InfoHub Logo

ماقساتى: ءبىلىمنىڭ سارا جولى مەكتەپتەن باستالاتىنىن، ءبىلىمنىڭ كەڭ دۇنيەدە ومىرگە ەسىك اشاتىنىن سەزىندىرۋ. بىلىمگە دەگەن قۇشتارلىعىن ارتتىرۋ، وقۋعا، ءبىلىمدى بولۋعا شاقىرۋ. مەكتەپتى، ياعني ءبىلىم ورداسىن، ۇستازدارىن قۇرمەتتەپ، ەڭبەكتى باعالاي بىلۋگە تاربيەلەۋ. اتا - اناسىنىڭ، وتانىنىڭ ادال ۇل - قىزى بولۋىنا جەتەلەۋ، تاربيەلەۋ. باستاۋىش سىنىبىمەن، ءبىلىمنىڭ العاش ەسىگىن اشقان ۇستازدارىمەن قوشتاسا وتىرىپ، جوعارى سىنىپ مۇعالىمدەرىنە ءار بالانى ءوز ەرەكشەلىگىمەن تانىتۋ، ءسات – ساپار تىلەپ تابىستاۋ.
ءتۇرى: ەرتەڭگىلىك
كورنەكىلىگى: سلايد پرەزەنتاسياسى: «مەنىڭ سىنىبىم»، شارلار مەن گۇلدەر ت. ب
اۋديۆيزۋالدى قۇرالدار: مۋلتيمەديالىق پروەكتر، مۋزىكا ورتالىعى، سينتەزاتور.
بارىسى:
زالدا ا. ەڭسەپوۆتىڭ كۇيى «بالالىق شاق» اۋەنى ويناپ تۇرادى.
- سىنىپ جەتەكشىسى كەلگەن قوناقتاردى وتىرعىزىپ، كىرىسپە ءسوز سويلەيدى:
- كەشە عانا ءبىلىم ورداسىنا تارىداي بولىپ ەنىپ، جان – جاقتارىنا تاڭىرقاي قاراپ، جۇرەكسىنە تابالدىرىق اتتاعان بالاپان ەدىڭدەر. بۇگىن، مىنە، 4 جىل ءبىلىم نارىمەن سۋسىنداتقان، قالام ۇستاپ، ءارىپ تانىتقان، ءبىلىمنىڭ نەگىزى – باستاۋىش ساتىسىمەن دە قوشتاسار ءسات تاياندى. ادام ومىرىندەگى ەڭ ءبىر ءتاتتى، الاڭسىز باقىتتى شاق – بالالىق شاق. ەندەشە، سول بالالىق شاقتارىڭنان ماڭگىلىك ەستەرىڭدە قالسىن، بالالىقتىڭ جاقسى ءبىر ەلەسى بولىپ قالسىن دەگەن ماقساتپەن، بۇگىن ءداستۇرلى ۇلكەن قۋانىشتى شاراعا جينالىپ وتىرمىز.
- قۇرمەتتى، اتا - انالار، ۇستازدار، قوناقتار ارينە، باستاۋىش سىنىپتىڭ تۇلەكتەرى بۇگىنگى سالتاناتتى مەرەكەلەرىڭىز قۇتتى بولسىن!
- ولاي بولسا، قۇرمەتتى شاكىرتتەرىم ءسوز كەزەگى وزدەرىڭدە!
ۆالس اۋەنىمەن سىنىپ وقۋشىلارى ورتاعا كەلىپ، بيلەيدى.
اۋەننىڭ سوڭىندا ساحناعا شىعىپ، توردەن ورىن الادى.

ايماعانبەت:
- اسسالاۋماعالەيكۋم، اعايىن!
ءزايراش:
ارمىسىزدار، مۇعالىمدەر ءاز جاندار
ءبىلىم ىزدەپ، ينەمەن قۇدىق قازعاندار!
قۇشاق جايا قارسى الامىز سىزدەردى
بي بيلەيىك، ءان دە بۇگىن شىرقالار!
- «سالەم – ءسوزدىڭ اناسى» - دەمەكشى، ارمىسىزدار، اياۋلى ۇستازدار مەن اق جاۋلىقتى انالار، ارداقتى اكەلەر!
اقىلتاي:
ارمىسىزدار!
جارىق ساۋلە كوبەيسىن!
ارمىسىزدار! ارمىسىزدار!
اسەم اۋەن توگىلسىن! ورتا تولسىن، جول اشايىق!
ارايلىم:
- قادىرمەندى قوناقتار، ءبىز بۇگىن ەڭ العاش قالام ۇستاپ، الىپپەمىزدى ۇسىنعان ۇستازىمىزعا راحمەت ايتۋ سالتاناتىنا جينالىپ وتىرمىز!
جاننۇر:
- سونىمەن، « باستاۋىشىم - باقىتتى شاعىم» اتتى ەرتەڭگىلىگىمىزدى باستاۋعا رۇقسات ەتىڭىزدەر!
عازيز: بۇگىن بىزدە ۇلكەن قۋانىش، ۇلكەن توي!
الماس: بۇگىن قىزىق، بۇگىن توي،
بىزدەر ءۇشىن ءبىلىپ قوي.
تويعا شاشۋ شاشايىق
شىرقاپ انگە سالايىق.
(شاشۋ شاشىلادى)
ايماعانبەت:
- «ءبىر كۇن تانىستىققا، قىرىق كۇن سالەم» دەمەكشى، ءبىز وسى قاي مەكتەپتە وقيمىز؟
ءزايراش:
- «مەكتەپ – عىلىم پاتشاسى» ەمەس پە؟ ءبىز كەڭەس وداعىنىڭ باتىرى نۇركەن ءابدىروۆ اتىنداعى № 10 ورتا مەكتەپتىڭ 4 «ءا» سىنىبىندا وقيمىز.
ايماعانبەت:
- «جاس كەلسە – ىسكە» دەمەكشى، بۇل مەكتەپ ۇستازدارىنىڭ دەنى جاستار. «ۇستازى جاقسىنىڭ - ۇستامى جاقسى»- دەگەن عوي.
جاننۇر
- «وقۋ ءبىلىم – بۇلاعى، ءبىلىم - ءومىر شىراعى» - دەگەن، بۇل مەكتەپ تالاي جاس بۇلدىرشىندەردى ءبىلىم نارىمەن سۋسىنداتىپ، ازامات قاتارىنا قوسىپ كەلەدى.
اقىلبەك:
- مىنە، ءبىزدىڭ دە وسى كيەلى شاڭىراقتىڭ تابالدىرىعىن اتتاعانىمىزعا دا 4 جىل بولىپتى.
ءان: «مەكتەبىمىز – كەمەمىز»
ءزايراش:
كوتەرىپ جۇكتىڭ سالماعىن
جولىندا ءومىر تالمادىڭ.
مەيىرىمىڭ قانداي شۋاقتى
ۇستازىم، اسىل ارداعىم!
اسەم:
ەسىڭدە مە ۇستازدىڭ العاش قارسى العانى،
ايقارا ەسىك اشىپ تاستاعانى.
ءبىر مەرەكە دۋمان بوپ وسى ماڭدا،
جەتەلەپ ءبىر سىنىپقا اپ بارعانى.
ءان: «باستاۋىش سىنىپ ءۆالسى»
الماس:
ءيا، عۇلاما بىلگىش، عالىمنان،
وقۋشى جاس جالىننان
اسا ءىرى ويشىلدان،
پرەزيدەنت، اقىننان،
عارىشكەر ۇلى باتىردان،
ونەرى تاسقان اكتەردەن،
مىڭ بۇرالعان بيشىدەن
وي تەربەتكەن كۇيشىدەن،
وقىعان جاس - كارىدەن،
وقۋشىنىڭ بارىنەن
حورمەن: «ۇستازدارعا مىڭ العىس!»
ارايلىم:
جىلدار، جىلدار وتسە دە كوپ،
ۇمىتپايمىز ماڭگىلىك.
قانشا ومىردە ەتسەڭ ەڭبەك،
ۇستاز سەنىڭ ۇلەسىڭ مول.
اياۋلىم:
بار ءبىلىم باستاۋىشتان باستالادى.
شىعارمىز شىڭعا بيىك اسقارالى.
تىنىمسىز ىزدەنىستى ەڭبەگىڭىز
جىبەك اپاي، ءالى - اق اقتالادى.
ۇمىتپاس تۇلەكتەرىڭ، ءسىزدى جىبەك اپاي،
قولىنا العاش قالام ۇستاتقاندى.
الدىڭىزدا ءارقاشان تاعزىم ەتىپ،
تۇرادى «ۇستازىم» دەپ باسىن ءيىپ.
عازيز:
ەردىڭ قۇتى ءسانى دە
ەلدىڭ كۇي مەن ءانى دە،
كەزەك بەرەم ءان - كۇيگە
مۋزىكانىڭ پانىنە
ەسىڭدە مە، ءان ساباعى
جىبەك اپاي ودان ءدارىس بەرگەنى
باسىڭدى ءيىپ العىسىڭدى ايتارسىڭ
ەڭبەگىن دە ۇستازدىڭ سەن اقتارسىڭ!
«گرۋزين» ءبيى
قول سوعىپ ورتاعا شاقىرايىق.
عازيز:
بار كىتاپقا باس بولعان،
الىپپە – عىلىم داناسى.
الىپپەنى قۇرمەتتەپ،
جوعارى ورىنعا قويامىز!
اياۋلىم:
- سونىمەن 4 جىل بويى ءبىز: انا ءتىلى، قازاق ءتىلى، ورىس ءتىلى، ماتەماتيكا، دۇنيەتانۋ، مۋزىكا، تەحنولوگيا، دەنە تاربيەسى، بەينەلەۋ ونەرى پاندەرىنەن ءبىلىم نارىمەن سۋسىنداپ كەلدىك.
جاننۇر:
ايگەرىم مۇعالىمگە:
اعىلشىنشا وقىدىق ءتىلىن بىلدىك،
دىبىستاردى تالدادىق، سىرىن بىلدىك.
سونىڭ ءبارىن جالىقپاي، ءتۇسىندىردىڭ
سونىڭ ءبارىن بىزدەرگە ۇعىندىردىڭ.
اسەم:
ايگۇل مۇعالىمگە:
بۇلبۇل ءۇنىن قانشالىق،
تىڭداپ جۇردىك تامسانىپ.
اقىرىندا ۇيرەتتىڭ
تامىلجىتا ءان سالىپ.
ءزايراش:
سايلاۋگۇل مۇعالىمگە:
كوڭىلىن بار شاكىرتتىڭ تابا الاتىن،
كەۋدەلەرگە نامىس وتىن جاعا الاتىن.
وزىڭدەي بولسا، شىركىن، بارلىق ۇستاز
قولى شەبەر، كۇمىس كومەي، ءسوزى التىن.
اقىلبەك:
ايناگۇل مۇعالىمگە:
ەندى مىنە، ساعىمداي وتە شىقتى،
4 جىل ۋاقىت از با ەكەن كىم ءبىلىپتى؟
ۇستاز - انا جاسادى مىنا بىزدەن
ەل تانيتىن، ازامات، ءبىر - ءبىر مىقتى.
حورمەن: «ءپان مۇعالىمدەرىنە مىڭ العىس!»
حالىق ءانى «قارا جورعا»
ءان: «التىن ۇيا مەكتەبىم»
ورىندايتىن: حور
اقىلبەك:
ۇلكەندى سىيلاۋ – قازاق حالقىنىڭ اتا سالتى. ۇلكەندى سىيلاۋ ەڭ الدىمەن اكە مەن شەشەڭدى سىيلاۋدان باستالادى.
اسەم:
بالا اتا - انا ىسىنەن كوپتى ۇيرەنىپ قانا قويماي،
ولاردىڭ تاربيەسىن دە بويعا سىڭىرە بىلەدى. سوندىقتان 4 جىل بويى وقىعاندا اتا - انانىڭ دا ەڭبەگى مول.
حورمەن: «اتا – انا، سىزگە مىڭ العىس!»
كەلەسى ءان اتا - انالاردىڭ قۇرمەتىنە ارنالادى.
ءان: «اكەشىم - اناشىم»
ورىندايتىن: ايماعانبەت پەن اقىلبەك
ءان: «اجە»
ورىندايتىن: ارايلىم اعىباي قىزى
«وزبەك» ءبيى بيشىلەر توبى
ورتاعا مەكتەپ تابالدىرىعىن اتتاعالى وتىرعان مەكتەپالدى دايارلىق توبىنىڭ تاربيەلەنۋشىلەرىن شاقىرامىز. ولەڭ جولدارىن وقيدى. باستاۋىش سىنىپ تۇلەكتەرى ەستەلىكتەر تاپسىرىپ، ءان جولدايدى.
ءان: « تۇساۋ كەسەر»
ءان: «بالا تىلەگى»
ايماعانبەت:
ەسىڭدە بولار، مەكتەپكە العاش كەلگەنىڭ،
ۇركە قاراپ، ەسىگىن ءبىلىم اشقانىڭ.
سول ءبىلىمنىڭ بۇلاعىنا شومىلتقان
ۇستازداردى ۇمىتپاعىن، دوستارىم!
اقىلبەك:
جانىم تولقىپ، لۇپىلدەيدى جۇرەگىم،
بويىم ءوسىپ، ويىم تولىپ، تۇلەدىم.
ءبىرى قۇربى، ءبىرى شىن دوس ءبىز ءۇشىن
بولامىز ەندى جوعارى سىنىپ تۇلەگى.
ارايلىم:
العاشقى ۇستازىمىزدىڭ
ارداقتايمىز اتىن ءبىز.
ۇقساپ سۇيىكتى اپايعا
ءوسىپ كەلە جاتىرمىز.
ايماعانبەت:
ءبىر ۇيادان تۇلەپ ۇشقان قۇستارمىز
جاقسىلىقپەن ادالدىققا قۇشتارمىز.
ەڭبەك پەنەن تىرشىلىككە ءسان بەرسىن،
دوستىق تۋىن ءار كەز بيىك ۇستارمىز.
ءان: «باتىر باۋىرجان»
ورىندايتىن: حور
وقۋشىلار اعىلشىن تىلىندە ءان سالىپ، ولەڭ شۋماقتارىن ايتىپ، شاعىن كورىنىس قويادى.
ايماعانبەت:
قوشتاسۋ كەشى قوبالجىتادى،
كوپ كۇتكەن ەدىك ەمەس پە؟
كوزىندە بالالاردىڭ جاس مولدىرەيدى
ۇمىتىلمايدى بۇل ەستە.
اسەم:
ۇستاز!
بىزگە ەتكەن ەڭبەگىڭدى جەتكىزەر،
اۋزىمىزعا ءسوز تۇسپەيدى، ۇستازىم!
ءسوز دە ءتىپتى، قاجەت ەمەس اتىڭدى
شىعارامىز مىنا بىزدەر
ەڭبەگىڭنىڭ جەمىسىن.
اياۋلىم:
سەنىڭ ءىسىڭ ەرلىكتەيىن باعالى،
ءىزى ماڭگى جۇرەكتەردە قالادى.
جۇلدىزدى ءىسىڭدى
بيىك، قاتال، جارقىن، تازا ۇستازىم،
عالامداعى
قاسيەتتىگە بالادىم!
ءزايراش:
سوندىقتان دا بۇل ءساتتى قاسيەتتەپ،
ماڭگى ساقتاپ قالارمىز جۇرەكتە ءبىز.
قوش ايتىسىپ سوڭعى رەت وسى جەردە
«مىڭ العىس، باستاۋىشىم، ساعان!» دەيمىز
سەنەن العان بىلىمگە دە راحمەت!
سەنەن تاپقان دوستارعا دا راحمەت!
باستاۋىشىم، قوشتاساردا تاعى دا
ءجۇز قايتارا ايتارىمىز راحمەت!
سىنىپ ءمۇعالىمى وقۋشىلاردىڭ 4 جىل بويى جەتكەن جەتىستىكتەرىنە توقتالىپ، وقۋشىلاردىڭ «بالاۋسا» اتتى شىعارماشىلىق جۇمىستارىنىڭ جيناعىمەن تانىستىرىپ وتەدى.
قازىرگى زامان ءبيى
سىنىپ ءمۇعالىمى اتا - انالار مەن ءپان مۇعالىمدەرىنە ارناپ ساۋالدار قويادى.
ءان: «العاشقى ۇستازىم!
ءان: «ۇستازىم»
- ويتولعاۋ، شىعارماشىلىق جۇمىستارىمەن سىنىپ وقۋشىلار ورتاعا شاقىرىلادى.
- اتا – انالاردان تىلەك پەن باتا سۇرالادى.

قاراعاندى وبلىسى، قارقارالى اۋدانى،
نۇركەن اۋىلى. باستاۋىش سىنىپ ءمۇعالىمى
نۇرماعانبەت جىبەك سەرىك قىزى