InfoHub Logo

ەسكى زامانداردا ءبىر-بىرىن قاتتى جاقسى كورەتىن وتە باۋىرمال ەكى اعايىندى بولىپتى. ۇلكەنىنىڭ ەسىمى حاليل، كىشىسى يبراھيم. حاليل ۇيلەنگەن بالا-شاعالى، ال يبراھيم ءالى بويداق ەكەن. ەكەۋىنىڭ ورتاق ەگىس القابى بار ەدى. بىرلەسە ەگىنشىلىكپەن اينالىسىپ، شىققان ءونىمدى ەكىگە ءبولىسىپ، كۇنەلتەدى.

ءبىر جىلى بيداي ەگەدى. شىققان بيدايدى ورىپ، ەكىگە بولەدى. كەيىن وسى بولىستىرگەن بيدايلاردى تاسۋعا كىرىسەدى. ۇلكەن باۋىرى حاليل: «يبراھيم، سەن وسىندا كۇتە تۇر، مەن قاپتاردى الىپ كەلەيىن» — دەيدى. يبراھيم: «جارايدى اعا»-دەپ استىق باسىندا قالادى. حاليل قاپتاردى الىپ كەلۋگە كەتكەندە ءىنىسى ويلانادى: «اعام ۇيلەنگەن، بالا-شاعاسى بار. ماعان قاراعاندا وعان كوبىرەك بيداي كەرەك» — دەپ، ءوزىنىڭ ۇلەسىندەگى بيدايدان بىرنەشە كۇرەك بيداي الىپ، اعاسىنىڭ بيدايىنا قوسىپ قويادى. كەيىن اعاسى قاپتاردى الىپ كەلىپ: «قانە يبراھيم، تاسۋدى الدىمەن سەن باستا»- دەيدى. يبراھيم: «جارايدى» دەپ ءبىر قاپتى تولتىرىپ الىپ كەتەدى. ول كەتكەن كەزدە اعاسى ويلانادى: «اللاھقا شۇكىرلەر بولسىن. مەن ۇيلەنگەنمىن، بالا-شاعام دا بار. ءبىراق ءىنىم ءالى بويداق. وعان ءالى كوپ جۇمىس ىستەپ، اقشا تابۋى كەرەك. ءۇي قۇرىپ، ۇيلەنۋى كەرەك» دەپ، ءوزىنىڭ بيدايىنان ءبىراز كۇرەك ءىنىسىنىڭ بيدايىنا تاستايدى. كەلەسى كەزەكتە حاليل كەتكەندە ءىنىسى ءوزىنىڭ بيدايىنان تاعى دا ونىڭ ۇلەسىنە قوسىپ قويادى. اعاسى دا ءوز كەزەگىندە بىرنەشە كۇرەك ءىنىسىنىڭ بيدايىنا تاستاپ وتىرادى. وسىلايشا ءبىرشاما جالعاسادى، ءبىراق بۇل ىستەن ءبىر-بىرىنىڭ حابارى بولمايدى. سوڭىندا كەش باتىپ، كۇن قارايادى. ال بيدايدىڭ تاۋسىلاتىن ءتۇرى جوق، ءتىپتى ازايمايدى دا. اللاھۋ تا’الاعا بۇل جاعداي قاتتى ۇنايدى. بۇل بيدايلارىنا حاق تا’الانىڭ بەرەكە بەرگەنى سونشالىق، قانشاما كۇن تاسىپ، بيدايدى تاۋىسا الماعان ەكەن. ولار بۇل جاعدايعا تاڭ قالادى. بيدايلارى ازايۋدىڭ ورنىنا كەرىسىنشە كوبەيىپ، قويمالارى تولىپ تاسىپ كەتەدى. «بەرەكەلى بولسىن» دەگەن تىركەستەگى بەرەكە ءسوزىنىڭ شىنايى ماعىناسىن وسى مىسال ايقىنداپ تۇرعانداي...

---