بالتا اقىننىڭ اعىبايدى جۇباتقانى
اعىباي باتىردىڭ كەنجە ۇلى قاشقىنباي ون شاقتى جىگىتتىڭ باتپاققا باتقان اتتى شىعارا الماي جاتقانىن كورىپ، قينالعان جانۋارعا جانى اشىپ، بەلىنەن باتپاققا كىرىپ جالعىز ءوزى اتتى جاعاعا الىپ شىعادى.
تاڭقالعان ەلدىڭ اراسىندا بالاسىنىڭ ەرلىگىنە سۇيسىنە قاراپ وتىرعان اعىباي ىشىنەن: «جەل جاققا ۇستار، جاۋعا سالاتىن ۇلىم وسى ەكەن»، — دەپ ماقتانىش تۇتادى. سول كۇنى كەشكە قاشقىنبايدىڭ دەنەسى ءىسىپ، بەلۋاردان تومەنگى جاعى قارايىپ كەتىپ، كەلەسى كۇنى ەرتەڭگىسىن قايتىس بولادى.
ون جەتى جاسار ۇلىنىڭ قازاسى جانىنا باتقان، ءارى «ءوزىمنىڭ كوزىم ءتيدى» دەپ قاتتى قاپالانعان اعىباي كۇڭىرەنىپ، قايعىرىپ توسەگىندە جاتىپ قالىپتى. سوندا يگى جاقسىلارى قاسىندا، ۇلىتاۋدان كەلگەن نايمان بالتا اقىن باتىردى قۇشاقتاپ كورىسىپ، جۇباتقانى:
— اللا ىسىندە بۇزىق جوق،
ولمەسىن دەپ ازەلدە.
جازىپ قويعان سىزىق جوق،
ۇلى ولمەيتىن ۇرىمدا جوق،
قىزى ولمەيتىن قىرىمدا جوق،
قاتىنى ولمەيتىن حالىقتا جوق،
استە ولمەيتىن تاريحتا جوق،
قويىن تولى ساف التىن
سارقىلماعان قايدا جوق.
قابىنداپ كەلگەن قايعىدان
تىرىگە تيەر پايدا جوق.
ەلگە پانا، اعىباي، جەرگە پانا،
اعىباي، ەردىڭ ەرى ەمەس پە ەدىڭ،
ەگەۋدىڭ سىنىعى ەمەس پە ەدىڭ،
كوتەر بەرى باسىڭدى،
قايعى جەيدى جاسىڭدى...
ەجەلدەن كەلە جاتقان دوسى بالتا اقىننىڭ وسى سوزىنەن اعىباي ويلانىپ، ءتاۋباعا كەلىپ، ءبىرازدان سوڭ باسىن كوتەرىپتى.
وقۋعا كەڭەس بەرەمىز:
ناۋرىزبايدىڭ جولبارىستى ءولتىرۋى
قۇرمانقۇلدىڭ ناۋرىزبايدىڭ ەرلىگىنە ريزا بولۋى
You Might Also Like
-
جاسىنان كەدەي باتىردىڭ داۋلەتى قارتايا كەلە ءتىپتى سارقىلادى. بالالارى دا كوپ، ونىڭ ۇستىنە ءبىرازى ءوز اۋزىنا ءوز قولى جەتپەگەن جاس بولسا كەرەك. ءبىر كۇنى ءۇي سىرتىنا التى-جەتى سالت اتتى كەلىپ تۇسۋگە ىڭعا...
