InfoHub Logo

مايدانداعى جازۋشى جاستارىمىزدىڭ ءبىرى باۋبەك بۇلقىشيەۆ جولداس ءوزىن جۇرتقا وتان سوعىسىنىڭ ۇستىندە تانىستىردى. سوعىستان بۇرىن ول ارنەگە دە تايىنباي سوقتىعاتىن تالابى بار دا قالامى ۇشتالماعان بولاتىن. ىزدەنگىش ويعا سۇراۋ سالىپ، جاس قالامنىڭ تەز ۇشتالىپ كەتۋىنە اسەر ەتكەن ۇلى وتان سوعىسى سياقتى ۇلكەن كورىكتىڭ دەم الىسى.

سوعىس الدىنداعى سوڭعى جىلداردا باۋبەكتىڭ ولەڭدەرى كوبىنەسە «وكتيابر بالالارى» گازەتىندە باسىلىپ تۇرعاندىقتان «ۇلكەندەردىڭ» نازارىن تارتا قويماعان ەدى. ال، مىنا ءار قۇرالدىڭ وتكىرلىگىن، ءار كۇشتىڭ ازىرلىگىن اياۋسىز سىنار كەزەڭدە جاس تالانت جاقسى سىلتەپ كەتتى. ويلى جاستىڭ قۇنارلى ءسوزى بۇكىل سوۆەت ەلىنىڭ قۇلاعىنا جايلى ءتيدى، جيىرما بەس جىل بىرگە، ءبىر باعىتتا وسىپ-ونگەن كوپ ۇلتتى ەلدىڭ اينىماس دوستىعىنىڭ ۇنىندەي ەستىلدى.

باۋبەك زامان بىزدىكى دەيدى. باۋبەك مايدانداعى قازاق جاستارىنىڭ اتىنان سويلەيدى. شىنىندا، مۇنىڭ ەكەۋى دە ۇلكەن جاۋاپتىلىقپەن ايتىلاتىن سوزدەر. ىسىنە دە، كۇشىنە دە ەركىن سەنەتىن سوۆەت جاسى بۇل جاۋاپتىلىقتان تايىنعان جوق. ويتكەنى باۋبەكتىڭ وسى كىتاپشادا باسىلىپ وتىرعان ماقالالارىنىڭ قايسىسىن الساق تا، وتە ءبىر ەلەۋلى، ەرەكشە ءبىر ماعنالى ماسەلەلەردى قوزعايدى. ونى قوزعاي العان جاستىڭ زامان بىزدىكى دەۋگە دە، جالپى جاستار اتىنان سويلەۋگە دە ابدەن قاقىسى بار.

باۋبەكتىڭ بىر-ەكى ماقالاسىن قازاقشاعا مەن اۋداردىم، ۇناتىپ اۋداردىم. ويلانىپ ايتىلاتىن ۇلكەن ويلاردى وقۋشى جۇرەگىنە ءدال جەتكىزەتىن ادەمى تىلمەن بەرە ءبىلۋ — جازۋشىنىڭ ەرەكشە ءبىر قاسيەتى. باۋبەكتە وسى قاسيەت بار. ەلىرە سويلەگەن كوپىرمە ءسوز ەمەس، جاس جۇرەگىن ءجۇز بۇراپ شىققان ويىنا وراي ادەمى ءتىلى بار. «ءومىر سۇرگىم كەلەدى»، «ءومىر مەن ءولىم تۋرالى» دەگەن ماقالالارى ۇلكەن شەبەرلىكپەن جازىلعان. سوۆەت جۋرناليست -جازۋشىلارىنىڭ الدىڭعى قاتارداعىلارىنىڭ - اق ايتا الاتىن نارسەلەرى. باۋبەك دۇنيەلىك مادەنيەتپەن، ءار اعىمدى فيلوسوفيامەن جاقسى تانىس جازۋشىعا ۇقسايدى.

باۋبەك ءقازىر وتان سولداتى، مايداندا ءجۇر. قولىندا مىلتىعى، قالتاسىندا قالامى. ەلىمىزدى قورلاپ، جەرىمىزدى لاستاپ جۇرگەن نەمىس فاشيستەرىنە ەكەۋى دە تاس شوقپارداي تيەدى. قالامىن وتان سوعىسىنىڭ تىلەگىنە باعىندىرىپ، باۋبەك ءقازىر كوركەم وچەرك جازىپ ءجۇر.

جەڭىس كۇنى جاقىنداپ كەلەدى. مايداننان شيراپ قايتقان جازۋشى جاستاردىڭ قۇلاشىن كەڭ جايىپ، قاناتىن ەركىن سەرپەر كۇندەرى دە جاقىن. وسى تىلەك، وسى ۇمىتپەن تاعى ءبىر جاقسى، تاعى ءبىر جاس جازۋشىمىزدىڭ بەتىن اشقىمىز كەلەدى.

---