بەس قىز (ءىى نۇسقا)
...سەيتەك ناعاشىسى داۋلەتياردىڭ سىيعا بەرگەن ىڭگەنشەسىنە ءمىنىپ اۋىلىنا قايتقاندا، جولشىباي جانىندا ءبىر توپ شابارماندارى بار ارسىلانكەرەي كەزدەسىپ، سەيتەكتىڭ استىنداعى ىڭگەنشەنى تارتىپ الادى. سونى كەك ساقتاپ قالعان سەيتەك جانىنا ساحاماندى ەرتىپ بارىمتاعا اتتانادى. تورە ارسىلانكەرەيدىڭ جايىلىستا جۇرگەن ءبىر ءۇيىر جىلقىسىنان ەكى سەمىز اتتى الىپ كەلەدى دە، ىڭگەنشەنىڭ قۇنى ءۇشىن دەپ كەدەيلەرگە سويىپ بەرەدى. وسىنى سىلتاۋ ەتكەن تورەلەر ەندى سەيتەكتىڭ سوڭىنا شىراق الىپ تۇسەدى.
«اڭدۋشىنى الۋشى جەڭەدى» دەپ حالىق ايتقانداي، ىزگە تۇسكەن تورەلەر اقىرى قالماي ءجۇرىپ، سەيتەكتى قاپىلىستا ۇستاپ، وردانىڭ تۇرمەسىنە جابادى. ءبىراق سەيتەك تۇرمەدە كوپ جاتپاي قاشىپ شىعادى... وسى بەتىمەن ۇيىنە سوقپاستان نارىن قۇمىنا كەتەدى. ەدىل بويىن، قالماق قىرىن تۇگەل ارالايدى، دەلىنگەن ەدى.
سەيتەك قالماق جەرىندە جۇرگەندە ءبىر ۇيگە كەلسە، ۇيدە بەس قىز ءىس تىگىپ وتىر ەكەن. ءبىراق سەيتەك بۇلارعا شولدەپ، سۋسىن ىشۋگە كەلگەنىن ايتادى. سول كەزدە، وتىرعان قىزداردىڭ بىرەۋى ورنىنان تۇرىپ، شالاپ بەرمەكشى بولىپ جۇرە بەرگەندە سەيتەكتىڭ قولىنداعى دومبىراسىن كورىپ: «ءسىز بىزگە ساز تارتىپ بەرمەسەڭىز، ۇيدەن شىعارمايمىز»، — دەپ قالجىڭدايدى. مۇنداي قالجىڭنىڭ تالايىن كورگەن سەيتەك، سۋسىنعا قانىپ العاننان كەيىن، تاماعىن كەنەپ: «ەگەر سەندەر بيلەيتىن بولساڭدار، مەن ساز تارتايىن»، — دەيدى.
وسىنى ەستۋى-اق مۇڭ ەكەن، قىزدار ورىندارىنان ۇشىپ تۇرىپ، بيلەۋگە دايىندالادى. بۇل جاعدايدى كورگەن سەيتەك، كيىز قاپتان دومبىرانى شىعارىپ الىپ، ءبىر كۇيدى تارتىپ جىبەرەدى. كۇيدىڭ اسەم سازىنا بەس قىز ۇرشىقتاي ءۇيىرىلىپ بيلەي جونەلەدى. كۇيدىڭ مۋزىكالىق ۇنىندە قالماق سازىنا جاقىن كەلەتىن ەلەمەنتتەر مول بولعاندىقتا با، ايتەۋىر، وسى ءبىر كۇيدىڭ سازى قىزدارعا قاتتى ۇناپ قالادى. سەيتەك دومبىراسىن قۇيقىلجىتىپ، ءبىراز تارتىپ-تارتىپ توقتاعان كەزدە قىزدار سەيتەكتى ورتاعا الىپ: «بۇل نە دەگەن كۇي، اتى قالاي؟» — دەپ سۇرايدى. اياق استىنان قويىلعان مۇنداي ساۋالعا بىردەن نە دەرىن بىلمەي قالعان سەيتەك، ءسال كىدىرەدى دە: «وسى وتىرعان بەسەۋىڭە ارناعان «بەس قىز» اتتى كۇيىم بولسىن»، — دەپ ۇيدەن شىعىپ كەتەدى...
You Might Also Like
-
جايىق بويىندا وتىراتىن داۋلەتى شالقىپ، ىرىسى ارتقان بايعۇمار دەگەن كىسىنىڭ دومبىرا شەرتىپ، كۇي شىعارىپ اتى شىققان اقىلى مەن سىمباتى سايكەسكەن ايشا دەگەن ءوزى زەرەك، ءوزى سۇلۋ قىزى بولعان ەكەن.
-
ەلباسىمىزدىڭ بولاشاققا باعدار اتتى ماقالاسىنان وي تۇيە كەلە ءوزىمىزدى رۋحاني جاعىنان جاڭعىرتۋىمىز كەرەك ەكەن. سەبەبى قازاقستان ساياسي جانە ەكونوميكالىق جاعىنان دامىپ كەلە جاتقانىمەن رۋحاني جاعىنان دا...
