InfoHub Logo

ەلىمىزگە تانىمال بلوگەر مۇرات ءابدىلدا قايتا قامالدى،-دەپ حابارلايدى Infohub.kz.

تۇركىستان وبلىسىندا قوعام نازارىن ءجيى وزىنە اۋدارىپ جۇرگەن بلوگەر مۇرات ءابدىلدا تاعى دا قاماۋعا الىندى. بۇل جولى وعان قاتىستى تۇركىستان قالالىق اۋدانارالىق سوتى شارتتى تۇردە بوساتۋدىڭ كۇشىن جويىپ، قالعان جازا مەرزىمىن ناقتى وتەۋ تۋرالى ۇكىم شىعاردى.

مۇرات ءابدىلدا 2022 جىلى قازاقستان رەسپۋبليكاسىنىڭ قىلمىستىق كودەكسىنىڭ 174-بابى، 1-بولىگى بويىنشا (الەۋمەتتىك، ۇلتتىق نەمەسە ءدىني الاۋىزدىقتى قوزدىرۋ) كىنالى دەپ تانىلىپ، سوت شەشىمىمەن باس بوستاندىعىنان ايىرىلعان بولاتىن. ۋاقىت وتە كەلە ول شارتتى تۇردە مەرزىمىنەن بۇرىن بوساتىلعان. الايدا، ارادا كوپ وتپەي ساۋران اۋداندىق پوليسيا ءبولىمى بلوگەردىڭ شارتتى جازا تالاپتارىن بۇزعانىن العا تارتىپ، جازانىڭ قالعان بولىگىن ناقتى وتەۋ تۋرالى ۇسىنىس ەنگىزدى.

سوت پوليسيا ۇسىنىمىن قاناعاتتاندىرىپ، مۇرات ءابدىلدانىڭ شارتتى جازاسىن جويدى. ەندى ول قالعان 2 جىل 11 كۇندىك مەرزىمدى قاماۋدا وتەيتىن بولادى. بۇل اقپارات الەۋمەتتىك جەلىلەردە كەڭىنەن تاراپ، ءتۇرلى پىكىرلەرگە سەبەپ بولدى.

ايتا كەتەيىك،مۇرات ءابدىلدا — الەۋمەتتىك جەلىلەردە وتكىر وي ايتىپ، كەيبىر مەملەكەتتىك ماسەلەلەرگە قاتىستى سىن-پىكىر ءبىلدىرىپ جۇرگەن تۇلعا. ونىڭ ارەكەتتەرى مەن ءسوزى بۇعان دەيىن دە قوعامدا قىزۋ تالقىعا تۇسكەن. بۇل جولعى جازا — زاڭ الدىنداعى جاۋاپكەرشىلىك پەن شارتتى تۇردە بوساتىلعانداردىڭ مىندەتتەمەلەرىن ساقتاۋ ماڭىزدىلىعىن كورسەتىپ وتىر.