Digital autumn: sensations VR فەستيۆالى
قازاننىڭ 27ء-سى - قاراشانىڭ 6-سى ارالىعىندا الماتى قالاسىندا “Digital autumn” VR فەستيۆال ءوتتى. اتالمىش شارا تاشكەنتتە، ماسكەۋدە جانە الماتىدا وتكىزىلۋدە. ءال-فارابي اتىنداعى قازۇۋ، جۋرناليستيكا فاكۋلتەتىنەن 8 ستۋدەنت وسى فەستيۆالدا مەدياتورلار جۇمىسىن اتقاردى. ەندى وسى شارانىڭ ەرەكشەلىكتەرى تۋرالى ايتىپ كەتەيىن. VR - ۆيرتۋالدى كەڭىستىك دەگەن ماعىنانى بەرەدى. ءبىزدىڭ ماقساتىمىز - ۆيرتۋالدى كەڭىستىك ارقىلى ادامداردىڭ جاناشىرلىق، قىزىعۋشىلىق سەكىلدى سەزىمدەرىن تۋدىرتىپ، الەمدە بولىپ جاتقان وزەكتى ماسەلەلەرگە نازار اۋدارتۋ.
اتالمىش شارا فرانسيا ەلشىلىگى كومەگىمەن ۇيىمداستىرىلعاندىقتان، ءبىز فرانسۋز اۆتورلارىنىڭ 9 جوبالارىن جاريالاعان بولاتىنبىز. ءار جوبا الىپ، ءارى ماڭىزدى ماعىنالاردى جەتكىزەدى. سونىڭ ىشىندە جەكە ماعان ۇناعان ءۇش جوبا تۋرالى ايتىپ كەتەيىن.
عارىشكەر ءومىرى / Being an astronaut: بۇل جوبانى كورگەن كەزدە، ءسىز عارىشكەر ماماندىعىنىڭ ەرەكشىلىكتەرىن تۇسىنەتىن بولاسىز. عارىشكەردىڭ شىن دايىندىعىن، بايقوڭىردىڭ شەكسىز دالاسىن، عارىش قۇرىلعىلارىن جانە عارىشقا ۇشۋدى كورۋ - سوزبەن جەتكىزىلمەس بالالىق باقىت. ۆيرتۋالدى كوزىلدىرىكتە ەكەنىڭىزدى ۇمىتىپ، قورشاعان عاجايىپقا باسىڭىزبەن سۇڭگىپ كەتەسىز. ۆيرتۋالدى كەڭىستىك - 21 - عاسىردىڭ ادامزاتقا بەرگەن سىيى. كوبىسى جەتە المايتىن تاڭعاجايىپ عارىشتى كورۋ جانە ءوزىڭدى ءبىر مەزەتكە عارىشكەر رەتىندە سەزىنۋ - VR كوزىلدىرىكتىڭ سيقىرى.
سوقىرلىق تۋرالى جازبالار / Notes of blindness: بۇل جوبا دجون حاللدىڭ سوقىرلىقتىڭ سەنسورلىق جانە پسيحولوگيالىق تاجىريبەسىنە نەگىزدەلگەن يممەرسيۆتى ۆيرتۋالدى شىندىق جوباسى. ونىڭ كۇندەلىكتى جازبالارى سوقىرلىقتىڭ كوگنيتيۆتى جانە ەموسيونالدى تاجىريبەسى بولىپ تابىلاتىن وسى ينتەراكتيۆتى فانتاستيكالىق ەمەس اڭگىمەنىڭ نەگىزىن قۇرايدى. ياعني ءبىز سوقىر ادامداردىڭ ەستۋ، سەزۋ ارقىلى وسى الەمدى قالاي “كورەتىنىن” باقىلايمىز. بۇل شىنىمەن دە پايدالى تاجىريبە، دەنساۋلىعى وسال ادامداردىڭ ءومىر سالتىن تۇسىنۋگە مۇمكىندىك بەرەدى.
تانىسىڭىز، مۇرتازا / Meet Mortaza: ماعان ەڭ ۇلكەن اسەر سىيلاعان وقيعا. مۇرتازا - اۋعانستاننان قاشىپ كەتكەن بوسقىن. ونىڭ بۇرىنعى ومىرىندە ءمىن بولعان ەمەس: اتا-اناسىمەن قۇرمەتكە تولى قارىم-قاتىناس، جان دوستار جانە كابۋلداعى بيزنەس. ءبىراق مۇرتازانى ەش سەبەپسىز ءولىم جازاسىنا كەستى. جوبا ونىڭ كابۋلدان پاريجگە دەيىنگى ساياحاتىن كورسەتەدى. بۇل ءتورت ايلىق ۇزاق ساپار قورقىنىشقا، سونىمەن قوسا ۇلكەن ۇمىتكە تولى بولادى. كەيبىر كەزدەردە تاماقتان تەك ءبىر شىنى سۋ مەن ءبىر ءتۇيىر الما عانا بولادى. قيىنشىلىقتار باس كەيىپكەرىمىزدى سىندىرماي، سوڭىندا ول ءوز دەگەنىنە جەتەدى. ءقازىر مۇرتازا پاريجدە تۇرادى. ول كەرەمەت وتباسى قۇرىپ، اۋعانستاننان قۋدالانعان بوسقىندارعا كومەكتەسۋدە. جوبانىڭ ەرەكشەلىگى - وقيعا شىن ومىردەن الىنعان. مۇرتازا سياقتى بوسقىندار مىڭداعان ادام سانىن قۇرايدى. ولارعا كومەك قولىن سوزۋ - ءبىزدىڭ مىندەتىمىز.
ۆيرتۋالدى كەڭىستىك ادامعا جاڭا سەزىمدەر سىيلايدى. VR كوزىلدىرىك ارقىلى العان تاجىريبە ءار 21 عاسىر ادامىنا قاجەت دەپ سانايمىن. جاڭاشىلدىققا اشىق بولايىق، سوندا عانا ءومىردىڭ ەڭ جارقىن جاقتارىن كورۋگە بەيىمدەلەمىز.
تولەپبەرگەن ايھانىم
ءال-فارابي اتىنداعى قازۇۋ جۋرناليستيكا فاكۋلتەتى، كينو&مەديا ماماندىعىنىڭ 1 كۋرس ستۋدەنتى.
جەتەكشىسى: اعا وقىتۋشى، كۋراتور - ن.ب. رۋشانوۆا
You Might Also Like
-
ادىلدىك-قاندايدا ءبىر ءدىن جولىندا جۇرگەن ادامنىڭ باستى ەتيكاسى، ءمورالى بولىپ تابىلادى. ءاربىر باسقان قادامى، سويلەگەن ءسوزى، ءار ءىسىنىڭ دۇرىس بولۋى. شىنشىلدىق جايلى بارلىق دىندەردە تۇسىنىك ءارى ءامىر بار...
-
مىنا دوڭگەلەنگەن جەر شارىندا مەنى تاڭدا دەپ تۇرعانداي مىڭداعان ماماندىق ءتىزىمى ءتىزىلىپ تۇر. قانداي ماماندىق تاڭداسام بولادى دەپ دال بولىپ جۇرگەندەر سول ءتىزىمنىڭ ىشىنە كىرسە مۇلدەم اداسادى. ال...
