InfoHub Logo

ارمان شىركىننىڭ نە ەكەنىن ادام اتاۋلى ءاۋ باستان بىلسە دە، ءتۇر-تۇسى قانداي ەكەنىن، نەمەن ولشەنەتىنىن بىلگەن، ايتقان ءتىرى جان جوق. وسى مەنىڭ... «جىنىما ءتيدى» دەمەي-اق قويايىن، نو نامىسىما ءتيدى. سونسوڭ قولىما تۇسكەن-تۇسپەگەن ەسكى-جاڭا، ارزان-قىمبات، قالىڭ-جۇقا كىتاپتاردى، ارينە، عاسىر عۇلامالارى جازعاندارىن، ءبىر كۇن، ءبىر ءتۇن تۇپ-تۇگەل اقتارىپ، «ارمان» دەگەن اققۋداي اسەم ءسوزدى اۆتورلاردىڭ ەشبىرىنىڭ اۋزىنان تابا المادىم. تىم بولماسا ارماننىڭ ءتۇسى اپپاق ەكەنىن ءبىزدىڭ اقىندار عۇرلى ايتساشى!.. قانىم قايناماعانمەن، كۇلكىم كەلدى. وپ-وڭايدى قيىنداتا سالعىشپىز-اق! كانەكي، مەن ءبىر ارماندى اڭىراتايىن، ونى نەمەن ولشەۋدى مەن توقتاعاننان كەيىن كەڭەسەرمىز. مەنىڭ زاۋلاتپاعىم – ءبىر اۋدان اكىمىنىڭ ارمانى.

وبلىستىڭ اكىمى شومشەكبايدىڭ تاڭداۋىمەن اۋدان اكىمى اتاعىن العان كومىرباي قوعامدىق مىندەتىن جارتى جىل بويى جالىقپاي اتقاردى دا، ءبىر كۇنى ورازاسىن ارمانمەن بىلايشا اشتى: «ۋا، جالعان دۇنيە، سەن وتەرسىڭ دە كەتەرسىڭ، بىلەم عوي، بىلەم! ال مەنىڭ سەنىمەن بىرگە وتكىم دە، كەتكىم دە كەلمەيدى. مىناۋ جارىق الەمدە تىرىدەي ءوزىم قالا الماسام دا، اتىمدى قالدىرۋىم كەرەك! قاشان؟.. قالايشا؟.. تا-ا-اك... الدە تاريحي سوزدەرىممەن بە... ءاي، ونى قويا تۇرايىن، ەكىنىڭ ءبىرى سارقىراتىپ جۇرگەن سۋ ءسوز، بۇرقىراتىپ جۇرگەن بۋ ءسوز ەشقايدا قاشپايدى، تاۋسىلىپ قالمايدى، زناچيت، مەن سوزدەن ىسكە كوشەيىن. مىسالى، مەن «اۋداننىڭ ارداقتى ازاماتى» اتاعىن السام... «بەيبىتشىلىك كوشەسى» دەلىنگەن باس كوشەگە مەنىڭ اتىم قويىلسا... مەن تۇرعان ءۇي «اۋداندىق مۇراجايعا» اينالدىرىلىپ، الدىنا گۇلدى الاڭ جاسالىپ، ونىڭ قاق ورتاسىنا مەنىڭ تىك تۇرعان كەسكىن-ەسكەرتكىشىم ورناتىلسا... اۋداننىڭ قۇرامىنداعى ون ءتورت اۋىلدىڭ ورتالىق كوشەلەرىنە مەنىڭ اتىم بەرىلسە... مەنىڭ اۋىلىمداعى باستاۋىش مەكتەپكە، اۋدان ورتالىعىنداعى ءونبىرجىلدىق مەكتەپكە مەنىڭ اتىم قويىلسا... ە، ءيا، ايتپاقشى، - اۋىلداعى مەكتەپ الاڭىنا مەنىڭ قاتتى ويلانىپ وتىرعانداي ەسكەرتكىشىم ورناتىلسا... زەينەتكە شىققانىما دەيىن قالايدا اكادەميك بولىپ السام... اتا-بابام، اكە-شەشەم، اعا-اپايلارىم، ءوزىم جايىندا اناۋ نۇركۇسشە جازعىش بىرەۋدى جالداپ الىپ، ارينە، ەشكىمگە بىلدىرمەي، قالىڭ-قالىڭ كىتاپتار شىعارتسام... اقىن اتاعى شىعا باستاعان شۇڭگىلبايمەن شۇيىركەلەسىپ، بۋىن-بۋىنىن بوساتىپ، تاڭداۋلى ولەڭدەرىنىڭ بىرىنە قوسىمشا اۆتور اقىن بولسام، دۇڭگىلبايدىڭ ءتىلىن تاۋىپ، جاڭا رومانىنا قوسىمشا اۆتور پروزايك بولسام... وسىلاي ىستەۋىم كەرەك! وبلىس اكىمدەرىن، قۇدايعا شۇكىر، اسىقشا قاقپاقىلداپ وتىرعان، ماعان جول اشىپ بەرىپ جۇرگەن ناكەڭ امان-ەسەندە مەنىڭ بەتىمە جەل تيمەيدى، تولكو اقىلداسىپ الىپ، تەز كىرىسۋىم كەرەك! كىرىسەر قارساڭدا قالتا ماسەلەسىن شەشىپ الۋعا ءتيىسپىن. ەشكىمگە جالتاقتاماس ءۇشىن. ءبىرتالايعا جەتەر جيناعانىم بار، ءالى دە جيناي بەرەمىن. مەندەگىدەي ءتورت بولمەلى ءۇي، ءۇش گەكتار جەر، ءۇش قابات كوتتەدج، «تويوتو» مەن «اۋدي» بار اكىم ساپسەم از. اي-حوي، شىركىنو-و-وي، وبلىستىڭ ويى مەن قىرىن تەگىستەپ تالتاڭداپ جۇرگەن ميلليونەرلەردىڭ بىرىمەن قۇدا بولسام عوي!.. «قاتىن الما، قايىن ال» دەگەن اتالى ءسوزدى ۇقپاي قويعان ۇلىما سولاردىڭ ءبىرىنىڭ، ءتىپتى بايدان قايتىپ كەپ وتىرعان قىزى بولسا دا، الىپ بەرسەم... قىزىمدى دا سونداي ءبىر شىلقىماي جەرگە قوندىرسام... ءساتى ءتۇسىپ، پرەمەر-مينيسترمەن، پرەزيدەنتپەن قۇدا بولسام، ەح-حە-حە... ەكى دۇنيەدە ارمانىم بولماس ەدى!.. وعان دەيىن پارلامەنتىڭ سەناتىنا دەپۋتات بولا قالسام!..».

ءجا، اۋدانباسىنىڭ ءالاۋلايىن وسى تۇسىندا توقتاتايىن، بۇيتپەسەم، ءحالاۋلايىن ەشقايدا، ەشنارسەگە سىيدىرا الماسپىن، وسىنىسىنىڭ ءوزى ءبىر دوربا بولدى. ءيا، ءبىر دوربا! سەنبەگەندەر، پاجالىستا، وزدەرى ولشەپ السىن!

---