باقىتتىڭ كىلتى
كەز كەلگەن ادام: قاراپايىم مالشى دا، ۇلاعاتتى ۇستاز دا، ەل باسقارعان اكىم دە، كىشكەنتاي بالا دا، ەڭكەيگەن قاريا دا باقىتتى ءومىر سۇرگەندى قالايدى. ءبىراق اركىم باقىت دەگەندى ءار ءتۇرلى تۇسىنەدى. بىرەۋ ءۇشىن باقىت جوعارى قىزمەت بولسا، ەندى بىرەۋ ءۇشىن دۇنيە-مۇلىك، اسقان بايلىق بولۋى مۇمكىن. تاعى بىرەۋلەر ءۇشىن باقىت - دەنىنىڭ ساۋلىعى، وتباسى مۇشەلەرىنىڭ اماندىعى، ەلىنىڭ تىنىشتىعى.
ادامدار باقىتتى بولعىسى كەلەدى: بىر-بىرىنە "باياندى باقىت" تىلەيدى، عۇمىر بويى باقىتقا جەتۋ جولىندا ىزدەنەدى، تىنىمسىز ەڭبەك ەتەدى. الايدا اركىم شىنايى باقىتتىڭ ءقادىرىن سەزىنە بىلە مە؟
كەيدە شالقىپ-تاسىپ ءومىر ءسۇرىپ جاتقان ادامداردى كورىپ: "نە دەگەن باقىتتى!"- دەپ، اۋىر تۇرمىستىڭ زاردابىنان قينالعاندىقتان، داۋلەتتى بولساق، قيىنشىلىقتان قۇتىلىپ، جاقسى ءومىر ءسۇرىپ كەتەمىز دەگەن ۇمىتپەن قىزىعىپ قارايتىن كەزدەرىمىز دە بولادى. دەنساۋلىعىمىز سىر بەرە باستاعاندا، قول-اياعى ءبۇتىن، دەنساۋلىعى مىقتى ادامداردى كورىپ: "باقىتتىڭ ءقادىرىن تۇسىنسە ەكەن"، - دەپ ويلايمىز. بيىك بەلەستەردى باعىندىرىپ، جەتىستىككە جەتكەن، ەل قۇرمەتىنە بولەنگەن جانداردى "قانداي باقىتتى" دەپ ەسەپتەيمىز.
باقىتتى الىستان ىزدەۋدىڭ قاجەتى جوق. ويتكەنى ومىرگە ون ەكى مۇشەڭ ساۋ، اقىل-ەسىڭ دۇرىس بولىپ كەلۋىڭنىڭ ءوزى باقىت ەمەس پە؟ الپەشتەپ وسىرگەن اكە-شەشەڭنىڭ قۋانىشىڭ مەن كۇيىنىشىڭە ورتاقتاسىپ، ءالى دە تىلەۋىڭدى تىلەپ، قاسىڭدا جۇرگەنى - ول دا باقىت ەمەس پە؟ قازاق ەلىنىڭ اسپانىندا تاۋەلسىزدىكتىڭ كوك تۋىنىڭ جەلبىرەپ تۇرعانى دا - بارشا قازاق ءۇشىن زور باقىت.
شىعىس عۇلاماسى ءابۋ ناسىر ءال-فارابي: "باقىتتىڭ ءمانى - پاراساتتىلىقتا، اركىمنىڭ ءوز الدىندا يگىلىكتى ماقسات قويا بىلۋىندە... ادامنىڭ ءوز مىنەز-قۇلقىن، ىس-ارەكەتىن ەرىكتى تۇردە وزگەرتىپ، يگىلىككە باعىتتاپ وتىرۋىندا"،- دەگەن. راس، ەگەر ءبىز باقىتقا جەتۋ جولىندا جامان مىنەز-قۇلقىمىزدى قۇرباندىققا شالىپ، بار ءىسىمىزدى ىزگى جولعا ارناساق، سول كەزدە باقىتتىڭ ءمانى دە ارتادى.
مەن ءۇشىن باقىت - ءوزىڭ ءۇشىن، ءوز پايداڭ ءۇشىن عانا ەمەس، وزىڭە جاقىن نە كومەگىڭە مۇقتاج وزگە جاندارعا قول ۇشىن سوزا الاتىنداي دارەجەدە بولسام، باقىت - سول. ويتكەنى بىرەۋگە جاقسىلىق جاساپ، ونىڭ جۇزىنەن ريزالىق پەن قۋانىشتىڭ بەلگىسىن كورۋ زور عانيبەت قوي. باقىتتىڭ بالىن تاتتىم دەپ وسىنى ايتۋعا بولادى.
ال كەڭ ماعىنادا ناعىز باقىت بۇل - انا تىلىڭدە ويىڭدى جەتكىزە الۋ، ەكىنشى ءبىر اداممەن بوتەن ءتىلدى ارالاستىرماي، قازاق تىلىندە اڭگىمە قۇرۋ. ناعىز باقىت بۇل - ەلىڭە، ونىڭ دامۋىنا پايداڭدى تيگىزە الۋ.
باقىت اركىم ءۇشىن ءار ءتۇرلى، الايدا قانداي بولسا دا، ول ومىرگە تەك ىزگىلىك اكەلەدى، تەك قانا ونى سەزىنە ءبىلۋىمىز كەرەك. بارشا قازاققا باياندى باقىت تىلەيمىن.
You Might Also Like
-
ءار نارسەنى ۋاقىتىمەن جاساۋ-جەتىستىك پەن تابىستىڭ كىلتى.كەيبىر تۇلعالار بايلىقتىڭ كوزىن تاۋىپ، كاسىبىن جۇرگىزەدى.ال، وزگەلەرى ارەكەتتەنسە دە ماقساتىن ايقىنداي الماي، شىڭنان قۇلايدى.تابىستى كاسىپكەرل...
