InfoHub Logo

بۇقاباي دەگەن كىسى دە وتىرىككە كەلگەندە، ەشكىمگە ەسەسىن جىبەرمەيتىن كىسى ەكەن. لەپىرە سويلەگەندە، ەلدى اۋزىنا قاراتىپ، وتىرىكتى شىنداي، اقساقتى تىڭداي قىلىپ، شىمىرىكپەستەن سوعىپ وتىرادى ەكەن.

— قانتار تۋىسىمەن قارساق تونىمدى باستىرا كيىپ، قارا جولاق وگىزىمە ءمىنىپ، توبىلعىدان تۇلكى ءتۇرتىپ، قيا تاستان قاسقىر قاعىپ كەلە جاتىپ، ارىستاننىڭ التى جۇمىرتقاسىن ومبى قاردان ۇرىپ الدىم دا، ويدان قاشقان وتىز تۇلكىنى التى جۇمىرتقا جىبەرىپ ۇرىپ، تۇلكىنىڭ ءبارىن جاۋ جاپىراقتاي ءتۇسىرىپ، سايدى اكەمە اس بەرگەندەي قان ساسىتتىم.

شىبىق ساداعىم، شي وعىممەن قۇرالايدى كوزدەن اتامىن. سەڭگىردە سەلتيىپ تۇرعان كەر قۇلاندى تارتىپ قالعانىمدا، وعىم اتقان قۇلاننىڭ وڭ تاناۋىنان كىرىپ، سول قۇلاعىنان شىعىپ، الدىڭعى وڭ اياقتىڭ تۇياعىن جۇلىپ، ارتقى سول اياقتىڭ باشپايىن ءتۇسىرىپ، سان ەتتى ارالاپ ورلەي شىعىپ، قۇيرىقتى قۋىپ وتىرىپ ۇستىنە شىعىپ كەتىپتى.

اڭعال سايدىڭ الشاسىنا سالىپ تاستاعان قاقپانىما كۇندە وتىز ورمان، توقسان تۇلكى تۇسەتىن بولدى. كۇندە ءبىر قاقپاننان ءبىر اۋىر كوگەن اڭ الامىن. بىرەۋىنىڭ كىرپىگىنەن، بىرەۋىنىڭ مۇرتىنان، بىرەۋىنىڭ مۇيىزىنەن، ءبىرىنىڭ قۇلاعىنان، كوبىنىڭ اياعىنان، ازى تۇياعىنان تۇسەدى دە جاتادى، تۇسەدى دە جاتادى دەيدى ەكەن.

---