InfoHub Logo

الماتى وبلىسىنىڭ كونايەۆ قالاسىندا ءىرى گولف-كلۋب سالىناتىنى بەلگىلى بولدى. جوبانى «Dream Asia Group» كومپانياسى جۇزەگە اسىرادى. ينۆەستيسيا كولەمى – 18 ميلليارد تەڭگە.

بۇل تۋرالى Infohub.kz اقپارات اگەنتتىگى حابارلايدى.

جوبا يەلەرى كىمدەر؟

كومپانيانىڭ ەكى يەسى بار: كيم ەنگ نام جانە باعدات مانزوروۆ. كيم ەنگ نام تۋرالى اقپارات از بولعانىمەن، باعدات مانزوروۆ بۇعان دەيىن باق-تا بىرنەشە رەت قوزعالعان قىلمىستىق ىستەرگە بايلانىستى اتى اتالىپ جۇرگەن.

باعدات مانزوروۆتىڭ بۇرىنعى قىزمەتتەرى مەن ىستەرى

مانزوروۆ مانسابىن باپكەر بولىپ باستاپ، كەيىن «ساۋدا ءۇيى «شاعان» ءجشس-ىن باسقارعان. ول الماتى وبلىسىنىڭ كوكسۋ اۋدانى اكىمىنىڭ ورىنباسارى جانە اكىمى قىزمەتتەرىن اتقارعان. 2008-2017 جىلدارى الماتى قالاسى الاتاۋ اۋدانىنىڭ اكىمى بولدى. 2019-2020 جىلدارى الماتى وبلىسى اكىمىنىڭ ورىنباسارى لاۋازىمىندا جۇمىس ىستەدى.

2019 جىلدىڭ قىركۇيەك ايىندا مانزوروۆ پارا الدى دەگەن كۇدىكپەن ۇستالدى. الايدا، سول جىلدىڭ قازان ايىندا قىلمىستىق ءىس قوزعاۋعا نەگىز بولماعاندىقتان توقتاتىلدى. كەيىننەن ونىڭ جۇمىسىنا ورالدى. سىبايلاس جەمقورلىققا قارسى قىزمەت بۇل شەشىمدى قايتا قاراۋدى تالاپ ەتكەنىمەن، ونىڭ ءوتىنىشى قاناعاتتاندىرىلمادى.

2022 جىلى ب ا ق مانزوروۆقا قاتىستى «الاياق» بابى بويىنشا جاڭا قىلمىستىق ءىس تىركەلگەنى تۋرالى حابارلادى. الايدا، سوتقا دەيىنگى تەرگەۋ تىركەلمەگەن.

2023 جىلى بيزنەسمەن قالالىق ءماسليحات دەپۋتاتى بولۋعا نيەت بىلدىرگەنىمەن، الماتى قالاسىنىڭ №2 ءبىر مانداتتى وكرۋگى بويىنشا سايلاۋ كوميسسياسى ونىڭ كانديداتۋراسىن تىركەۋ تۋرالى شەشىمىن بۇزدى. سەبەبى، سالىق دەكلاراسياسىندا سايكەسسىزدىكتەر انىقتالعان.

بۇعان دەيىن «كۋرسيۆ» قازاقستانداعى گولف-كلۋبتاردىڭ يەلەرى جانە ولارعا قانشا قاراجات سالىنعانى تۋرالى جازعان بولاتىن.