InfoHub Logo

ۇمىتپاسام 1996 جىلدىڭ جەلتوقسانىندا قوعام قايراتكەرى، "قازاقستان ايەلدەرى" جورنالىنىڭ باس رەداكتورى التىنشاش قايىرجان قىزى جاعانوۆا جاڭاوزەنگە كەلدى. قاسىندا سول كەزدەگى وبلىستىق مادەنيەت باسقارماسىنىڭ باستىعى نۇرنياز مۇقانوۆ، اتالعان جورنالدىڭ بىرنەشە قىزمەتكەرى بار. ولارعا مەن قوسىلىپ، بەكەت اتاعا جول تارتتىق. ەكى جۇردەك "ۋاز"، بىرىندە التىنشاش ەكەۋمىز. ول ءوزى قىپشاقتىڭ قىزى، ادايدان شىققان كورنەكتى جازۋشى انەس سارايەۆتىڭ زايىبى ەكەنىن ايتىپ، ماعان جەڭگەي بولىپ شىعا كەلدى. جول بويى تالاي اڭگىمەنىڭ باسىن شالدىق. اتانىڭ باسىنا بارىپ تۇنەدىك. كەشقۇرىم جانە تاڭ الدىندا تاۋدان تومەن ءتۇسىپ، اتانىڭ زيراتىنا بارىپ ءتاۋ ەتتىك. تاۋدان تومەن تۇسكەن، قايتا كوتەرىلگەن كەزدەردە جەڭگەيدى قولتىعىنان دەمەپ ءجۇردىم. باسقالار بىزدەن ۇزاپ كەتكەن شاقتا دا ەكەۋمىز اڭگىمەلەسىپ، ورتا جولدا تىنىستاپ، بىرگە جۇردىك.

ەرتەڭىنە جاڭاوزەنگە كەلسەك، قالانىڭ اكىم-قارالارى مۇنايشىلار ءساناتورييىنىڭ جانىندا كۇتىپ تۇر ەكەن. قوناقتارعا قوناقاسى بەرۋ سىڭايلارى بارىن بايقاتتى. دەمالىس ورنىنىڭ قول جۋعىشتارى بار بولمەسىنە كىرىپ، ءۇستى-باسىمىزدىڭ شاڭىن قاققاننان كەيىن، قوناقپەن قوناق بولمايىن دەپ، ولاردان ءبولىنىپ، كىدىرىستەپ قالدىم. ەندىگى ويىم قالانىڭ ءۇشىنشى شاعىن اۋدانىنداعى ۇيىمە جەتۋ. ءبىر كەزدە ءساناتورييدىڭ قىزمەتكەرى كەلىپ، جۇرتتىڭ كۇتىپ قالعانىن ايتتى. ىلە شىقسام بارلىعى مەنى كۇتىپ تۇر ەكەن. تارانىپ، سىلانىپ-سيپانعان التىنشاش جەڭگەمىز ءتىپتى قۇلپىرىپ كەتىپتى. مەنى كورىپ:

— گدە تى موي بويەۆوي توۆاريشش، — دەپ ايقاي سالدى. مەنى قولتىقتاپ الىپ، كوپشىلىككە قاراپ: -قايدا جۇرسەڭ دە جانىڭدا سەنىمدى ادام بولعانعا نە جەتسىن، مىنا جىگىتىڭىز سونداي ازامات ەكەن، — دەپ قولتىقتاپ داستارقان باسىنا الىپ باردى.

قوشتاساردا:

— سەنىڭ اقىن ەكەنىڭدى دە بىلەمىز، ەكى كۇن جولداس بولدىق، جورنالىڭىزعا ولەڭدەرىمدى جاريالاساڭىز ەكەن دەگەن ءسوزدى ەستي المادىق، باسقالار بولسا جاراسىن-جاراماسىن الا جۇگىرەر ەدى. ولەڭدەرىڭدى ءقازىر اكەلىپ بەر، — دەدى.

ءبىراق مەن ولەڭدەرىمدى بەرىپ جىبەرە المادىم، ۋادە بويىنشا كەيىن جولداپ ەم، جەڭگەمىز دە ۋادەسىندە تۇرىپ، جورنالىنىڭ ءبىر بەتىن ارنادى. دامدەستىكتىڭ سىيلاستىققا اينالۋى شىعار بۇل.

---