InfoHub Logo

تاڭەرتەڭ ۇيقىڭنان تولىعىمەن وياناۋ ءۇشىن سەرگىتەتىن دۋش قابىلداعانعا ەشتەڭە جەتپەيدى. سونىمەن قاتار، اۋىر كۇننەن كەيىن دۋشتىڭ استىندا تۇرا تۇرۋ دا جانعا سەرگەكتىك سىيلايدى. كوپتەگەن ادام كۇندەلىكتى دۋشقا تۇسپەسە جۇرە المايدى. بۇل تازالىق پەن ەستەتيكا ۇعىمدارىمەن ناسيحاتتالىپ، زاماناۋي قوعامدا قالىپتى دۇنيەگە اينالدى. ءبىراق ءجيى دۋشقا ءتۇسۋ قانشالىقتى قاجەت جانە دەنساۋلىققا زيان ەمەس پە؟

كوپتەگەن ادام دۋشقا تازالىق پەن ەستەتيكالىق ماقساتتا تۇسپەيدى. دۋش ولاردى تازاراق جانە ساۋ ەتەدى دەپ سەنەدى، ءبىراق باكتەريولوگيالىق زەرتتەۋلەر مۇنى جوققا شىعارادى.

ەلەين لارسون (ElaineLarson)، ينفەكسيونيست-ساراپشى جانە كولۋمبيا ۋنيۆەرسيتەتىنىڭ عىلىمي جۇمىستار بويىنشا دەكاننىڭ ورىنباسارى

2004 جىلى جاسالعان زەرتتەۋلەر انتيباكتەريالدى سابىن، سكراب پەن باسقا دا كوسمەتيكالىق قۇرالداردى ءجيى پايدالانۋ پايداسىنان گورى زيانى كوبىرەك ەكەنىن كورسەتكەن. ولاردى پايدالانعان سوڭ تەرىنىڭ تابيعي قورعانىس قاباتى جۋىلىپ كەتەدى، تەرى قۇرعاق ءارى جۇقا بولىپ قالادى. بۇل ءوز كەزەگىندە تەرى قاباتىندا ميكروجارىقشاقتار پايدا بولۋىنا قولايلى ورتا جاسايدى. ميكروجارىقشاقتار ارقىلى ءتۇرلى ينفەكسيالار مەن ميكروبتار كىرەتىن بولادى.

بۇل تۇجىرىمدى دجوردج ۆاشينگتون ۋنيۆەرسيتەتىنىڭ دەرماتولوگيا دوسەنتى برەندون ميچەلل (Brandon Mitchell) دە راستاپ وتىر. ونىڭ ايتۋىنشا كوپتەگەن ادام دۋشتى تىم ءجيى قابىلدايدى.

جەكە گيگيەناعا ارنالعان ءتۇرلى حيميالىق قۇرالدار پايدالانۋ ارقىلى ءجيى جۋىنۋ تەرىنى تابيعي مايلارىنان ارىلتادى، سونىمەن قاتار ادامنىڭ تابيعي يممۋندىق جۇيەسىن قۇرتادى.

برەندون ميچەلل

وسى پىكىردى قاپەردە ۇستاۋىمىز كەرەك سياقتى، اسىرەسە انتيباكتەريالدى قۇرالداردا تريكلوزان پايدالانىلادى دەگەن سوڭعى جانجالداردى ەسكەرسەك.

شىن مانىندە دۋشقا قانشالىقتى ءجيى ءتۇسۋ كەرەك؟ دارىگەر ميچەللدىڭ پىكىرىنشە، ەگەر ماسەلە ءسىزدىڭ سىرتقى كەلبەتىڭىز نەمەسە يىسىڭىزگە ەمەس — دەنساۋلىعىڭىزعا بايلانىستى بولسا — وندا اپتاسىنا ءبىر نەمەسە ەكى رەت ءتۇسۋ جەتكىلىكتى. دەنەمىزدىڭ تابيعي قۇرىلىمى كۇندەلىكتى تازالىقتى قاجەت ەتپەيدى — بۇل كەرىسىنشە زيان كەلتىرۋى مۇمكىن.

ارينە، ءتۇرلى جاعدايلار بولادى، مىسالى لاس ونەركاسىپتە جۇمىس ىستەيتىندەر نەمەسە فيزيكالىق ەڭبەكپەن اينالىساتىندار دۋشتى جيىرەك قابىلداۋى قاجەت. ءبىراق مۇنداي جاعدايدا دا، برەندون ميچەللدىڭ ايتۋىنشا، جۋىناتىن قۇرالداردى كوپ پايدالانۋدىڭ قاجەتى جوق. كىر بولعان جەرلەردى عانا سابىنداڭىز، سونىمەن قاتار قولتىق استى مەن ينتيم ايماقتى عانا. گيگيەنا تالاپتارىن ورىنداۋ ءۇشىن جانە دەنساۋلىعىڭىزعا زيان كەلتىرىپ الماس ءۇشىن وسى پروسەدۋرالار جەتكىلىكتى.

---