InfoHub Logo

فرانسياداعى اۋكسيوندا ەيفەل مۇناراسىنىڭ بۇرىنعى ۆينتتىك باسپالداعىنىڭ ءبىر بولىگى 450 مىڭ ەۋرودان استام باعاعا ساتىلدى. بۇل تۋرالى DW باسىلىمىنا سىلتەمە جاساپ، Tengri Life حابارلادى.

بۇل تۋرالى Infohub.kz اقپارات اگەنتتىگى حابارلايدى.

ساتىلىمعا شىققان باسپالداق سەكسياسى شامامەن 2،7 مەتر بيىكتىكتە بولىپ، 14 باسپالداقتان تۇرادى. اۋكسيون الدىندا ونىڭ قۇنى 120-150 مىڭ ەۋرو دەپ باعالانعان ەدى. الايدا، ءاتى-جونى قۇپيا ساقتالعان فرانسۋز كوللەكسيونەرى ەڭ جوعارى باعانى ۇسىنىپ، بۇل تاريحي جادىگەردىڭ يەسى اتاندى.

ەيفەل مۇناراسىنىڭ تاريحىنداعى ماڭىزدى بولىك

اتالعان باسپالداق سەكسياسى ەيفەل مۇناراسىنىڭ ەكىنشى جانە ءۇشىنشى قاباتتارىن بايلانىستىرعان. ءدال وسى ۆينتتىك باسپالداقپەن 1889 جىلعى دۇنيەجۇزىلىك كورمەگە كەلگەندەر كوتەرىلگەن بولاتىن. سول كورمە ءۇشىن ينجەنەر گيۋستاۆ ەيفەل مۇنارانى تۇرعىزعان ەدى.

سالماعى 1،4 تونناعا جۋىقتايتىن بۇل قۇرىلىم 40 جىلدان استام ۋاقىت بويى جەكە كوللەكسيادا ساقتالىپ كەلگەن. ونى ساتۋ الدىندا ەيفەل مۇناراسىمەن جۇمىس ىستەيتىن ماماندار قالپىنا كەلتىرگەن.

باسپالداقتىڭ دەمونتاجدالۋ سەبەبى

1983 جىلى مۇنارانى جاڭعىرتۋ جۇمىستارى كەزىندە ەكىنشى مەن ءۇشىنشى قابات اراسىنداعى باسپالداق دەمونتاجدالعان. ول كەزدە باسپالداق كەلۋشىلەر ءۇشىن ءقاۋىپتى دەپ تانىلىپ، زاماناۋي ليفتتەرمەن الماستىرىلعان.

سودان كەيىن بۇل قۇرىلىم 24 ءتۇرلى بولىككە كەسىلگەن. بۇگىندە ونىڭ جەكەلەگەن بولىكتەرى نيۋ-يوركتەگى ەركىندىك مۇسىنىندە، جاپونياداعى مۇراجايلار مەن جەكە باقتاردا، ءتىپتى ديسنەيلەندتە دە بار. قالعاندارى ءىرى جەكە كوللەكسيالارعا قوسىلعان.

ەيفەل مۇناراسى 1889 جىلعى دۇنيەجۇزىلىك كورمەگە ارنالىپ سالىنعان. باستاپقىدا بۇل قۇرىلىس ۋاقىتشا دەپ ەسەپتەلىپ، كورمەدەن كەيىن بولشەكتەۋ جوسپارلانعان. الايدا، ۋاقىت وتە كەلە مۇنارا ءپاريجدىڭ باستى سيمۆولىنا اينالىپ، بۇگىندە الەمدەگى ەڭ كوپ باراتىن ورىنداردىڭ ءبىرى بولىپ سانالادى.