ەرتەڭ جۇرت باسقا جىلدى قارسى الادى.
تاماشالاپ، كۇي تارتىپ، ءان سالادى.
بي بيلەيدى جاستار دا، كارىلەر دە،
ۇمىت بولىپ جىل بويى شارشاعانى.
جايىلعان اق داستارقان - اق كوڭىلدەر.
اجەلەر، بالالار شات، شات كەلىندەر.
بارىڭە ايتاتىنىم - ءبىر-اق تىلەك،
ءبارىڭ دە ب ا ق كورىڭدەر!
ب ا ق كورىڭدەر!
ەرتەڭ جۇرت قارسى الادى باسقا جىلدى.
(تۇرسا ەكەن تۇمان باسپاي اسپانىمدى.)
ەرتەڭ مەن ءتۇنى بويى ۇيىقتامايمىن،
ۇمىتامىن سىرقاتتى، باستا مۇڭدى.
باسقا جىل كەلگەنىنشە جەر بەتىمەن،
قۇشاقتاپ دۇنيەنى تەربەتىلەم.
ەرتەڭ مەن بارلىعىنان ايىعامىن،
ءبىر ءسۇيىپ جاڭا كۇننىڭ كەلبەتىنەن.
بۇرسىگۇنى باسقا جىل باستالادى.
شال تۇرار،
قىراۋ-قىراۋ قاس-قاباعى.
پەنسياعا شىعۋعا تايادى قارت،
تاعىنا وتىرعىزىپ جاس بالانى.

---