InfoHub Logo

ەكى وتىرىكشى ءبىرى باستاپ، ءبىرى قوستاپ ەل ارالاپ، وتىرىك ايتپاقشى بولىپتى. بىرەۋى ءبىر كۇن ىلگەرى ءجۇرىپ، ەل ارالاپ، قونعان، تۇستەنگەن جەرىنە، جولىققان ادامىنا وتىرىك ايتا بەرمەكشى بولىپتى. ەكىنشىسى ءبىر كۇن كەيىن ءجۇرىپ، سول جونمەن الدىڭعى وتىرىكشىنىڭ ايتقانىن قوستاپ، راستاپ وتىرماقشى بولىپتى.

وتىرىكتى باستاۋشى ءبىر اۋىلعا كەلىپ قونىپتى. اۋىل ادامدارى:

— جارقىنىم، جاقسى-جاماننان نە ءتىل بار؟ – دەسە، وتىرىكشى:

— ەل امان، جۇرت تىنىش، جالعىز-اق كوكتى كوبەلەي، اسپاندى ارالاي كوشىپ بارا جاتقان ەل كوردىم، – دەپتى. ەل نانباپتى.

ەندى كەلەسى كەشكە سول اۋىلعا قوستاۋشى وتىرىكشى كەلىپ قونىپتى. اۋىل ادامدارى تاعى دا:

— جارقىنىم، جاقسى-جاماننان نە ءتىل بار، كەشە كەلىپ، ءبىر قوناق كوكتى كوبەلەي، اسپاندى ارالاي ەل كوشىپ بارا جاتىر ەكەن دەدى، ونان نە بىلەسىڭ؟ – دەيدى.

قوستاۋشى:

— بولسا بولار، ويتكەنى اسپاننان اندا-ساندا كەرەگەنىڭ ساعاناعى ءتۇسىپ بارا جاتقانىن كوردىم، –دەپتى. بۇل وتىرىك سونان كەيىن ەلگە لاقاپ بولىپ تارالىپ كەتىپتى.

كەلەسى كۇنى وتىرىكتى باستاۋشى ەندى ءبىر قونالقاداعى ەلگە كەلگەندە اۋىل ادامدارى كورگەن-بىلگەنىڭ بولسا ايتا وتىر، شىراعىم، دەگەندە:

— بوتەن ايتارلىق ءسوز جوق. جالعىز-اق جولدا ءبىر ۇلكەن كول ورتەنىپ جاتىر ەكەن، – دەپتى. ەل نانباپتى.

كەلەسى كەشكە سول اۋىلعا قوستاۋشى وتىرىكشى كەلىپ قونىپتى. اۋىل ادامدارى ودان: «جارقىنىم، جاڭعىرىققان نە ءتىل بار؟ كەشە ءبىر جولاۋشى، جولدا ءبىر كول ورتەنىپ جاتىر ەكەن دەپ كەتتى، ونان نە بىلەسىڭ؟» – دەپ سۇراعاندا قوستاۋشى:

— بولسا بولار، ويتكەنى سول كولدەن باسى كۇيىك، دەنەسى كۇيىك بالىقتاردى اركىم الىپ بارا جاتقانىن كورگەنىم راس، – دەپتى. بۇل وتىرىك سونان كەيىن ەلگە تاراپ كەتىپتى.

---