InfoHub Logo

دارەكەڭ دەپ وتىرعانىم مايدانگەر قارت-دارمەنباي ءىڭىرباي ۇلى. ۇلى وتان سوعىسىندا ءبىر اياعىنان ايىرىلدى. ەلگە ورالعاننان كەيىن بار سانالى عۇمىرىن مال باعۋعا ارنادى. بالالارى وسكەننەن كەيىن، مۇنان جيىرما جىل بۇرىن تۇرىكمەنستاننان اتاجۇرتى ماڭعىستاۋعا باعىت ۇستاندى. قىزىلتوبە اۋىلىنا كوشىپ كەلىپ، زىڭعىراتىپ ءۇي سالىپ الدى. سوعىس مۇگەدەگى رەتىندە وبلىس ورتالىعى اقتاۋدان العان ءتورت بولمەلى ءۇيىن وتاۋ تىككەن ەكى بالاسىنا ءبولىپ بەردى. ەكى رەت العان اۆتوكولىگىنىڭ قىزىعىن دا بالالارى كوردى. ۇلىن ۇياعا، قىزىن قياعا قوندىرعان قاريا سەكسەننىڭ سەڭگىرىنە اياق باسقاندا دۇنيەدەن وزدى.

مەنىڭ بۇل ارادا ايتايىن دەپ وتىرعانىم اقساقالدىڭ كىرشىكسىز اق كوڭىلدىگى، قانداي ما كەزدە دە ءوزىن اقجارقىن كۇيدە ۇستاي بىلۋىندە.

بىزگە قۇدالىعى بار، ۇلكەن كىسى رەتىندە اندا-ساندا سالەمدەسۋگە، كورىسۋگە باراتىنبىز. كورگەننەن كەلىنىنە داۋىستايدى:

— اي، ايمان قايداسىڭ، توركىندەرىڭ كەلدى، قازان اس.

مەن دە ءوزى قالجىڭعا ىڭعاي بەرگەن دارەكەڭمەن بۇرا سويلەپ، ازىلدەسۋگە بەيىلمىن. بالتىرىنداعى ۇلكەن تىرتىقتى نۇسقاپ:

— مىنا اياعىڭىزعا نە بولعان؟ — دەيمىن، ونى سوعىس كەزىندە وق تەسكەنىن بىلە تۇرا. ول دا ەسەسىن جىبەرمەيدى:

— سەندەردى قورعايمىن دەپ تاپقان ولجام عوي.

— ءسىز سوعىسقا باردىم دەيسىز، قالاي سوندا نەمىستى كوردىڭىز بە؟ كينودان كورىپ جاتامىز، ىلعي ءبىز جەڭەمىز، سوندا قالاي بولعانى، — دەپ مەن دە تاقىمدايمىن. ول ساقالىن سالالاپ، ويلانىپ قالادى دا، اعىنان جارىلادى.

— ۇرىسقا كىرىپ، العاشقى شابۋىل كەزىندە وڭ اياعىمدى جىلان شاعىپ العانداي بولدى. ورنىمنان قوزعالايىن دەسەم، اياعىم كوتەرتپەيدى. ءبىر كەزدە سانيتارلار كەلىپ، جىلىنشىگىمدى وق ءپارشالاپ كەتكەنىن ايتتى.

— سوسىن؟

— سودان سوڭ قاسىمداعى جولداستارىم جەتتى. قازاعى، تۇرىكپەنى بار اۋىلداس جىگىتتەر قاۋمالاپ جاتىر. ايتاتىندارى: "ساعان قۇداي بەردى دە ساعان قۇداي بەردى"...

— ال، ءسىز نە دەدىڭىز؟

— مەن نە دەيىن، سەندەرگە دە قۇداي جەتكىزسىن دەپ جاتىرمىن، — دەپ دارەكەڭ كۇلەدى. قايران اۋىلدىڭ اڭقىلداعان اق كوڭىل قارتتارى-اي دەسەڭشى؟! ەندى ونداي جاندار قايدا؟

---