InfoHub Logo

قانشا قيىندىق كورىپ، تاۋقىمەت تارتسا دا، سەيتەك سالى سۋعا كەتەتىن جان ەمەس-تىن. جاسى الپىسقا تايانسا دا بويىندا كۇشى مول، قايراتتى، ءاجۋالاعىسى كەلگەندەرگە اقىسىن جىبەرە قويمايتىن. وسى ءسوزىمدى تىرىلتەيىك. ءبىر كۇندەرى سەيتەكتىڭ اۋلىنا اۋزىندا بەيپىل ءسوز، قولىندا جالاڭداعان پىشاعى بار، ەلدى ۇركىتىپ، قورقىتىپ ءبىر ەسەرسوق جاس جىگىت كەلە قالادى. سەيتەك ءبىر دوسىنىڭ ۇيىندە شاي ءىشىپ وتىرعان. بابىمەن شاي ءىشىپ، بالقىپ وتىرعاندا بىرەۋ-مىرەۋ كەلىپ مازاسىن السا، ونداي ادامنىڭ سىباعاسىن بەرەتىن. الگى جىگىت تە ۇيگە ءدال وسىنداي ساتتە باسا كوكتەپ كىرىپ كەلىپ ەدى. كوزىنىڭ ەتى وسكەن كورگەنسىز، كەلە «الجىعان قاقباس» دەپ سەيتەكتى جەردەن الىپ، جەرگە سالدى. سەيتەك اۋەلى ۇندەمەي، جايباراقات شايىن ۇرتتاپ وتىرا بەرگەن. جىگىتتىڭ ودان سايىن جىنى كەلەدى. ەندى ۇيدەگىلەردى تۇگەل سىپىرتىپ شىعىپ، شاي قۇيىپ وتىرعان وسى ءۇيدىڭ كەلىنى ءشاريپاعا تيىسە بەرگەندە، سەيتەك اقىرىن عانا وعان: «قاراعىم، شايىڭدى ءىش، سۋىپ قالدى. شاماسى جوق شالدار مەن ءالجۋاز ايەلدەرگە ۇرىنىپ نە قىلاسىڭ، ءوزىڭ قايراتتى بالا كورىنەسىڭ، شىراعىم»، — دەيدى. ۇر دا جىق، الاڭعاسار جىگىت ءسوز استارىن تۇسىنە مە، ورنىنان اتىپ تۇرىپ، «ءا، سايتان شال، سەن ماعان اقىل ۇيرەتپەكشىمىسىڭ؟!» دەپ اتاسىنداي سەيتەككە دۇرسە قويا بەرىپ، پىشاق الا ۇمتىلعان. سەيتەك كوز ىلەسپەس شاپشاڭدىقپەن پىشاق ۇستاعان قولىن شاپ بەرىپ، قايىرىپ جىبەرەدى دە، پىشاعىن جۇلىپ الادى. سوسىن اكىرەڭدەگەن نەمەنى اياعىنىڭ استىنا باسىپ وتىرىپ، اسىقپاي شايىن ىشە بەرەدى. شايىن ءىشىپ بولعان سوڭ سەيتەك الگى جىگىتتى تۇرعىزىپ، ءبىر نۇقىپ قالىپ ەدى، قاڭباقتاي ۇشىپ بارىپ ەسىكتىڭ ارجاعىنا توپ ەتە ءتۇستى. سول جاتقاننان ول تىرپ ەتپەي ءبىراز جاتتى. جۇرگەن جەرىندە جۇرتتىڭ بەرەكەسىن قاشىرىپ، زارەسىن ۇشىراتىن جەتەسىزدىڭ بۇل ۇيگە دە كىرىپ كەلىپ سويقان سالماق بولعان ءتۇرىن كورگەندە جۇرەگى تاس توبەسىنە شىققان ءشاريپا ونىڭ اق سايتانىن قاعىپ العان سەيتەكتىڭ ەرلىگىنە قايران قاپ، العىسىن بىلدىرەدى. ايتسە دە، «داستارحاننىڭ شىرقى بۇزىلماسىن، تەنتەك تە بولسا قوناق قوي، شاي ءىشسىن، رۇقسات ەتىڭىز»، — دەپ كەلىنشەك سەيتەككە قيىلا تىلەك ايتتى. ءشاريپانىڭ مىنا اقىلدىعى مەن قايىرىمدىلىعىنا ريزا بولعان كۇيشى سول جەردە ءشاريپاعا ارناپ ءبىر كۇي تارتادى. ەل اراسىنا دا سول اتپەن تاراپ كەتكەن.

---