InfoHub Logo

قازاقستاننىڭ قۇرىلىس سەكتورى 2025 جىلى 15،9% ءوسىم كورسەتىپ، بارلىق سالالار اراسىندا ۇزدىكتەردىڭ ءبىرى بولدى. وسى سالانىڭ ەڭ ءىرى سالىق تولەۋشىسى رەتىندە ايدىن راقىمبايەۆتىڭ BI Group كومپانياسى تانىلدى. اتالعان كومپانيا بيۋدجەتكە 90 ميلليارد تەڭگە سالىق تولەگەن، بۇل كورسەتكىش باسەكەلەستەرىنەن الدەقايدا اسىپ تۇسەدى.

بۇل تۋرالى Infohub.kz اقپارات اگەنتتىگى حابارلايدى.

سوڭعى ءبىر جىلدا BI Group كومپانياسىنىڭ سالىق تولەمدەرى 40%-عا جۋىق ارتقان. ال بەس جىل ىشىندە كومپانيا بيۋدجەتكە شامامەن 300 ميلليارد تەڭگە اۋدارعان.

باسقا ءىرى سالىق تولەۋشىلەر

ەكىنشى ورىندى رەسپۋبليكالىق جانە حالىقارالىق ماڭىزى بار اۆتوجولداردى باسقاراتىن ۇلتتىق وپەراتور «قازاۆتوجول» يەلەندى. كومپانيا 28،2 ميلليارد تەڭگە سالىق تولەدى.

ۇزدىك ۇشتىكتى تاۋ-كەن سالاسىندا جۇمىس ىستەيتىن «سەنىمدى قۇرىلىس» كومپانياسى (ادىلبەك شانقوزوۆ) تۇيىندەدى. ول 26،3 ميلليارد تەڭگە تولەگەن. بۇل سوما وتكەن جىلمەن سالىستىرعاندا 54،5%-عا ازايعان. Adata دەرەكتەرى بويىنشا، كومپانيا 2025 جىلدىڭ ناۋرىز ايىندا ەسەپتەن شىعارىلعان، ياعني باسقا قۇرىلىممەن بىرىككەن نەمەسە قوسىلعان.

العاشقى بەستىككە سونداي-اق BAZIS-A كومپانياسى (الەكساندر بەلوۆيچ) 24،2 ميلليارد تەڭگەمەن جانە Integra Construction KZ كومپانياسى (شاحمۇرات مۇتاليپوۆ) 22،7 ميلليارد تەڭگەمەن كىردى. سوڭعى كەزدە شاحمۇرات مۇتاليپوۆ Glencore-دان «قازسينك» ۇلەسىن ساتىپ الۋ جانە پاتوح شودييەۆ پەن مارقۇم الەكساندر ماشكيەۆيچتىڭ مۇراگەرلەرىنەن ERGء-نىڭ 40% ۇلەسىن ساتىپ الۋ مۇمكىندىگىنە بايلانىستى ءجيى جاڭالىقتاردا كورىنەدى.

سالانىڭ جالپى سالىقتىق ۇلەسى

2025 جىلى ەلىمىز بويىنشا ەڭ ءىرى 26 قۇرىلىس كومپانياسىنىڭ سالىق تولەمدەرىنىڭ جالپى سوماسى 312 ميلليارد تەڭگەدەن استى. بۇل كورسەتكىش وتكەن جىلمەن سالىستىرعاندا 10%-عا ارتقان.

ايدىن راقىمبايەۆ – BI Group كومپانياسىنىڭ اكسيونەرى جانە باس ديرەكتورى. توپ قازاقستان، وزبەكستان، اقش، ءباا ەلدەرىندە جوبالار جۇزەگە اسىرىپ، بيىل ءازىربايجان نارىعىنا شىقتى. 2025 جىلى Forbes نۇسقاسى بويىنشا ەڭ باي قازاقستاندىقتار تىزىمىندە 967 ميلليون دوللارمەن 10-ورىندى يەلەنسە، جۋىردا Forbes جۋرنالىنىڭ جاھاندىق تىزىمىنە العاش رەت ەندى. ول 2026 جىلى 1،1 ميلليارد دوللار بايلىعىمەن 3185-ورىنعا جايعاستى.

قۇرىلىس سالاسىنىڭ ءوسىمى

2025 جىلدىڭ قورىتىندىسى بويىنشا قۇرىلىس سەكتورىنىڭ جىو-دەگى ۇلەسى 6،1% نەمەسە 9،6 ترلن تەڭگەنى قۇرادى. پايدالانۋعا بەرىلگەن تۇرعىن ءۇيدىڭ جالپى اۋدانى 20 ميلليون شارشى مەتردەن اسىپ، 2024 جىلمەن سالىستىرعاندا 5،1%-عا كوبەيدى. بۇل رەتتە، تۇرعىن ءۇيدىڭ 90%-ىن جەكە قۇرىلىس سالۋشىلار پايدالانۋعا بەردى.

ەلدىڭ تۇرعىن ءۇي قورى 13 ميلليون شارشى مەترگە ۇلعايىپ، 447،3 ميلليون شارشى مەترگە جەتتى. ءبىر تۇرعىنعا شاققانداعى تۇرعىن ۇيمەن قامتاماسىز ەتۋ 25،1 شارشى مەتردى قۇرادى، بۇل وتكەن جىلمەن سالىستىرعاندا 0،6 شارشى مەترگە ارتىق. قالالاردا بۇل كورسەتكىش 27،4 شارشى مەترگە، ال اۋىلدىق جەرلەردە 21،3 شارشى مەترگە جەتتى.

بۇعان دەيىن «كۋرسيۆ» 2026 جىلى قازاقستاندا 18،5 ميلليون شارشى مەتر تۇرعىن ءۇي پايدالانۋعا بەرۋ جوسپارلانعانى تۋرالى جازعان بولاتىن.