بيىلعى 1 قىركۇيەكتەن باستاپ مەكتەپتەردەگى قاعاز ەسەپتىلىككە تىيىم سالىنادى
2016 جىلعى قىركۇيەكتەن باستاپ مەكتەپتەردەگى قاعاز ەسەپتىلىككە تىيىم سالىنادى. بۇل تۋرالى كەشە استانادا حالىققا ەسەپ بەرۋ كەزدەسۋىندە ق ر ءبىلىم جانە عىلىم ءمينيسترى ەرلان ساعادييەۆ مالىمدەدى.
«مۇعالىمدەردىڭ ەسەپتىلىك قۇجاتتارىن تولتىرۋ ماشاقاتى قيىن ماسەلە، دەگەنمەن دە بۇل باعىتتا ەلەۋلى جۇمىستار اتقارىلدى. وسى رەتتە 2016 جىلدىڭ قىركۇيەگىندە مەكتەپتەردە قاعاز جۇزىندەگى ەسەپتىلىككە تىيىم سالۋ ماقساتىن الدىمىزعا قويىپ وتىرمىز. بۇل تۇرعىدا جۇمىستار ءۇش باعىتتا ءجۇرىپ جاتىر. ءبىرىنشىسى، ق ر بعم-نىڭ ىت-دەپارتامەنتىن كۇشەيتۋگە نەگىزدەلگەن. قازىرگى كەزدە وسى شارالارمەن اينالىسۋدامىز، قاجەتتى مامانداردى قابىلداپ، ولاردىڭ قىزمەتىن كەڭەيتۋدەمىز. بۇل ءوز كەزەگىندە جەكەلەگەن مالىمەتتەر بازاسىن ءبىرىڭعاي جۇيەگە بىرىكتىرۋگە مۇمكىندىك بەرەدى. اتالعان جۇمىستار ەسەپتىلىككە قاتىستى جاعدايدى ناقتى سۋرەتتەۋگە ىقپال ەتتەدى »، - دەدى ە. ساعادييەۆ.
بۇدان بولەك ەكىنشى باعىتقا توقتالعان مينيستر: «بىزدە قازاقستانداعى ءاربىر ۆەدومستۆو مەكتەپپەن تىكەلەي بايلانىسىپ، ەسەپتىلىكتى تالاپ ەتۋ قۇقىعىنا يە بولعان ەدى. ءبىز ءتيىستى وزگەرتۋلەر ەنگىزدىك. جاقىندا پرەزيدەنت بالالار قۇقىعىن قورعاۋ زاڭناماسىن قابىلدادى، وسى ورايدا بۇل زاڭدا ق ر بعم مەكتەپتەردەن ەسەپتىلىكتى تالاپ ەتەتىن جالعىز ورگان بولىپ تابىلاتىندىعى تۋرالى نورما بار»، - دەدى.
ۇشىنشىدەن، ەندى ءبىلىم جانە عىلىم مينيسترلىگى تالاپ ەتەتىن ەسەپتىلىكتى رەتكە كەلتىرۋگە ءمان بەرىلەدى.
«ەندى اقپارات العىلارىڭىز كەلسە، مەكتەپكە بارمايسىزدار، ياعني مينيسترلىككە سۇراۋ جاسايسىزدار. وسى رەتتە ءبىز مۇعالىمدەردى قورعايمىز. ءبىز ءوزىمىزدىڭ ىشكى ەسەپتىلىكتى قىسقارتىپ، رەتكە كەلتىرۋىمىز قاجەت. 2016 جىلدىڭ 1 قىركۇيەگىنەن باستاپ قاعاز ەسەپتىلىككە تىيىم سالىپ، ونىڭ كولەمىن ايتارلىقتاي قىسقارتۋدى كوزدەپ وتىرمىز»،-دەپ ءتۇيدى ءسوزىن مينيستر.
You Might Also Like
-
اتىراۋدا ءبىلىم بەرۋ سالاسى قىزمەتكەرلەرىنىڭ كەڭەيتىلگەن كەڭەسى بولىپ ءوتتى. وعان 192 مەكتەپتىڭ ديرەكتورى، اۋدان اكىمدەرى، اۋداندىق ءبىلىم ءبولىمىنىڭ، ق ر ءبىلىم جانە عىلىم مينيسترلىگىنىڭ وكىلدەرى قاتىست...
