جولداس تاۋ ۇلى!
كەشىرە گور، سەنىڭ كىم ەكەنىڭدى بىلمەيمىن. ءبىراق تانىمايدى ەكەن دەمە، ەزىڭدى كورسەم تارپا باس سالار ەدىم. ال سوڭعى اتىڭ «تاۋ ۇلى» ماعان كىم ەدى بۇل؟ دەگەن سۇراق قويادى. ويتكەنى ءبۇل اتاق مەن الماتىدان كەتكەننەن كەيىن پايدا بولعان. اسىرەسە باۋبەكتىڭ قازالانۋىمەن بايلانىستى كەزدەستىردىم مەن «تاۋۇلىن». تاۋىپ قويىلعان اتاق. مەنىڭ الدىمدا «س. ق» -نىڭ 122-سانى جاتىر. قاي كۇنى شىققانى بەلگىسىز. الماتىداعى باسپا ماماندارى اسكەرگە جونەلتىلەتىن گازەت بولعاندىقتان، ساقتىققا سالىنىپ، كۇنىن ءجوندى تۇسىرمەگەن بولۋ كەرەك. ماسەلە وندا ەمەس. «دوستىق قارىزىندا». كەشىر، قاتە جازدىم. «دوس قارىزى» ەكەن. مەن مۇنى ءقازىر عانا وقىپ شىقتىم. تەك وقىعانىم جوق، جان جۇيەم ەلجىرەپ وقىدىم. كوزىمنەن ىرشىپ كەتتى ىستىق جاس. دەمەك، سەن جان سارايىما ەنە ءبىلدىڭ. مۇمكىن مۇنىڭ ىشىندەگى ادامدار سەنىڭ قانداي دوسىن بولسا، مەنىڭ دە سونداي جاقىندارىمنىڭ اتىمەن بايلانىستى شىعار. باۋبەكتى دە، حاسەندى دە مەن جاقسى بىلەمىن. اسىل ادامدار ەدى. باۋبەك ءبىر جاز مەنىڭ قاراماعىمدا ىستەدى. كارل ماركس كوشەسىندەگى 20-ۇيدە مەن ونىڭ تۇڭعىش داستانىن تىڭدادىم. وقىپ بولعاننان كەيىن ونىڭ قارا كوزى جاۋتاڭداپ، ماعان قادالدى. «كانە، اعا، نە ايتاسىڭ؟» دەگەن سۇراق بار ەدى ول كوزدە. «داستانىڭدى اياقتا، قاراعىم. وقيعاسى ءالى ءورىس الا قويماعانىمەن ولەڭدىك ءمانى تەرەڭ جاتىر»، — دەدىم مەن. باۋبەك كۇلىپ جىبەردى. (كەشىر، سىيماي قالدى. ەكىنشى قاعازعا جازۋ كەرەك).
...مۇمكىن ول مەنەن مۇنداي جاۋاپ كۇتپەگەن-اق شىعار...
مەن مايدانعا كەلگەندە باۋبەكپەن حات ارقىلى حابارلاسىپ تۇردىم. «باۋىرىم» دەپ جازار ەدى ول ۇنەمى. ءبىزدىڭ رەداكسياعا كەلۋ تۋرالى كەڭەستى. مەن باستىقتارعا ايتتىم. «ءوزىڭ باستىق بولماعان سوڭ ءومىرىڭنىڭ ءىشىن ۇرايىن»، — دەر ەدى كۇزەنباي دەگەن اتامىز. سول ايتقانداي الدىرۋ قولدان كەلمەدى. ءسويتىپ جۇرگەندە قازالانىپ كەتتى. كەلەشەگى بار ەدى. ساقتاۋ كەرەك ەدى. قىنجىلدىم. اجالىنا ءوزىم سەبەپشى بولعاندايمىن. قايران جاس، اقىرعى مينۋتىندا نە دەدى ەكەن. بىلەر مە ەدىم!
وسىمەن سەنىڭ باۋبەك جونىندەگى ەكى اڭگىمەڭدى وقىدىم. ۇنادى ماعان. ادامنىڭ، سولداتتىڭ قاتاڭ جۇرەگىن تەربەپ، ايانىش سەزىمىن وياتادى. كەككە شاقىرادى. وسى العان ءستيلىڭ وتە ۇنامدى. سەنىڭ بۇل اڭگىمەلەرىڭ باۋبەك ەڭبەگىنىڭ جالعاسى ءتارىزدى. شىعىس ۇلىنىڭ ورنىن تاۋ ۇلى جوقتاتپاس. سەنەن اتىڭا لايىقتى اسقار نارسە كۇتەمىن، باۋىرىم.
ەندىگى اڭگىمە قالىڭدىقتار تۋرالى. ارينە سەنىڭ الىپ وتىرعانىڭ يدەال بولارلىق ايەلدەر. قارىنداستاردىڭ ءبارىنىڭ ماحابباتى وسى ءتارىزدى تازا بولعاي دا. تىلەك تە سول، ءبىراق، دوس قارىزى ەرگە شىقپاۋدا ەمەس. ارينە، بىلەتىن دوستىڭ قالىڭدىعى ەرگە شىقسا، ونىڭ دوسىنا اۋىر - اق،. مەن ءوزىم دە قىزعانار ەدىم، ولىك ءۇشىن. الايدا ولارعا بالا اسىراتىپ، ءومىر، تىرشىلىك زاڭىنا كەدەرگى جاساۋعا قوسىلماس تا ەدىم مەن. مۇمكىن قاتە شىعار پىكىرىم. سەن رومانتيكالى ايەلدەر ىزدەيسىڭ. دۇرىس - اق. دەگەنمەن، نەكراسوۆتىڭ ايتقان شىندىعى شىندىق. ۇمىتپايتىن تەك انا. قاسىرەتىن قالدىرماي كورگە كوتەرىپ جەتەتىن انا عانا. بۇل تەك اناعا ءتان قاسيەت. كەشىر، ءىنىم، كەپ جازدىم. مۇنىڭ ءبارى ءسۇيسىنىپ وقىعاندىقتىڭ بەلگىسى. توپشىڭ ءبىرسىپىرا قاتايا كەلگەن ءتارىزدى، ەندى شارىقتاپ، قياعا كوتەرىلۋىڭدى تىلەيمىن.
قوش، ءابۋ
دالا پوچتاسى، 22107 ا
3 اۆگۋست 1945 ج
You Might Also Like
-
(مايداندا قازا تاپقان تالانتتى جاس جازۋشى، جان دوسىم باۋبەك بۇلقىشيەۆتىڭ ولىمىنە)
-
مايدانداعى جازۋشى جاستارىمىزدىڭ ءبىرى باۋبەك بۇلقىشيەۆ جولداس ءوزىن جۇرتقا وتان سوعىسىنىڭ ۇستىندە تانىستىردى. سوعىستان بۇرىن ول ارنەگە دە تايىنباي سوقتىعاتىن تالابى بار دا قالامى ۇشتالماعان بولاتىن. ءى...
