ەۆرەيدىڭ بالاسى بولسا، ولاي ەتپەس ەدى
ساباق الدىندا
- ءبىلىم دەگەندى شارتتى تۇردە زات دەپ الايىقشى، - دەدى مەتوديست ەڭبەك جولىن ەندى عانا باستاپ جاتقان جاس ۇستاز مۇعاليما قىزعا قاراپ. - ءيا، كادىمگى زات دەپ الايىق. بۇرىن قالاي بولدى؟ سول زاتتى ءمۇعالىم بالالاردىڭ كوزىنە كورسەتىپ، ول جونىندە بارلىعىن دا ءوزى ايتىپ بەرەتىن. ەندى ءبىز ولاي ەتپەيمىز. زات الاقاندا جاسىرۋلى كۇيىندە تۇرۋى ءتيىس. ونى بالا ىزدەنىپ، ءوزى تاباتىن بولسىن. مەن وزگە ەلدەردىڭ ءبىلىم جۇيەسىمەن تانىسىپ قايتتىم. سونىڭ ىشىندە ەۆرەيلەردە دە بولدىم. ساباعىڭىزدى ابىرجىماي جۇرگىزە بەرىڭىز. مەن ءسىزدىڭ ساباعىڭىزعا قاتىسىپ، سىزگە باعىت-باعدار بەرىپ وتىرامىن. ىسكە ءسات!
ساباقتا
مۇعاليما. سونىمەن، بالالار، اپايدىڭ، الاقانىندا نە جاسىرۋلى تۇر ەكەن؟ قانە، ءبارىمىز بىرگە تابامىز؟ اپايدىڭ الاقانىندا نە جاسىرۋلى تۇر؟
مەتوديست (سىبىرلاعانداي ەتىپ). كوردىڭىز بە؟ سالعان جەردەن "بىلمەيمىن" دەۋلەرىن كوردىڭىز بە؟ ەۆرەيدىڭ بالاسى بولسا، ولاي ەتپەس ەدى. ىزدەندىرە بەرىڭىز. تالپىندىرا بەرىڭىز. وزىڭىزگە تارتا بەرىڭىز.
مۇعاليما. بالالار-اۋ، بۇلارىڭ قالاي؟ سالعان جەردەن بىلمەيمىن دەۋگە بولادى ما؟ "بولماساڭ دا ۇقساپ ب ا ق، ءبىر عالىمدى كورسەڭىز..."
مەتوديست. ابايدان دۇرىس قوزعادىڭىز. تالپىندىرا بەرىڭىز. اناۋ شەتتەگى بالانى كوردىڭىز بە؟ وز-وزىمەن وقشاۋ قالعان. جانىنا جاقىنداڭىزشى. جەكە جۇمىس جۇرگىزىڭىز.
مۇعاليما. دياس! نەگە ساباققا ەنجارمىز؟ قانە، اپايدىڭ الاقانىندا نە جاسىرۋلى تۇر ەكەن؟
مەتوديست. بىردەن-اق موينىن ىشىنە تىعۋىن كوردىڭ بە؟ ابدەن باسىلىپ قالعان. وز-وزىنە سەنىمى ازايعان. سەنىمىن وياتىڭىز.
مۇعاليما. دياس! مۇنىڭ قالاي؟! وسىلاي ەتۋگە دە بولادى ما؟ بالالار! تىرىسسا، دياس تا تابا الادى ەمەس پە؟ سولاي ما؟
بالالار. ارينە، تابا الادى! ول دا ءبىز سياقتى بالا ەمەس پە؟!
مەتوديست. جولداستارىنىڭ سەنىمىن دۇرىس وياتتىڭىز. تالپىندىرا بەرىڭىز. سىنىپپەن جۇمىس جاساڭىز.
مۇعاليما. بالالار-اۋ، سونىمەن اپايدىڭ الاقانىندا نە جاسىرۋلى تۇر ەكەن؟ قانە، تابامىز.
مەتوديست. باعىت-باعدار بەرىڭىز. بالالاردىڭ ىزدەنۋلەرىنە باعىت-باعدار بەرىڭىز. ءسىز سىنىپتا باعىت-باعدار بەرۋشى تۇلعاسىز.
مۇعاليما. بالالار، ءبىزدىڭ ۋاقىتىمىز اياقتالىپ تا قالدى عوي. سونىمەن تابا المادىق پا؟ اپايدىڭ الاقانىندا كادىمگى وشىرگىش جاسىرۋلى تۇردى ەمەس پە؟ قيىن با ەكەن؟ تابۋعا بولادى ما ەكەن؟ مەن سەندەرگە باعىت-باعدار بەردىم عوي. ال سەندەر وزگە جاۋاپ ايتاسىڭدار. ەۆرەيدىڭ بالاسى بولسا، ولاي ەتپەس ەدى. جارايدى، بالالار! سەندەرگە ۇيگە تاپسىرما: "اپاي كەلەسى ساباقتا الاقانىنا نە جاسىرۋى مۇمكىن؟" وسى تاقىرىپ توڭىرەگىندە ءوز بەتىمىزشە ويلانىپ، ىزدەنىپ جۇرەمىز.
بالالار. ساۋ بولىڭىز، اپاي!
مۇعاليما. ساۋ بولىڭدار، بوتاقاندارىم مەنىڭ!
ساباقتان كەيىن
مەتوديست. جاقسى، جاقسى! ەڭ باستىسى، بالالاردا تالپىنىس بار. ءبىزدىڭ بالالار ازداپ قۋلىق جاساعىسى كەلەدى. ولار ورنىنان تۇرەگەلىپ، ساۋساق اراسىنان سىعالاپ كورمەك. ەۆرەيدىڭ بالاسى بولسا، ولاي ەتپەس ەدى. ولار قايدان ءبىلسىن، مۇعالىمدەر دايىندايتىن وقۋ ورنىندا ەندى ساۋساقتارمەن ارنايى جاتتىعۋ جۇمىستارى جۇرگىزىلەتىندىگىن. ەندىگى جەردە مۇعالىمدىك ماماندىققا ساۋساعى جىمداسىپ تۇراتىن ۇل-قىزدار عانا الىنادى. سونىمەن كەلەسى ساباقتا الاقانعا نە جاسىراتىن بولدىڭىز؟ تيىن دەيسىز بە؟! ايتا كورمەڭىز تيىن تۋرالى. ونسىز دا كەي ادامداردىڭ ساناسىن اقشا بيلەپ العان زامانعا كەز بولىپ وتىرمىز. باسقا ءبىر تالىم-تاربيەلىك ءمانى بار دۇنيە تۋرالى ويلانىڭىز. كوردىڭىز بە، ءسىزدىڭ وزىڭىزگە دە ءالى دە ىزدەنە ءتۇسۋ كەرەك. ءبىلىم ءار ۋاقىتتا ىزگىلىككە باعىتتالىپ وتىرۋى ءتيىس. تيىن تۋرالى ويلارىڭىزدى ەكونوميكالىق
تاربيە بەرۋ ماقساتىنداعى سىنىپ ساعاتىڭىزدا پايدالانىڭىز. ۇنەم جانە ادال ەڭبەك. ۇشتاستىرىڭىز. بىزدە قالاي؟ "جۇلىمىر-اۋ، كەشە عانا ەمەس پە وقۋ قۇرالدارىڭدى تۇگەلدەپ بەرگەنىم. كىشكەنە ۇنەمشىل، ۇقىپتىلاۋ بولساڭ قايتەدى؟! ول بالانىڭ شەشەسىن ماعان نەسىنە ايتاسىڭ؟! مەن سول بالانىڭ شەشەسىندەي بولىپ ءجۇرمىن بە؟! قوجايىننىڭ قاباعىنا قاراپ، تىكەمنەن تىك تۇرىپ، نەشە ساعات جۇمىس ىستەيمىن. سونىڭ ءبارى سەن ءۇشىن ەمەس پە؟! اناڭدى دا كىشكەنە اياساڭ نەتتى؟!" بۇل جونىندە تاربيە سالاسىنىڭ ماماندارىمەن ويلاسىپ كورىڭىز. ازىرگە ساۋ بولىڭىز.
سىزدەن بولاشاقتا جاقسى ۇستاز شىعادى. ەۆرەيلەر بىر-بىرىنە ءاماندا وسىلاي دەپ ايتادى. سىزدەن بىردەڭە شىعادى دەيدى.
مۇعاليما. ساۋ بولىڭىز.
سىنىپ ىشىندە
وقۋشى قىز. ءتۇۋ، جاڭا وشىرگىش دەپ ايتقىم كەلىپ تۇردى-اۋ!
بالالار. ايتپادىڭ با ەندى؟!
وقۋشى قىز. قويشى! جاۋابىم تاعى دا دۇرىس بولماي قالاتىن شىعار دەپ قورقاسوقتاپ تۇردىم. بىزدە قالاي؟ جاۋابىڭ دۇرىس بولماي قالسا بولدى، جاتقان ءبىر كۇلكى. ەۆرەيدىڭ بالاسى بولسا، ولاي ەتپەس ەدى.
You Might Also Like
-
"اقتوبە ورتا مەكتەبى" مم 2 "ا" كلاسس وقۋشىسى: سەيتجانوۆا جانسايا بەردىعالي قىزى كلاسس جەتەكشىسى: بۋلەكبايەۆا ايمكۋل مۋحياشوۆنا
-
تاڭەرتەڭ ۇيقىڭنان تولىعىمەن وياناۋ ءۇشىن سەرگىتەتىن دۋش قابىلداعانعا ەشتەڭە جەتپەيدى. سونىمەن قاتار، اۋىر كۇننەن كەيىن دۋشتىڭ استىندا تۇرا تۇرۋ دا جانعا سەرگەكتىك سىيلايدى. كوپتەگەن ادام كۇندەلىكتى د...
