتىق جانە رۋحاني قۇندىلىقتارىمىزدان باستاپ، كەيىن ماماندىعىمىزعا قاتىستى كىتاپتار مەن ماقالالار وقۋعا قۇلشىنىس تانىتايىق. گازەت، جۋرنالدارداعى ماقالالاردان وقيىق. گازەت-جۋرنالدان كىتاپقا ءوتۋ وڭاي بولادى. ءبىر كىتاپتى كۇنىنە 1-2 بەتتەن وقىپ باستاپ تا وسى جولدا قادام تاستاۋعا بولادى. ءوزىمىز وقيىق، سوندا بالا-شاعا دا وقيتىن بولادى.

---