InfoHub Logo

بۇگىن ورتالىق كوممۋنيكاسيالار قىزمەتىندە بريفينگ وتكىزگەن ءبىلىم جانە عىلىم مينيسترلىگىنىڭ وكىلدەرى «قازاق ءتىلى» مەن «قازاق ادەبيەتى» پاندەرى جالپى جىكتەۋىشتەن الىنباعانىن رەسمي مالىمدەدى. ءبىلىم ۆيسە-مينيسترى ەلميرا سۋحانبەردييەۆانىڭ ايتۋىنشا، وتكەن سەنبىدەن جەكسەنبىگە قاراعان ءتۇنى مينيسترلىكتىڭ سايتىنا شابۋىل جاسالعانىن، جىكتەۋىش قۇجاتتىڭ وزگەرگەنى تۋرالى اقپاراتتىڭ جالعان ەكەنىن رەسمي مالىمدەدى.

جوعارى جانە جوعارى وقۋدان كەيىنگى جىكتەۋىشتەن «قازاق ءتىلى» جانە «قازاق ادەبيەتى» پاندەرى جويىلدى دەگەن اقپارات شىققان سوڭ، ءبىر توپ اكادەميكتەر پرەمەر-مينيستر باقىتجان ساعىنتايەۆتىڭ اتىنا اشىق حات جولداعان ەدى. ءبىلىم مينيسترلىگىنىڭ جوعارى جانە جوعارى وقۋدان كەيىنگى ءبىلىم دەپارتامەنتىنىڭ ديرەكتورى دارحان احمەد-زاكي ول اكادەميكتەر قانداي ءماتىندى اشىق حاتقا قول قويعانىن تۇسىنبەۋى دە مۇمكىن دەيدى.

«ءقازىر قازاقستاندا جالعىز زاڭدى تۇردە بەكىتىلگەن قۇجات بار. ول - جوعارعى وقۋ جانە جوعارعى وقۋدان كەيىنگى جىكتەۋىش. وسى قۇجات  2009 جىلى بەكىتىلگەن، سودان بەرى وزگەرگەن جوق. وسى ماماندىقتارعا بايلانىستى كەيىن مەملەكەتتىك گرانتتار بولىنەدى، ال، ءقازىر «قازاق ءتىلى» جانە «قازاق ادەبيەت» پاندەرى بويىنشا جەتى مىڭنان اسا مامان وقىپ جاتىر. ونىڭ ىشىندە ەكى مىڭنان استامى گرانتتا. جالپى، بيىل دا، كەلەشەكتە دە ول باعىتتا وزگەرىستەر بولادى دەپ كوزدەپ وتىرعان جوقپىز»  - دەدى دەپارتامەنت ديرەكتورى.

«ارينە، مەنىڭ ويىمشا قول قويعان كەزدە ول اكادەميكتەرگە دە بەلگىلى اقپاراتتى دۇرىس جەتكىزبەگەن شىعار. سوندىقتان، وكىنىشكە قاراي، ول كىسىلەر بىلمەي قول قويعان. ال، اشىق حاتتىڭ ىشىندە ايتىلعانداي «قازاقستانداعى ماماندىقتاردىڭ اراسىنان قازاق ءتىلى ساباعى كەتتى» دەگەن اقپارات شىندىققا جاناسپايدى»، - دەدى ول.

---