InfoHub Logo

قىلمىستىق، قىلمىستىق-پروسەستىك جانە قىلمىستىق-اتقارۋ كودەكستەرىن وڭتايلاندىرۋ تۋرالى زاڭدا دروپپەرلىك – «بانك شوتىنا، تولەم قۇرالىنا نەمەسە سايكەستەندىرۋ قۇرالدارىنا رۇقساتتى زاڭسىز بەرۋ، اۋدارۋ جانە الۋ، سونداي-اق تولەمدەر مەن اقشا اۋدارىمدارىن زاڭسىز جۇزەگە اسىرۋ» (قك 232-1-باپ)  ءۇشىن قىلمىستىق جاۋاپكەرشىلىك بەلگىلەنگەن.

قولدانىستاعى زاڭنامادا دروپپەرلەردى قىلمىستىق جاۋاپكەرشىلىككە تارتۋعا قۇقىقتىق نەگىز جوق. بۇگىندە ولار كۋاگەر رەتىندە كەلەدى، نيەتى دالەلدەنسە عانا الاياققا سىبايلاس رەتىندە قارالادى.

ۇسىنىلعان تۇزەتۋلەردە دروپپەرلەردى قىلمىستىق جاۋاپكەرشىلىككە تارتۋدىڭ ناقتى ۋاقىتى بەلگىلەنەدى. وسىلايشا، بانك شوتىنا زاڭسىز رۇقسات بەرگەنى ءۇشىن ءۇش جىلعا دەيىن باس بوستاندىعىنان ايىرۋ، ال بانك شوتى ارقىلى ءۇشىنشى تۇلعانىڭ پايداسىنا زاڭسىز تولەم جاساعانى جانە اقشا اۋدارعانى ءۇشىن بەس جىلعا دەيىن باس بوستاندىعىنان ايىرۋ جازاسى قاراستىرىلعان. «دروپپەرلەر» دەپ سانالاتىندار بانك ەسەپشوتىن باسقارۋعا رۇقساتتى زاڭسىز العانى ءۇشىن جاۋاپقا تارتىلادى جانە جەتى جىلعا دەيىن باس بوستاندىعىنان ايىرىلادى.

بۇل رەتتە جاڭا باپتا مىناداي ەسكەرتۋ بار: وسى باپتا كوزدەلگەن قىلمىستىق قۇقىق بۇزۋشىلىقتى العاش رەت جاساعان، ول تۋرالى ءوز ەركىمەن مالىمدەگەن، سونداي-اق وسى قۇقىق بۇزۋشىلىقتىڭ اشىلۋىنا نەمەسە جولىن كەسۋگە بەلسەنە قاتىسقان ادام، ەگەر ونىڭ ارەكەتتەرىندە باسقا قىلمىستىق قۇقىق بۇزۋشىلىقتىڭ بەلگىلەرى بولماسا، قىلمىستىق جاۋاپتىلىقتان بوساتىلادى.