InfoHub Logo

قىزىلورداداعى تۇزەتۋ مەكەمەسىندە جازاسىن وتەپ جاتقان جۋرناليست جانە بەلسەندى دۋمان مۇحاممەدكارىمنىڭ دەنساۋلىعى كۇرت ناشارلاعان. بۇل تۋرالى ونىڭ ادۆوكاتى عالىم نۇرپەيىسوۆ مالىمدەدى.

ادۆوكاتتىڭ ايتۋىنشا، بەلسەندىنىڭ بۇيرەگى مەن جامباسى سىرقىراپ، ومىرتقاسىندا پروترۋزيا انىقتالعان. "اۋىرسىنۋدان ەركىن جاتا دا المايدى. مەكەمە اكىمشىلىگىمەن سويلەستىم، ولار 30 ماۋسىمدا ونى اۋرۋحاناعا اپارامىز دەپ ۋادە بەردى"، – دەيدى نۇرپەيىسوۆ.

الايدا، دەنساۋلىعى ناشارلاعانىنا قاراماستان، دۋمان مۇحاممەدكارىم جازاسىن جەڭىلدەتۋ تۋرالى سوتقا ءوتىنىش جازۋدان باس تارتقان. ول ايىبىن مويىندامايتىنىن جانە تۇرمەدە ادىلەتسىز قامالعانىن ايتىپ وتىر. بۇعان دەيىن ول مەكەمە تالاپتارىن ورىنداماعانى ءۇشىن كارسەرگە جابىلعان. جۋرناليست تۇرمە فورماسىن كيمەگەنى جانە دارەتحانا جۋۋدان باس تارتقانى ءۇشىن تارتىپتىك جازاعا تارتىلعان. ونىڭ ءوزى بۇل ارەكەتىن ازاماتتىق پوزيسياسىمەن بايلانىستىرادى.

ەسكە سالايىق، دۋمان مۇحاممەدكارىم «ەكسترەميزمدى قارجىلاندىردى» جانە «تىيىم سالىنعان ۇيىمنىڭ ىسىنە ارالاستى» دەگەن ايىپتار بويىنشا 7 جىلعا باس بوستاندىعىنان ايىرىلعان.

بەلسەندىنىڭ جاقتاستارى ونىڭ قاماۋدا وتىرۋىن ساياسي سەبەپپەن بايلانىستىرادى جانە قوعامدىق بەلسەندىلىگى ءۇشىن قۋدالانىپ وتىر دەپ سانايدى.