بارلاۋعا شىققاندا
ال مىنا ءبىر وقيعا تولە ءبيدىڭ ابدەن قارتايعان شاعىندا بولعان ەكەن دەسەدى. قالماقتىڭ اقشىر دەگەن ءارى حانى، ءارى باتىرى «تولە ءبيدىڭ ءماميلا دەگەن قىزىن بەرسە، قولىنان، بەرمەسە، جولىنان الامىن» دەپ اۋىل ماڭىنا اق شاتىرىن تىگىپ جاتىپ الىپتى. بالپىق كەلىپ تولە بيمەن اقىلداسپاق بولعان ەكەن، «تۇرا تۇر، ەسكەلدى دە كەلىپ قالار، اقىلدى ءبىر-اق قورىتايىق» دەپتى. ايتقانداي-اق ەسكەلدى دە كەلەدى.
— نە ىستەۋ كەرەك؟ — دەگەندە، ەسكەلدى:
— سوعىسىپ قان توكپەيىك. بۇگىن ءتۇن بالپىق ەكەۋمىز ونىڭ شاتىرىنا بارامىز. ەرتەڭگىلىك ءبىر بەلگى بولىپ قالار، — دەپ، بالپىقتى ەرتىپ جولعا شىعادى. بالپىققا اتتاردى ۇستاتىپ قويىپ ەسەكەڭ ءاپپاق كويلەك-دامبالمەن شاتىرعا كىرەدى. قالماقتار قارتا ويناپ وتىرسا كەرەك، قورىققاندارىنان قوزعالا الماي قالادى. ەسەكەڭ قولىنداعى قامشىسىنىڭ سابىمەن توردە وتىرعان اقشىردىڭ تاماعىنان جۇرگىزىپ وتەدى دە، شىعىپ كەتەدى.
سول ءتۇنى اقشىردىڭ اۋزى-مۇرنىنان قان كەتىپ، زارەسى ۇشادى. دەرەۋ شاتىردى جىقتىرىپ، قايتا كوشەدى. جول ءۇستى ۇزەڭگىلەستەرى نە بولعانىن سۇرايدى عوي. سوندا اقشىر:
— تۇندەگى اق كيىممەن كەلگەن كىسىنىڭ ەكى جولبارىسى بار ەكەن. سونىڭ بىرەۋى مەنىڭ اۋزى-مۇرنىمنان قان شىعاردى. ەكىنشىسى سەندەردىڭ كوزدەرىڭدى بايلاپ تاستادى. ەندى جولىمىز بولمايدى، — دەپتى.
You Might Also Like
-
مۋزىكا- جۇرەك ءتىلى مۋزىكا ادام جانىن تەبىرەنتەتىن، ەرەكشە كۇي كەشتىرەتىن، كوڭىل-كۇي سىيلايتىن وزگە الەم. ول تاپ ءبىر ءجاننات سەكىلدى. وتە ادەمى ءارى اۋەزدى. ول الەمگە بارعاندا سەن مول باقىتقا كەنەلەسى...
-
تاعى ءبىر اڭىز بىلاي دەيدى. سىر بويىنان كوشىپ كەلگەن ەل قاراتال وزەنىنىڭ بويىنا قونىستانعان سوڭ، ەگىنشىلىكپەن اينالىسۋدى دا ويلايدى. مۇنى دا ءبىرىنشى بولىپ قولعا العان ەسكەلدى بي بولادى. ول ارىقتى قا...
