بىزگە شەتەلدەن كيبەر-شابۋىل جاسالدى - ءبىلىم مينيسترلىگى
ورتالىق كوممۋنيكاسيالار قىزمەتىنە كەلىپ، جۋرناليستەردىڭ سۇراعىنا جاۋاپ بەرگەن ءبىلىم جانە عىلىم ۆيسە-مينيسترى ەلميرا سۋحبانبەردييەۆا ۆەدومستۆونىڭ سايتىنا شەتەلدەن DDOS شابۋىلى جاسالعانىن ءمالىم ەتتى.
«وتكەن سەنبىدەن جەكسەنبىگە قاراعان ءتۇنى ءبىلىم جانە عىلىم مينيسترلىگىنىڭ سايتىنا DDOS شابۋىلى جاسالدى. سايت جۇمىسى كەلەسى كۇنى قالپىنا كەلتىرىلدى. الدىن الا مالىمەت بويىنشا، شابۋىل شەتەلدىك سەرۆەردەن جاسالعان. وسى كيبەرشابۋىل اقپارات قۇرالدارى مەن جەلىلەردە جالعان اقپارات تاراتۋمەن قاتار كەلىپ وتىر. بۇل - ءبىلىم جانە عىلىم سالالارىن دامىتۋ باعدارلاماسىنىڭ بەدەلىن تۇسىرۋگە باعىتتالعان قادام»، - دەيدى ۆيسە-مينيستر.
ءقازىر مينيسترلىك قۇزىرەتتى ورگاندارعا شارالار قولدانۋ ءۇشىن جۇگىنگەن. ال، ۆيسە-مينيستردىڭ ايتىپ وتىرعان جالعان اقپاراتى - «2009 جىلى قابىلدانعان ماماندىقتار كلاسسيفيكاتورى وزگەردى» دەگەن اقپارات.
«ءبىلىم جانە عىلىم مينيسترلىگى پرەزيدەنتتىڭ تاپسىرمالارىن ىسكە اسىرۋ ءۇشىن قاجەتتى شارالاردى قولعا الىپ جاتىر. الايدا سوڭعى كۇندەرى اقپارات قۇرالدارىندا، الەۋمەتتىك جەلىلەردە جالعان اقپارات تاراتۋ جانە ارانداتۋ فاكتىلەرى بولعانىن بىلەسىزدەر. بۇل ءبىلىم جانە عىلىم سالالارىن دامىتۋ باعدارلاماسىنىڭ بەدەلىن تۇسىرۋگە باعىتتالعان قادام. مينيستر ءوز پىكىرىن ايتىپ، جاريالاعانىن بىلەسىزدەر. 2009 جىلى قابىلدانعان ماماندىقتار كلاسسيفيكاتورى وزگەرگەن جوق. قازاق ءتىلى مەن ادەبيەتى، تاريح، لينگۆيستيكا، شىعىستانۋ ماماندىقتارى دا ءوز ورنىندا. ەشتەڭە وزگەرگەن جوق، وزگەرمەيدى دە. بولاشاقتا جاڭا كلاسسيفيكاتور دايىندالعان جاعدايدا دا اتالعان ماماندىقتاردىڭ ورنى ساقتالاتىنى تۋرالى رەسمي تۇردە مالىمدەگىم كەلەدى»، - دەدى ۆيسە-مينيستر.
You Might Also Like
-
جامبىل وبلىسىنداعى ءبىلىم بەرۋ مەكەمەلەرىنىڭ قىزمەتكەرلەرى ۇستازداردىڭ كاسىبي بىلىكتىلىگىن كوتەرۋ مەن ۇزدىك يننوۆاسيالىق تاجىريبەلەرىن دامىتۋ جايىن تالقىلادى.
